လါမးရှး(၁၃)သီ, ၂၀၂၄နံၣ်
တလၢၤကီၫ်စဲၣ်, ကၠဲးထိၣ်ကီၣ်ဆၣ်(ကျိုက်ထိုမြို့နယ်)အပူၤ ဖဲသၣ်တတါသ၀ီ(သံတံတားရွာ)ကပၤ ဖဲလါမးရှး(၁၁)သီနံၤ မုၫ်ထူၣ်အကတီၫ် သုးကီၣ်ကးအသုးဖိတဖၣ် ခး၀ဲကမျၢၫ်လၢဟးထီၣ်ဟးလီၤတဖၣ်အဃိ ကမျၢၫ်သံ(၂)ဂၤ၀ံၤ ဘၣ်ဒိ၀ဲတဂၤအဂ့ၫ် RFA တၫ်ကစီၣ်သန့ပာ်ဖျါ၀ဲလီၤ.
သုးကီၣ်ကးအသုးလၢဂံၫ်ဘါအိၣ်(၂၀)ဂၤဘျဲၣ် နီၤဖးလီၤအသးခံဖုဒီး လၢသမံသမိးတၫ် ဖဲသၣ်တတါသ၀ီ(သံတံတားရွာ)တိၤဖီခိၣ်အကတီၫ် လီၫ်က၀ီၤဖိလၢတအိၣ်ပတုာ် မီၣ်တီၣ်တုၤ(ဆိုင်ကယ်)တဖၣ် ခး၀ဲန့ၣ်လီၤ.
ခး၀ဲဒ်သိးအံၤအဃိ သးနံၣ်အိၣ်(၂၀)ဘျဲၣ် ကိၣ်ကၠိသ့(ကိုဂျိုးသိမ်း)ဒီး ကိၣ်ကၠီၣ်ဟူၣ်စ့ၣ်(ကိုကျော်ဟူစိန်)တဖၣ် ဘၣ်သံ၀ံၤ ကိၣ်ခၠံးကိၣ်ကိၣ်(ကိုချစ်ကိုကို)တခီ ဘၣ်ဒိ၀ဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.
တၫ်ခးတၫ်၀ံၤအလီၫ်ခံ ဖဲယံာ်အနၣ်ရံၣ်ဃၣ်ဃၣ်အကတီၫ် ပှၤလၢသံဒီးဘၣ်ဒိတဖၣ် သုးကီၣ်ကးအသုးတဖၣ်က့ၤစိာ်အ၀ဲသ့ၣ်လၢသိလ့ၣ်အဂ့ၫ် တၫ်ဘံၣ်တၫ်ဘၢအဖီခိၣ် ကၠဲးထိၣ်လီၫ်က၀ီဖိလၢတအဲၣ်ဒိးပာ်ဖျါအမံၤတဂၤ တဲဘၣ် RFA တၫ်ကစီၣ်သန့န့ၣ်လီၤ.
သၣ်တတါသ၀ီ(သံတံတားရွာ)န့ၣ် အိၣ်ဖဲကၠဲးထိၣ်ဒီး ဘံလ့အဆၢအဃိ ပှၤအိၣ်အါန့ၣ်လီၤ. သ၀ီ၀ဲအံၤအိၣ်ဒီးတိၤထးတဘိလီၤ. တၫ်သမံသမိးတြဲၤစ့ၫ်ကီးအိၣ်၀ဲလီၤ. ဖဲတၫ်ကနုာ်လီၤဆူ ဘံလ့တခီ တၫ်သမံသမိးတြဲၤ၀ဲန့ၣ်ခးတၫ်လီၤ. သးစၫ်တဖၣ်တခီ လီၤဂာ်ဒ်ပျံၤတၫ်၀ံၤတအိၣ်ပတုာ်ဘၣ်ဒီး ဃ့ၫ်ဖျဲးကွံာ်အသးလီၤ. လၢတၫ်အံၤအဃိ ဘၣ်တၫ်ခးအ၀ဲသ့ၣ်အဂ့ၫ်တဲ၀ဲန့ၣ်လီၤ.
တၫ်မၤစၢၤထံရူၫ်ကီၫ်သဲးပှၤလီၤဃိာ်ဖိကရၢ(AAPP) လါမးရှး(၁၂)သီ တၫ်ပာ်ဖျါအဖီခိၣ် သုးဟံးန့ၫ်ဆူၣ်တၫ်စိတၫ်ကမီၤ၀ံၤအလီၫ်ခံ (၃)နံၣ်ဘျဲၣ်အတီၫ်ပူၤ သုးကီၣ်ကးသုးအဃိ ကမျၢၫ်(၄,၆၇၇)ဂၤ ဘၣ်သံ၀ဲန့ၣ်လီၤ.
ref:rfa
