လါမးရှး(၁၃)သီ, ၂၀၂၄နံၣ်
ဖဲ ၂၀၂၄နံၣ်, လါးမးၡး(၁၁)သီအနံၤ, ဂီၤ(၈း၃၀)နၣ်ရံၣ်အဆၢကတီၫ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၅), မုၫ်တြီၫ်ကီၫ်ရ့ၣ်ဟီၣ်က၀ီၤပူၤ တၫ်မၤ၀ဲ တၫ်သူၣ်ထီၣ်န့ၫ်ကညီသးစၫ်ကံၫ်စီ(လူငယ်စွမ်းရည်မြင့်တင်ရေး)တၫ်မၤလိကၠိပျၫ်အမူးတၫ်ရဲၣ်တၫ်ကျဲၤအမူး၀ံၤ၀ဲအဂ့ၫ် ခ့ၣ်အဲၣ်ယူၣ်-မုၫ်တြီၫ်ပာ်ဖျါဃာ်၀ဲန့ၣ်လီၤ.
တၫ်မၤ၀ဲ တၫ်သူၣ်ထီၣ်န့ၫ် ကညီသးစၫ်ကံၫ်စီတၫ်မၤလိကၠိပျၫ်အမူးတၫ်ရဲၣ်တၫ်ကျဲၤအပူၤ တၫ်ကတိၤတဲဖျါထီၣ်က့ၤ၀ဲ တၫ်မၤလိဂ့ၫ်၀ီ, တၫ်ဟ့ၣ်လီၤက့ၤကၠိဖိလံာ်အုၣ်သး, တၫ်ဟ့ၣ်လီၤက့ၤ၀ဲခိၣ်ဖး, ကမံးတံာ်တၫ်ကတိၤစံးဘျုး, တၫ်မၤလိဖိအကျါ(၂)ဂၤအတၫ်ကတိၤဒီး ခိၣ်နၫ်အတၫ်ကတိၤဟ့ၣ်ဂံၫ်ဟ့ၣ်ဘါထုးစုနဲၣ်ကျဲတဖၣ် ပာ်ဃုာ်၀ဲအဂ့ၫ်ပာ်ဖျါဃာ်၀ဲန့ၣ်လီၤ.
တၫ်ရဲၣ်တၫ်ကျဲၤအပူၤ လီၫ်ခၢၣ်သးခိၣ်နၫ်ပဒိၣ်စီၤလၢၣ်နၢၣ်တဲ၀ဲလၢ “ပကညီသးစၫ်ကရၢခိၣ်နၫ်သ့ၣ်တဖၣ်လၢ ပတၫ်ဂဲၤလိာ်လၢဆၢကတီၫ်ခဲအံၤ ဒီးပကွၫ်က့ၤဒီတကတီၫ်သုကမၤလိဘၣ်စ့ၫ်ကီးလံာ် လၢကညီတၫ်စံၣ်စိၤတဲစိၤအပူၤစ့ၫ်ကီးန့ၣ်ဒီး ပပှၤကလုာ်ဒီတကတီၫ်အတူၫ်ဘၣ်၀ဲတၫ်ဆီၣ်တံၫ်မၤနၢၤ တၫ်ဆူးသွံၣ်အီၣ်ညၣ်ဒီး တၫ်ခွဲးတၫ်ယာ်လၢ ပလိၣ်ဘၣ်န့ၣ်တအိၣ်ဘၣ်. လၢတၫ်၀ဲန့ၣ်အဃိ ဒ်သိးဒီးပကဲပှၤကညီဒီကလုာ် ပကလဲၤထီၣ်လဲၤထီထီၣ်ဒီး အီၣ်ကုာ်အီပှဲၤဒီး ကအိၣ်ဒီးတၫ်ခွဲးတၫ်ယာ်လၢပှဲၤအဂီၫ် ပမိၫ်ပၫ်ဖံဖုလၢပျၢၤတဖၣ်ဂဲၤလိာ်တ့ၫ်တၫ်ဒီး တၫ်အိးထီၣ် (KNU) ကညီဒီကလုာ်စၢဖှိၣ်ကရၢ, ဒီးကညီဒီကလုာ်တၫ်ထူၣ်ဖျဲးသုးမုၫ်ဒိၣ် (KNLA) စ့ၫ်ကီးဂဲၤလိာ်ဒီး တုၤဆၢကတီၫ်ခဲအံၤ မ့ၫ်ဒၣ်လၢပပှၤကညီတကလုာ်အဂီၫ် တကးဒံးဘၣ် ထံကီၫ်ဒီတဘ့ၣ်တၫ်မုာ်တၫ်ခုၣ်ကအိၣ်အဂီၫ် ကအိၣ်စ့ၫ်ကီးဂဲၤလိာ်၀ဲဒၣ်န့ၣ်လီၤ.
လၢန့ၣ်အမဲာ်ညါ ကီၫ်ရ့ၣ်မုၫ်တြီၫ် ပှၤတဲတၫ်ပၢ သုးခိၣ်ဒိၣ်ဂီၫ်ဂ့ၫ် စီၤကျၢၤဒိၣ်စ့ၫ်ကီး တဲ၀ဲလၢ “သုမ့ၫ်ပှၤသးစၫ်တဖၣ်လၢ တူၫ်ခီၣ်ပာ်သးလၢခါဆူမဲာ်ညါဟံထီၣ်ဖီၣ်ထီၣ်က့ၤ ပှၤကလုာ်တၫ်ဖံးတၫ်မၤဒီး ဟ့ၣ်လီၤသးဒီး မၤလဲၤထီၣ်လဲၤထီက့ၤပှၤကလုာ်အဃိန့ၣ် စံးဘျုးဘၣ်က့ၤသုးကိးဂၤဒဲးလီၤ. ပမ့ၫ်ကညီတကလုာ်လၢ တၫ်ထၢဖှိၣ်အီၤလၢ ကညီဒီကလုာ်စၢဖှိၣ်ကရၢဒီး ပကဲထီၣ်ကညီဒီကလုာ်စၢဖှိၣ်ကရၢ မ့ၫ်ကရၢတကရၢလၢ အတီခိၣ်ရိၣ်မဲပှၤကညီထံရူၫ်ကီၫ်သဲးကတုၤလၢ တၫ်ပညိၣ်ဖီတၢၣ်အဂီၫ်န့ၣ် အ၀ဲသ့ၣ်တီခိၣ်ရိၣ်မဲဒီး တကတီၫ်ဃီ အ၀ဲသ့ၣ်ပာ်လီၤ၀ဲတၫ်ဖံးတၫ်မၤသ့ၣ်တဖၣ်လၢ အမ့ၫ်တၫ်ပၢတၫ်ပြးတၫ်ဖံးတၫ်မၤအိၣ်ဃုာ်၀ဲဒၣ်ဒီး တၫ်ပၢတၫ်ပြးတၫ်ဖံးတၫ်မၤတဘျီဃီန့ၣ်လီၤ.
တၫ်သူၣ်ထီၣ်န့ၫ် သးစၫ်ကံၫ်စီတၫ်မၤလိတၫ်ရဲၣ်တၫ်ကျဲၤအံၤ တၫ်စးထီၣ်အီၤဖဲ ၂၀၂၄နံၣ်, လါယနူၤအါရံၤ(၈)သီတုၤ လါမးၡး(၁၁)သီအနံၤန့ၣ်လီၤ. တၫ်မၤ၀ဲတၫ်မၤလိကၠိပျၫ် တၫ်ရဲၣ်တၫ်ကျဲၤမူးအပူၤ လီၫ်ခၢၣ်သးခိၣ်နၫ်, ကီၫ်ရ့ၣ်ခိၣ်နၫ်ဒီး ၀ဲၤကျိၤ၀ဲၤဒ့ခိၣ်နၫ်တဖၣ်ပာ်ဃုာ် ပှၤခဲလၢာ်ပာ်ဖှိၣ်(၃၇)ဂၤဟဲထီၣ်၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
photo:knu-mutraw
