လါဖ့ၤဘြူၤအါရံၤ ၂၇သီႇ ၂၀၂၄နံၣ်
တၫ်ဒုးလၢကဲထီၣ်ဒီး ရၢၡၢၣ်(ရုရှား)န့ၣ် ယူၣ်ကရ့(ယူကရိန်း)တကပၤ ကမၤနၢၤတၫ်အဂ့ၫ် ယူၣ်ကရ့ကီၫ်ခိၣ် ဘိၣ်လိၣ်ဒံၣ်မၣ် စလၣ်စကံၣ် (Volodymyr Zelensky) တဲလီၤ၀ဲ ဖဲလါဖ့ၤဘြူၤအါရံၣ်(၂၄)သီအနံၤ ဖဲယူၣ်ကရ့ – ရၢၡၢၣ် တၫ်ဒုးၦဲၤထီၣ်(၂)နံၣ် အဆၢကတီၫ်အဂ့ၫ် ဘံၣ်ဘံၣ်စံၣ် တၫ်ကစီၣ်သန့ ပာ်ဖျါ၀ဲန့ၣ်လီၤ.
ပ၀ဲတဖၣ် ပတပျဲလၢၦၤနီတဂၤ ကမၤကတၢၫ်ကွံာ် ယူၣ်ကရ့ဘၣ်အဂ့ၫ် စလၣ်စကံၣ်( Zelensky) တဲလီၤ၀ဲ ဖဲ၀့ၫ်ကံးယဲး(Kyiv) အတၫ်ကတိၤလီၤအပူၤန့ၣ်လီၤ.
စလၣ်စကံၣ်(Zelensky) ကတိၤလီၤတၫ်အကတီၫ် လၢတၫ်ပာ်ဖျါထီၣ်တၫ်အိၣ်ဆၢထၢၣ်ဃုာ်ဒီးအီၤန့ၣ် မုၫ်နုာ်ထံကီၫ်ခိၣ်နၫ်တဖၣ် ဟဲပာ်ဖှိၣ်ထံၣ်လိာ်အသး ဖဲ၀့ၫ်ကံးယဲး(Kyiv)န့ၣ်လီၤ. တအဲၣ်ဒိးလၢၦၤပတီၫ်မုၫ်နီတဂၤ ကမၤကတၢၫ်ကွံာ်တၫ်ဒုးဘၣ်အဂ့ၫ်, ထဲယူၣ်ကရ့ အတၫ်ပာ်ပနီၣ်ဧိၤလီၤ မၤကတၢၫ်ကွံာ်တၫ်ဒုးသ့အဂ့ၫ် ဖဲလါဖ့ၤဘြူၤအါရံၣ်(၂၄)သီအနံၤ အတၫ်ကတိၤလီၤအပူၤ ဖၢနုာ်တဲဃုာ်၀ဲလီၤ.
ပဒုးတၫ်လၢတၫ်အံၤအဂီၫ်န့ၣ်လီၤ. ပဟ့ၣ်လီၤပသးသမူ၀ံၤ လၢအသီ(၇၃၀)အတီၫ်ပူၤ ပဒုးတ့ၫ်လံလီၤ. ပတၫ်အိၣ်မူအမုၫ်နံၤလၢအဂ့ၤကတၢၫ်တနံၤန့ၣ် မ့ၫ်ပကမၤနၢၤတၫ်လီၤအဂ့ၫ် အ၀ဲတဲ၀ဲန့ၣ်လီၤ.
ဖဲစလၣ်စကံၣ်ကတိၤလီၤတၫ်အကတီၫ် အံၣ်တလံၣ်(အီတလီ), ဘဲၣ်ကၠံၣ်ယၣ်(ဘယ်လ်ဂျီယံ)ဒီး ခဲနဒၣ်(ကနေဒါ) ခိၣ်နၫ်တဖၣ် ပာ်ဃုာ် ယူရပၤခီၣ်မံးၡၢၣ်ၦၤပၢၤလီၫ်ဆ့ၣ်နီၤ(ဥရောပကော်မၡင်ဥက္ကဋ္ဌ) အၣ်ဆူၣ်လၣ် ဘိၣ်ဒၣ်လံၣ်ယၣ်(အာဆူလာ ဗွန် ဒါလီယန်)တဖၣ် ဟဲဆူ၀့ၫ်ကံးယဲး(Kyiv)ဒီးအိၣ်ဆၢထၢၣ်ဃုာ်ဒီးအီၤန့ၣ်လီၤ.
စလၣ်စကံၣ်ဒီး မုၫ်နုာ်ထံကီၫ်ခိၣ်နၫ်တဖၣ်န့ၣ် တၫ်ဒုးအပူၤ ယူၣ်ကရ့ထံဖိကီၫ်ဖိလၢ ဘၣ်သံတဖၣ်အဂီၫ် ပာ်လီၤန့ၫ်၀ဲတၫ်သးအုးဖီကွီၤတဖၣ်န့ၣ်လီၤ.
အပူၤကွံာ်နံၣ် လၢတၫ်ပာ်လီၤတၫ်သးအုးဖီကွီၤတၫ်ရဲၣ်တၫ်ကျဲၤမူး ဒ်သိးအံၤအပူၤ အမဲရကၤကီၫ်ခိၣ်ကၠိဘဲၣ်တၣ် (အမေရိကန်သမ္မတ ဂျိုးဘိုင်ဒန်) ဟဲထီၣ်၀ဲဘၣ်ဆၣ်သနာ်က့ လၢတနံၣ်အံၤ အမဲရကၤခိၣ်နၫ်ဒိၣ်ထီခၢၣ်စး(အမေရိကန်အစိုးရ ထိပ်သီးကိုယ်စားလှယ်)တဖၣ် ဟဲထီၣ်၀ဲတအိၣ်ဘၣ်.
ဖဲမုၫ်နံၤ၀ဲန့ၣ်၀ံၤအလီၫ်ခံ ခဲနဒၣ်, အံၣ်တလံၣ်, အဲကလံး(ဗြိတိန်) ဒီး အမဲရကၤထံကီၫ်တဖၣ် လၢပာ်ဃုာ်လၢ စဲးဖီကဟၣ်ထံကီၫ်ဖးဒိၣ်(G-7)ကရၢတဖၣ်အံၤ လၢတၫ်ကဆီၣ်ထွဲမၤစၢၤကဒီး ယူၣ်ကရ့အဂီၫ်ဒီး ရၢၡၢၣ်အဖီခိၣ် တၫ်ကးတံာ်ကွံာ်တဖၣ် ကပာ်လီၤ၀ဲအဂီၫ် ဖဲမၤတၫ်အိၣ်ဖှိၣ်လၢကွဲၤဟူဖျါတဆီအကတီၫ် အၢၣ်လီၤသကိး၀ဲန့ၣ်လီၤ.
ref:bbc
photo:19fortyfive
