တၫ်ထီဒါအကျါ ၦၤကီၫ်ပယီၤအဂီၫ် ကၠီၣ်တဲၣ်ကဟ့ၣ်ဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤတၫ်ရဲၣ်တၫ်ကျဲၤ(လူသားချင်း စာနာထောက်ထားမှုအကူအညီပေးရေးအစီအစဉ်)

လါဖ့ၤဘြူၤအါရံၤ ၂၇သီႇ ၂၀၂၄နံၣ်

ကၠီၣ်တဲၣ်ပဒိၣ် လၢတၫ်ကဟ့ၣ်ၦၤကီၫ်ပယီၤ ဘၣ်ကီဘၣ်ခဲဖိလၢဘၣ်ဃ့ၫ်သုး(မြန်မာစစ်ရှောင်ဒုက္ခသည်)တဖၣ်အဂီၫ် ဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤတၫ်ရဲၣ်တၫ်ကျဲၤ(လူသားချင်း စာနာထောက်ထားမှုအကူအညီပေးရေးအစီအစဉ်)န့ၣ် ကစးထီၣ်မၤ၀ဲဖဲလါမးၡ်အပူၤန့ၣ် ကၠီၣ်တဲၣ်ဘၣ်မူဘၣ်ဒါတဖၣ် တဲ၀ဲအဂ့ၫ် ဘံၣ်ဘံၣ်စံၣ်တၫ်ကစီၣ်သန့ပာ်ဖျါ၀ဲလီၤ.

ၦၤကီၫ်ပယီၤဘၣ်ကီဘၣ်ခဲဖိ လၢအကလီၫ် လၢဟဲအိၣ်ကဒုဖဲ ကီၫ်ကၠီၣ်တဲၣ်, တးခ်ကီၫ်ရ့ၣ်(တာ့ခ်ခရိုင်)အပူၤတဖၣ် ကၠီၣ်တဲၣ်ဘၣ်မူဘၣ်ဒါတကပၤ ဂုၫ်ကျဲးစၢး၀ဲလၢကဒုးအိၣ်ထီၣ် တၫ်ဟ့ၣ်ဟီၣ်ခိၣ်ဖိတၫ်မၤစၢၤတၫ်ရဲၣ်တၫ်ကျဲၤ(လူသားချင်း စာနာထောက်ထားမှုအကူအညီပေးရေးအစီအစဉ်)ဘၣ်ဆၣ် ဘၣ်ကွၫ်ဆၢၣ်မဲာ်ဒီး တၫ်ပၢၫ်ဆၢဂံၫ်ဘါကရၢ(တော်လှန်ရေးအင်အားစု)တဖၣ် အတၫ်ပာ်ဒ့ၣ်ပာ်ကမၣ်လီၤ.

တၫ်ရဲၣ်တၫ်ကျဲၤအံၤ ထံကီၫ်ခံဘ့ၣ် တၫ်ပနီၣ်ဂီၤကရၢ(ကြက်ခြေနီအသင်း)တဖၣ် ပာ်ဖှိၣ်မၤသကိးတၫ်အဃိ တၫ်လၢကီၫ်ပယီၤတၫ်ပနီၣ်ဂီၤကရၢ(ကြက်ခြေနီအသင်း)န့ၣ် အိၣ်ဒီးတၫ်ရ့လိာ်ဘၣ်ထွဲဒီး သုးကီၣ်ကး(စစ်ကောင်စီ)အဃိ ဒီကလုာ်ဃူဖိးပဒိၣ်(အမျိုးသား ညီညွတ်ရေးအစိုးရ-NUG)တကးဘၣ် ကလုာ်ဒူၣ်တၫ်ပၢၫ်ဆၢကရၢ(တိုင်းရင်းသားလက်နက်ကိုင်အဖွဲ့)တဖၣ်ဒီးကမျၢၫ်တၫ်ကရၢကရိ(အရပ်ဖက်အဖွဲ့)တဖၣ် ဘၣ်ထီဒါ၀ဲဒ်သိးအံၤန့ၣ်လီၤ.

ပဃ့ထီၣ်တ့ၫ်လီၤ. ဘၣ်ဆၣ်ၦၤတဒိကနၣ်၀ဲဘၣ်. ပတဒိးန့ၫ်တၫ်စံးဆၢလၢၦၤနီတဂၤအိၣ်ဘၣ်. တၫ်အံၤမၤကဒီး၀ဲလံ. တဲ၀ဲလၢကဒုးအိၣ်ထီၣ်၀ဲ အမိၫ်လံၤမိၫ်ၦၫ်(အကောင်အထည်ဖော်)ဘၣ်ဆၣ် လၢခံနံၣ်ဘျဲၣ်သၢနံၣ် တၫ်အိၣ်သးအံၤ ဆီတလဲအသးခဲလၢာ်လံအဂ့ၫ် KNU ၦၤတဲတၫ်ပၢ(ပြောခွင့်ရ)ပဒိၣ်စီၤတီနံတဲ၀ဲန့ၣ်လီၤ.

ကတီၫ်အံၤတၫ်အိၣ်သးန့ၣ် ဟီၣ်က၀ီၤအါတက့ၫ်န့ၣ် တၫ်ပၢၫ်ဆၢဂံၫ်ဘါကရၢ(တော်လှန်ရေးအင်အားစု)တဖၣ်ပၢဆှၢဃာ်၀ံၤ လၢဟီၣ်က၀ီၤ၀ဲန့ၣ်တဖၣ်အပူၤ ၦၤလၢဟဲဃ့ၫ်အိၣ်ကဒု(ခိုလှုံ)တဖၣ် တၫ်ကဟ့ၣ်အီၤ ဂ့ၫ်ဂီၫ်အူတၫ်မၤစၢၤ(အရေးပေါ်အကူအညီ)အဂီၫ် ကၠီၣ်တဲၣ်ကပာ်ဖှိၣ်မၤသကိးတၫ်ဒီး သုးကီၣ်ကး(စစ်ကောင်စီ)အံၤန့ၣ် မ့ၫ်တၫ်လၢကမၣ်၀ဲအဂ့ၫ် KNU တကပၤတဲပာ်ဂၢၫ်ပာ်ကျၢၤ၀ဲလီၤ.

လၢကီၫ်ဆၢဒီတကျိၤအပူၤ လၢတၫ်မၤစၢၤၦၤဘၣ်ကီဘၣ်ခဲဖိအဂီၫ် မၤတ့ၫ်၀ဲယံာ်(၂၆)နံၣ်လၢအမ့ၫ် ကညီကီၫ်ပူၤ ၦၤလီၫ်အိၣ်ကမှံဖိကမံးတံာ်(ကရင်ပြည်တွင်း နေရပ်စွန့်ခွာသူများကော်မတီ) (CIDKP) ၦၤနဲၣ်တၫ်ခံ စီၤခဲလံၣ်တဲ၀ဲလၢ တၫ်မၤစၢၤတဖၣ် တၫ်ဟ့ၣ်တၫ်မၤစၢၤတုၤလီၤတီၤလီၤကန့ၫ်အဂီၫ် မ့ၫ်ပာ်ဖှိၣ်မၤသကိးတၫ်ဒီး ကမျၢၫ်တၫ်ကရၢကရိ(CBO/CSO)တဖၣ်န့ၣ်မ့ၫ်တၫ်လၢအဂ့ၤလီၤ. မ့ၫ်မၤသကိးတၫ်လၢ ကရၢလၢတၫ်လဲၤခီဖျိတအိၣ်ဘၣ်တဖၣ်တခီ တမ့ၫ်ကနၫ်ပၢၫ်တၫ်အိၣ်သး လီၤတံၫ်လီၤဆဲးဘၣ်အဂ့ၫ်န့ၣ်လီၤ.

ကီၫ်ကၠီၣ်တဲၣ်တကပၤတခီ တဲ၀ဲလၢ တၫ်အံၤ မ့ၫ်တၫ်ဟ့ၣ်ဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤတၫ်ရဲၣ်တၫ်ကျဲၤ(လူသားချင်း စာနာထောက်ထားမှုအကူအညီပေးရေးအစီအစဉ်)လၢ တဘၣ်ထွဲလိာ်သးဒီးထံရူၫ်ကီၫ်သဲးဘၣ်န့ၣ်လီၤ.

ref:bbc
photo:gofundme