လါဖ့ၤဘြူၤအါရံၤ ၂၇သီႇ ၂၀၂၄နံၣ်
စးထီၣ် ဖဲ၂၀၂၁နံၣ်, လါဖ့ၤဘြူၤအါရံၤ(၁)သီ, သုးဟံးန့ၫ်ဆူၣ်ထံကီၫ်တၫ်စိတၫ်ကမီၤဒီး တုၤလီၤလၢ ၂၀၂၄နံၣ်, လါယနူၤအါရံၤ(၂၆)သီအနံၤ ခီဖျိလၢသုးကီၣ်ကး ပညိၣ်ခးကျိဖးဒိၣ်တဖၣ်ဒီး ဟဲတ့ၫ်လီၤမ့ၣ်ပိၫ်လၢကဘီယူၤတဖၣ်အဃိ ပိာ်မုၣ်ခဲလၢာ် (၇၅၄)ဂၤသံ၀ဲအဂ့ၫ် (Burmese Women’s Union) BWU ပာ်ဖျါဃာ်၀ဲ ဖဲလါဖ့ၤဘြူၤအါရံၤ(၁)သီအနံၤန့ၣ်လီၤ.
တုၤလၢ လါယနူၤအါရံၤ(၂၆)သီအနံၤ, ပိာ်မုၣ်လၢ သုးကီၣ်ကး ဖီၣ်န့ၫ်ဆူၣ်ဃာ် အိၣ်၀ဲ(၃,၂၉၉)ဂၤဒီး ဖဲအကျါ ပိာ်မုၣ်(၇၆၉)ဂၤန့ၣ် ဘၣ်တၫ်ပာ်လီၤတၫ်ကမၣ်န့ၣ်လီၤ. ဒီးစးထီၣ်ဖဲ ၂၀၂၁နံၣ်, လါဖ့ၤဘြူၤအါရံၤ(၁)သီ, တုၤလၢ လါယနူၤအါရံၤ(၂၆)သီအနံၤ, ပိာ်မုၣ်(၁၀)ဂၤ သုးကီၣ်ကး ပဲာ်အၢပဲာ်သီဒီး ဖီၣ်န့ၫ်ဆူၣ်ဃာ်၀ဲ ခီဖျိလၢအ၀ဲသ့ၣ်ပှၤတ၀ၢလံာ်ကပျံးပၤပူၤ ကွဲးဖျါထီၣ်၀ဲတၫ်ကစီၣ်အကမၣ်တဖၣ်(သတင်းအမှားများ)ဒီး တၫ်ဟ့ၣ်ဆီၣ်ထွဲတၫ်ပၢၫ်ဆၢကရူၫ်ကရၢတဖၣ် အဂ့ၫ်န့ၣ်လီၤ.
ပှၤလၢသုးကီၣ်ကး ပဲာ်အၢပဲာ်သီဒီး ဖီၣ်န့ၫ်ဆူၣ်ဃာ်တဖၣ်အံၤအိၣ်၀ဲဒၣ် ဖဲ၀့ၫ်တကူၣ်ကီၫ်ခီ, မါတလ့ကီၫ်ခီ, မကွ့ကီၫ်ခီ, တနီသရံၣ်ကီၫ်ခီ, ယိၤဒိၣ်ကီၫ်စဲၣ်(ရှမ်းပြည်နယ်) ဒီး တလၢၤကီၫ်စဲၣ်(မွန်ပြည်နယ်)တဖၣ်အဂ့ၫ် ပာ်ဖျါဃာ်၀ဲန့ၣ်လီၤ. စးထီၣ်လၢ ၂၀၂၄နံၣ်, လါယနူၤအါရံၤ(၁)သီဒီး တုၤလီၤလၢ(၂၆)သီအနံၤ, ခီဖျိလၢသုးကီၣ်ကး ပညိၣ်ခးကမျၢၫ်အိၣ်ဟံၣ်တဖၣ်အဃိ ပိာ်မုၣ်သံ၀ဲ(၂၈)ဂၤ, သုးကီၣ်ကး ဟဲတ့ၫ်လီၤမ့ၣ်ပိၫ်လၢကလံၤကျါအဃိ ပိာ်မုၣ်သံ၀ဲ(၂၁)ဂၤ, သုးကီၣ်ကး အသုးခးသံကွံာ်အီၤအဃိသံ၀ဲ(၇)ဂၤ, သုးကီၣ်ကး ဖီၣ်န့ၫ်ဆူၣ်ကတီၫ် မၤဆူၣ်မၤဆါ၀ဲအဃိသံ၀ဲ(၂)ဂၤ ဒီးအဂၤ(၁)ဂၤတခီ သုးကီၣ်ကး ဖီၣ်န့ၫ်ဆူၣ်ကတီၫ် သံ၀ဲ၀ံၤ တၫ်ဒွဲၣ်အူကွံာ်ဃာ်အီၤအဃိ လါယနူၤအါရံၤ, (၂၅)သီအတီၫ်ပူၤ ပိာ်မုၣ်ခဲလၢာ်(၅၉)ဂၤ သံ၀ဲန့ၣ်လီၤ.
ကီၫ်ပယီၤဒီတဘ့ၣ် စကဲကီၫ်ခီ(စစ်ကိုင်းတိုင်း)ပူၤ ပိာ်မုၣ်(၂၁)ဂၤသံ၀ဲအဃိ မ့ၫ်အအါကတၢၫ်ဒီး မ့မ့ၫ်လၢ ရၢၫ်ခၢၣ်ကီၣ်စဲၣ်(ရခိုင်ပြည်နယ်)ပူၤတခီ ပိာ်မုၣ်သံ၀ဲ(၁၅)ဒီး မ့ၫ်ပိာ်မုၣ်သံအအါကတၢၫ်ကီၫ်စဲၣ်တဘ့ၣ်အဂ့ၫ် BWU ပာ်ဖျါဃာ်၀ဲန့ၣ်လီၤ.
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ(၃)နံၣ်ဘျဲၣ်အတီၫ်ပူၤ သုးကီၣ်ကးအသုးဒီး တၫ်ဘံၣ်တၫ်ဘၢသုးတဖၣ်(လုံခြုံရေးတပ်ဖွဲ့ဝင်များ)အဃိ ပှၤခဲလၢာ် (၄,၄၇၄)ဂၤသံ၀ဲ၀ံၤ ဖဲအကျါ ဖိသၣ်လၢသးနံၣ်အိၣ်(၁၈)နံၣ် ဆူအဖီလာ်(၅၄၈)ဂၤ ပာ်ဃုာ်၀ဲအဂ့ၫ် တၫ်သ့ၣ်ညါဘၣ်လၢ တၫ်မၤစၢၤထံရူၫ်ကီၫ်သဲးပှၤလီၤဃိၣ်ဖိကရၢ(နိုင်ငံရေးအကျဉ်းသားများကူညီစောင့်ရှောက်ရေးအသင်း) (AAPP) အတၫ်ထုးထီၣ်ပာ်ဖျါအပူၤန့ၣ်လီၤ.
photo:theirrawaddy
