ဖဲ လါဖ့ၤဘြူၤအါရံၤ(၁၉)သီအနံၤ, ဂီၤ(၆)နၣ်ရံၣ်ဃၣ်ဃၣ်အဆၢကတီၫ် ကမျၢၫ်သိလ့ၣ်ကျိၤလၢ ကက့ၤတီၣ်တၫ်ဖိတၫ်လံၤလၢ ဆံၣ်ဆဲၣ်၀့ၫ်(ဆီဆိုင်မြို့)တဖၣ် သုးကီၣ်ကး ပညိၣ်ခးအီၤလၢ ကျိဖးဒိၣ်ဒီးဒရိတဖၣ်အဃိ ကမျၢၫ်(၇)ဂၤ သံ၀ဲအဂ့ၫ် PNLA ပာ်ဖျါဃာ်၀ဲ ဖဲတနံၤအံၤန့ၣ်လီၤ.
ကမျၢၫ်သိလ့ၣ်ကျိၤလၢ ဟဲက့ၤတီၣ်တၫ်ဖိတၫ်လံၤအံၤ ဘူးဟဲက့ၤတုၤ၀ဲဒၣ်ဖဲ ၀ါတီသ၀ီ(ဝါးတောရွာ)လၢ အိၣ်ဘူးလိာ်သးဒီး၀့ၫ်ဆံၣ်ဆဲၣ် အကတီၫ် သုးကီၣ်ကး ခးလီၤ၀ဲဒၣ်လၢ ကျိဖးဒိၣ်ဒီး ဒရိ(ဒရုန်း)တဖၣ်န့ၣ်လီၤ. သုးကီၣ်ကး ပညိၣ်ခးကမျၢၫ်သိလ့ၣ်ကျိၤအဃိ ကမျၢၫ်(၇)ဂၤကျိဖးဒိၣ်ဘၣ်ဒီးသံ၀ဲ၀ံၤ ၦၤလၢအဘၣ်ဒိဘၣ်ထံးတဖၣ်စ့ၫ်ကီးအိၣ်၀ဲအဂ့ၫ် ပာ်ဖျါဃာ်၀ဲန့ၣ်လီၤ.
သုးကီၣ်ကးအံၤ ပာ်ပနီၣ်၀ဲလီၫ်က၀ီၤကမျၢၫ်တဖၣ် ဒ်ဒုၣ်ဒါအသိး၀ံၤ ဒုးမၤသံအီၤ၀ံၤ မၤကမၣ်၀ဲသုးကွီၫ်မ့ၣ်(စစ်ရာဇဝတ်မှု)ဒီး ၦၤဟီၣ်ခိၣ်ခွဲးယာ်(လူ့အခွင့်အရေး)တဖၣ် ဖျိဖျိဖျါဖျါလီၤအဂ့ၫ် တဲ၀ဲန့ၣ်လီၤ.
ထံဖိကီၫ်ဖိကမျၢၫ်တဖၣ်စ့ၫ်ကီး သုတနာ်န့ၫ်လၢ တၫ်ကစီၣ်အယီၣ်အဘျၣ်၀ံၤ တဘၣ်က့ၤတီၣ်တၫ်ဖိတၫ်လံၤလၢ ၀့ၫ်ပူၤဘၣ်ဒီး မ့မ့ၫ်တခီ တၫ်ကအိၣ်ခိးကွၫ်တၫ်ကစီၣ်အမ့ၫ်အတီလၢ ပအိးဒီကလုာ်တၫ်ထူၣ်ဖျဲးသုးမုၫ်ဒိၣ်(ပအိုဝ်းအမျိုးသားလွတ်မြောက်ရေးတပ်မတော်)(PNLA)ထုးထီၣ်ပာ်ဖျါ တၫ်ကစီၣ်တဖၣ်အဂ့ၫ် ဟ့ၣ်ဆီၣ်တခူထီၣ်ဃာ်၀ဲန့ၣ်လီၤ.
လၢန့ၣ်အမဲာ်ညါ ဖဲလါဖ့ၤဘြူၤအါရံၤ(၁၉)သီအနံၤ, တသီဃီကတီၫ်ပူၤ သုးကီၣ်ကးအကဘီယူၤ(၃)ခိၣ် ဟဲတ့ၫ်လီၤမ့ၣ်ပိၫ်ဖဲ ဆဲးခီၣ်မုၫ်ထီၣ်တပၤ(ဆိုက်ခေါင်အၡေ့ဘက်) တၫ်လီၫ်တဖၣ်န့ၣ်လီၤ. ဒ်န့ၣ်အသိး သုးကီၣ်ကးအသုး ခးလီၤကျိးဖးဒိၣ် ဖဲဟိၣ်ပိကီၫ်ဆၣ်(ဟိုပုံးမြို့နယ်), မဲနဲၣ်တီၣ်ဟီၣ်က၀ီၤ(မဲနယ်တောင်ဒေသ)ပူၤ အဘျီ(၆၀)ဘျဲၣ်အဂ့ၫ် PNLA ပာ်ဖျါဃာ်၀ဲန့ၣ်လီၤ.
photo:PNLA
