ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ဒူပျာ်ယာ်ကီၫ်ရ့ၣ်, ကီးတရံး၀့ၫ်ပူၤ တၫ်ဒုးကဲထီၣ်သး ကိးမုၫ်နံၤဃၣ်ဃၣ်အဃိ ကီးတရံး၀့ၫ်ကမျၢၫ်တဖၣ်ဒီး လီၫ်က၀ီၤကမျၢၫ်တဖၣ် ဘၣ်ဃ့ၫ်ပူၤဖျဲးသးလၢ တၫ်လီၫ်လၢအပူၤသးအဂ့ၫ် ပှၤလၢအမၤစၢၤတၫ်ဖဲန့ၣ်တဂၤ တဲ၀ဲန့ၣ်လီၤ.
“ပှၤဃ့ၫ်သုးပှၤလီၫ်အိၣ်ကမှံန့ၣ်အိၣ်အါအါဂီၫ်ဂီၫ်လီၤ. တယာ်တဘၣ်ဘၣ်. ပှၤလီၫ်အိၣ်ကမှံဖိတဖၣ်အိၣ်၀ဲ စးထီၣ်လၢ ကီးတရံး၀့ၫ် ဒီးတုၤလၢ မံနအးလီၤ. လိၣ်ဘၣ်တၫ်မၤစၢၤ, လိၣ်ဘၣ်တၫ်အီၣ်တၫ်အီ, ထံ ဒီး တၫ်မၢၤစၢၤအဂုၤအဂၤတဖၣ်လီၤ. တကးဘၣ် ပှၤဃ့ၫ်သုးပှၤလီၫ်အိၣ်ကမှံဖိတဖၣ် က့ၤဆူအနီၫ်ကစၫ် တၫ်အိၣ်ဆိးလီၫ်ကျဲတဘူၣ်ဒံးဘၣ်အဂ့ၫ်“ ပှၤလၢအမၤစၢၤ ပှၤဃ့ၫ်သုးပှၤလီၫ်အိၣ်ကမှံဖိတဂၤ တဲ၀ဲန့ၣ်လီၤ.
ပှၤဃ့ၫ်သုးပှၤလီၫ်အိၣ်ကမှံဖိတဖၣ်အံၤ လဲၤအိၣ်ကဒုအသးလၢပှၫ်ပူၤအိၣ်အသိး တနီၤန့ၣ် လဲၤအိၣ်လၢ အဘူးအတံၫ်တဖၣ်အအိၣ်လီၤ. မ့မ့ၫ်သ၀ီတနီၤအိၣ်၀ဲသ့ဒံးအဃိ ပှၤလၢအလဲၤအိၣ်သ၀ီဖဲန့ၣ်တဖၣ်စ့ၫ်ကီးအိၣ်၀ဲန့ၣ်လီၤ. မ့မ့ၫ်လၢ ပှၤဃ့ၫ်သုးပှၤလီၫ်အိၣ်ကမှံဒဲက၀ီၤ လီၤလီၤဆီဆီတခီ တအိၣ်၀ဲဘၣ်အဂ့ၫ် အ၀ဲတဲ၀ဲန့ၣ်လီၤ.
ပှၤလၢအမၤစၢၤ ပှၤဃ့ၫ်သုးပှၤလီၫ်အိၣ်ကမှံဖိတဂၤ တဲ၀ဲလၢ “ကတီၫ်ခဲအံၤ ပှၤဃ့ၫ်သုးပှၤလီၫ်အိၣ်ကမှံတဖၣ်အဂီၫ် ယနီၫ်ကစၫ်ဒၣ်၀ဲပာ်ဖှိၣ်ထီၣ်အသးဒီး သမူသကိးတဖၣ်၀ံၤ မၤစၢၤ၀ဲလီၤ. တၫ်ကရၢကရိအဂုၤအဂၤတဖၣ်စ့ၫ်ကီး မၤစၢၤ၀ဲအိၣ်ဒီး မ့မ့ၫ်တၫ်ကရၢကရိဖဲလဲၣ်တဖုတခီ တသ့ၣ်ညါလီၤတံၫ်ဘၣ်အဂ့ၫ်“ န့ၣ်လီၤ.
ခ့ၣ်အဲၣ်ယူၣ်-ဒူပျာ်ယာ်ကီၫ်ရ့ၣ်, ကီးတရံးကီၫ်ဆၣ်ဒီတဘ့ၣ်အပူၤ ကီးတရံးလီၫ်က၀ီၤကမျၢၫ်(၃)ကလးဘျဲၣ် ဘၣ်ပာ်တ့ၫ်ဟံၣ်ဃီဘၣ်ဃ့ၫ်ပူၤဖျဲးသး၀ံၤ ပှၤဃ့ၫ်သုးပှၤလီၫ်အိၣ်ကမှံတဖၣ်အဂီၫ် လိၣ်ဘၣ် ပှၤဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤတဖၣ်(လူသားချင်း စာနာထောက်ထားမူအကူအညီ)အဂ့ၫ် ခ့ၣ်အဲၣ်ယူၣ်-ဒူပျာ်ယာ်ကီၫ်ရ့ၣ် ပာ်ဖျါဃာ်၀ဲတၫ်ကစီၣ်န့ၣ်လီၤ.
photo:sawnaythar
