လၢစကဲကီၫ်ခီ(စစ်ကိုင်းတိုင်း) မိၣ်ယွၣ်(မုံရွာမြို့) ဖဲလါဖ့ၤဘြူၤအါရံၤ(၁၁)သီအနံၤ ၦၤလီၫ်က၀ီၤဖိအဂၤ(၅၀)ဃၣ်ဃၣ် သုးကီၣ်ကးအသုးက့ၤဖီၣ်၀ဲအဂ့ၫ် (RFA) တၫ်ကစီၣ်သန့ပာ်ဖျါ၀ဲလီၤ.
မိၣ်ယွၣ်၀့ၫ် မၠး၀တံၣ်က၀ီၤဒ့(မြဝတီရပ်ကွက်), ဖဲသ့းစၣ်ကျဲ(သစ္စာလမ်း)အပူၤ ၦၤလၢဆ့ၣ်နီၤအီလၣ်ဖးထံလၢကျးပူၤ ပာ်ဃုာ် အကပိာ်ကပၤ လီၫ်က၀ီၤဖိအဂၤ(၂၀)ဃၣ်ဃၣ် ဘၣ်တၫ်ဖီၣ်အီၤအသိး ဖဲစလိးတၫ်က၀ီၤ(ဇလုတ်အဝိုင်းပတ်)အကပၤ လီၫ်က၀ီၤဖိ (၈)ဂၤဃၣ်ဃၣ်ဒီး ဆ့ၣ်ဖၠူၣ်ၡ့ၣ်(ဆင်ဖြူၡင်)တိၤ တၫ်သမံသမိးတြဲၤအကပၤ ၦၤအဂၤ(၂၀)ဃၣ်ဃၣ်ဘၣ်တၫ်ဖီၣ်အီၤအဂ့ၫ် ပာ်ဖျါ၀ဲလီၤ.
စးထီၣ်ဖဲ လါဖ့ၤဘြူၤအါရံၣ်(၁၁)သီနံၤဂီၤခီ သုးကီၣ်ကးအသုးဖိတဖၣ် ကူသိးကမျၢၫ်တၫ်ကူတၫ်သိး၀ံၤ ဟးလူၤဖီၣ်တၫ်လၢ၀့ၫ်ပူၤအသိး အိၣ်ခူသူၣ်(ကင်းပုန်းဝပ်)ဒီး သမံသမိးတၫ်၀ံၤ က့ၤဖီၣ်ၦၤစ့ၫ်ကီးအိၣ်၀ဲအဂ့ၫ် လီၫ်က၀ီၤဖိတဖၣ် တဲ၀ဲန့ၣ်လီၤ.
ၦၤလၢဘၣ်တၫ်က့ၤဖီၣ်တဖၣ် မ့ၫ်သးနံၣ်(၁၈)နံၣ်ဒီး (၃၅)နံၣ်အဘၢၣ်စၢၤ ပိာ်မုၣ်ဒီးပိာ်ခွါတဖၣ်လီၤန့ၣ် ၦၤလၢအိၣ်ဖဲ မိၣ်ယွၣ်၀့ၫ် (မုံရွာမြို့ခံ)တဂၤ တဲ၀ဲအဂ့ၫ် ပာ်ဖျါ၀ဲလီၤ.
ဖဲ(၁၁)နံၤဂီၤအကတီၫ်န့ၣ် ဖီၣ်တၫ်လၢ၀့ၫ်ပူၤလီၤ. ၦၤလၢဘၣ်တၫ်ဖီၣ်အီၤအဂၤ(၅၀)ဃၣ်ဃၣ်ဒု တၫ်ပာ်ဂၢၫ်ပာ်ကျၢၤန့ၫ်၀ဲလီၤ. ဟးလူၤဖီၣ်တၫ်ခီဖျိလၢ ကူကၤကမျၢၫ်တၫ်ကူတၫ်ကၤ(အရပ်ဝတ်)လီၤ. ဂံၫ်ဘါတခီညီနုၫ် ပာ်လီၤဃာ်၀ဲၦဲၤဂၤၦဲၤဂၤတအိၣ်ဘၣ်. တၫ်လီၫ်တတီၤစုာ်စုာ် တၫ်တယာ်ပာ်လီၤဃာ်၀ဲအဂၤ(၄၀), (၅၀)ဆံ၀ံၤ သမံသမိး လူၤဖီၣ်တၫ်လီၤ. ၦၤလၢဘၣ်တၫ်ဖီၣ်အီၤတဖၣ်တခီ သးနံၣ်ကအိၣ်၀ဲဖဲ (၁၈)နံၣ်ဒီး (၃၅)နံၣ်အဘၢၣ်စၢၤ ပိာ်မုၣ်ဒီးပိာ်ခွါတဖၣ်လီၤ. ၦၤတနီၤဒု တၫ်ဃ့အီၤစ့၀ံၤ တၫ်ပျၫ်က့ၤအီၤအိၣ်၀ဲအဂ့ၫ်နၫ်ဟူ၀ဲလီၤ. တၫ်ဃ့စ့ထဲလဲၣ်တခီဒု တသ့ၣ်ညါ၀ဲဒံးဘၣ်အဂ့ၫ်တဲ၀ဲလီၤ.
တၫ်နၫ်ဟူလၢ လီၫ်က၀ီၤဖိတဖၣ် တၫ်လူၤဖီၣ်အီၤအိၣ်အဃိ ဖဲလါဖ့ၤဘြူၤအါရံၣ်(၁၂)သီအနံၤန့ၣ် လၢမိၣ်ယွၣ်၀့ၫ်ပူၤ မ့ၫ်တမ့ၫ်လၢဟးထီၣ်ၦ့ၤတၫ်ဘၣ်န့ၣ် ၀့ၫ်ပူၤၦၤဟးထီၣ်ဟးလီၤတအိၣ်ဘၣ်အဂ့ၫ် ၦၤလၢအိၣ်ဖဲ မိၣ်ယွၣ်၀့ၫ်အဂၤတဂၤတဲ၀ဲလီၤ. ၦၤလၢဘၣ်တၫ်ဖီၣ်အီၤတဖၣ်အံၤ ကဘၣ်ထွဲလိာ်အသးဒီး သုးကီၣ်ကး တၫ်ကဘၣ်ကဲသုးတၫ်ဘျၢ(ပြည်သူ့စစ်မှုထမ်း ဥပဒေ)အိၣ်အဂ့ၫ် တဲ၀ဲလီၤ.
ဖဲအပူၤကွံာ်စှၤသီအနံၤစ့ၫ်ကီး လၢစကဲကီၫ်ဆၣ်, လဲၣ်ကၠံသ၀ီ(လယ်ကြီးရွာ)အကပၤ မါတလ့(မန္တလေး)- မိၣ်ယွၣ်(မုံရွာ) သိလ့ၣ်ကျဲမုၫ်ခိၣ် ကမျၢၫ်လၢဟးထီၣ်ဟးလီၤအဂၤ(၄၀)ဃၣ်ဃၣ် သုးကီၣ်ကးအသုး တဲ၀ဲလၢကသမံသမိး၀ဲ၀ံၤ ဖီၣ်ဃာ်၀ဲအသိး တုၤလၢတနံၤအံၤ တၫ်တဒိးန့ၫ်တၫ်ကစီၣ်ဒံးဘၣ်အဂ့ၫ် လီၫ်က၀ီၤဖိတဖၣ်တဲ၀ဲလီၤ.
တၫ်မၤစၢၤထံရူၫ်ကီၫ်သဲးၦၤလီၤဃိၣ်ဖိကရၢ (နိုင်ငံရေး အကျဉ်းသားများ ကူညီစောင့်ၡောက်ရေးအသင်း) (AAPP)အတၫ်ပာ်ဖျါဖဲ လါဖ့ၤဘြူၤအါရံၣ်(၉)သီအနံၤန့ၣ် သုးဟံးန့ၫ်ဆူၣ် ထံကီၫ်တၫ်စိတၫ်ကမီၤ၀ံၤအလီၫ်ခံ ကမျၢၫ်, (၂၀,၀၇၁)ဂၤ သုးကီၣ်ကးဖီၣ်ဃာ်၀ဲ၀ံၤ လၢအကျါ ၦၤ(၈၇၇၆)ဂၤ ဘၣ်တၫ်ဒုးလီၤအီၤဃိၣ်န့ၣ်လီၤ.
ref:rfa
