ပလဲး၀းကီၫ်ဆၣ်(ပလက်ဝမြို့နယ်)ဒီး ကၠီးတီၣ်၀့ၫ်(ကျောက်တော်မြို့)လၢ ရခၢၣ်သုးမုၫ်ဒိၣ်(AA)ထီၣ်ဒုးမၤန့ၫ်၀ဲတဖၣ် သုးကီၣ်ကးလဲၤတ့ၫ်လီၤမ့ၣ်ပိၫ်လၢ ကလံၤကျါအဃိ တသီအတီၫ်ပူၤလီၫ်က၀ီၤကမျၢၫ်(၉)ဂၤသံ၀ဲ၀ံၤ တစှၤန့ၣ်(၁၁)ဂၤဘၣ်ဒိ၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
ရခၢၣ်ကီၫ်စဲၣ်ပူၤ သုးကီၣ်ကးလၢ တမၤနၢၤတၫ်ဒုးအံၤ ဟဲခးလီၤတၫ်လၢကလံၤကျါ ပာ်ဃုာ်ခးလီၤကျိဖးဒိၣ်တဖၣ်အဃိ ကတီၫ်အံၤစှၤသီအတီၫ်ပူၤ လီၫ်က၀ီၤကမျၢၫ်တဖၣ် တၫ်သံတၫ်ၦၫ်ဒီး ဘၣ်ဒိဘၣ်ထံးဟဲအိၣ်အါထီၣ်၀ဲအဂ့ၫ် လီၫ်က၀ီၤကမျၢၫ်တဖၣ် တဲ၀ဲန့ၣ်လီၤ.
ပလဲး၀း၀့ၫ်လၢ ရခၢၣ်သုးမုၫ်ဒိၣ် ပၢဆှၢရဲၣ်ကျဲၤဃာ်အပူၤ ဖဲလါဖ့ၤဘြူၤအါရံၤ(၁၁)သီအနံၤ, ဟါ(၅)နၣ်ရံၣ်ဃၣ်ဃၣ်အဆၢကတီၫ် သုးကီၣ်ကး ကဘီယူၤဒုးသုး(ဂျက်ဖိုက်တာ)(၁)ခိၣ် ဟဲတ့ၫ်လီၤမ့ၣ်ပိၫ်(၂)ဘျီဃၣ်ဃၣ်၀ံၤတကးဘၣ် ခးလီၤစ့ၫ်ကီး ကျိဆဲး(စက်သေနတ်)တဖၣ်အဂ့ၫ် တၫ်သ့ၣ်ညါဘၣ်န့ၣ်လီၤ.
လၢအတၫ်ဟဲခးလီၤတၫ်အပူၤ ဖိသၣ်လၢသးနံၣ်အိၣ်(၈)နံၣ်(၁)ဂၤပာ်ဃုာ် လီၫ်က၀ီၤကမျၢၫ်(၂)ဂၤ သံ၀ဲတဘျီဃီဖဲအိၣ်၀ဲအလီၫ်၀ံၤ တစှၤန့ၣ်(၄)ဂၤဘၣ်ဒိ၀ဲအဂ့ၫ် သိၣ်မှံကရၢ(ညီနောင်မဟာမိတ်အဖွဲ့) ထုးထီၣ်ပာ်ဖျါဃာ်၀ဲန့ၣ်လီၤ.
ဒ်န့ၣ်အသိး ဖဲလါဖ့ၤဘြူၤအါရံၤ(၁၁)သီအနံၤ, ဟါ(၉)နၣ်ရံၣ်အဆၢကတီၫ် သုးကီၣ်ကး ကဘီယူၤဒုးသုး ဟဲတ့ၫ်လီၤမ့ၣ်ပိၫ်ဖဲ ကၠီးတီၣ်၀့ၫ်, ပဲးသဲၣ်က၀ီၤဒ့(ပိုက်သည်ရပ်ကွက်)ပူၤအဃိ လီၫ်က၀ီၤကမျၢၫ်(၇)ဂၤ သံ၀ဲတဘျီဃီဖဲအိၣ်အလီၫ်အဂ့ၫ် ကၠီးတီၣ်လီၫ်က၀ီၤကမျၢၫ်တဖၣ် တဲ၀ဲန့ၣ်လီၤ.
“ဟဲတ့ၫ်လီၤမ့ၣ်ပိၫ်လၢ ဟါကတီၫ်လီၤ. ဟဲတ့ၫ်လီၤလၢ ကၠီးတီၣ်၀့ၫ်ပူၤလီၤ. ဖဲန့ၣ်,န့ၣ် ပဲးသဲၣ်က၀ီၤဒ့(ပိုက်သည်ရပ်ကွက်)ဖိ (၇)ဂၤသံ၀ဲလီၤ. (၆)ဂၤဘၣ်ဒိ၀ဲလီၤ. ဟံၣ်ဃီအါအါဂီၫ်ဂီၫ် ဟးဂီၤကွံာ်၀ဲန့ၣ်လီၤ. ၦၤတနီၤတခီ ဃ့ၫ်ပူၤဖျဲးသးလံ” အဂ့ၫ် တဲ၀ဲန့ၣ်လီၤ.
က၀ီၤဒ့တဖၣ်အံၤ မ့ၫ်ၦၤမိၣ်စလ့ၣ်(မွတ်ဆလင်)ဖိတဖၣ် အိၣ်တၫ်လီၫ်၀ံၤ ကဘီယူၤဒုးသုးလၢ ဟဲခးလီၤတၫ်တခိၣ်အံၤ လဲၤတ့ၫ်လီၤစ့ၫ်ကီးမ့ၣ်ပိၫ်လၢ ၀့ၫ်တကူၣ်(ရန်ကုန်)-စ့းတွ့ၣ်(စစ်တွေ)ကျဲမုၫ်ဖးဒိၣ်, က့းစပးနဒံၣ်(ကစ္ဆပနဒီ)တိၤအဃိ ကမျၢၫ်လ့ၣ်လိၤကျဲ ဟးဂီၤကွံာ်၀ဲအဂ့ၫ် လီၫ်က၀ီၤကမျၢၫ်တဖၣ်တဲ၀ဲန့ၣ်လီၤ.
“ကဘီယူၤ ဟဲတ့ၫ်လီၤမ့ၣ်ပိၫ်လၢ ကၠီးတီၣ်၀့ၫ်, ပဲးသဲၣ်က၀ီၤဒ့ ၦၤမိၣ်စလ့ၣ်(မွတ်ဆလင်)ဖိ အိၣ်က၀ီၤဒ့ပူၤန့ၣ်လီၤ. မ့ၣ်အူအီၣ်ဖးအါညါဒီး လဲၤတ့ၫ်လီၤမ့ၣ်ပိၫ်ဖဲ က့းစပးနဒံၣ်(ကစ္ဆပနဒီ)တိၤလီၤ. ကမျၢၫ်လ့ၣ်လိၤကျဲဟးဂီၤကွံာ်၀ဲ”အဂ့ၫ် ကၠီးတီၣ်လီၫ်က၀ီၤကမျၢၫ်ဖိတဂၤ တဲ၀ဲန့ၣ်လီၤ.
တကးဘၣ် ဖဲလါဖ့ၤဘြူၤအါရံၤ(၁၂)သီအနံၤ ဟါ(၃)နၣ်ရံၣ်ဘျဲၣ်အဆၢကတီၫ် သုးကီၣ်ကး ကဘီယူၤဒုးသုး ဟဲတ့ၫ်လီၤမ့ၣ်ပိၫ်ဖဲ မ့ပၠါကီၫ်ဆၣ်(မင်းပြားမြို့နယ်), စိၣ်ယဲကျဲမုၫ်(စွန်ရဲလမ်းမ), ပလဲပီးသ၀ီ(ပုလဲပေါက်ရွာ) အကပၤအဃိ လီၫ်က၀ီၤကမျၢၫ်(၄)ဂၤ ဘၣ်ဒိ၀ဲဆူၣ်ဆူၣ်ကလၢာ်အဂ့ၫ် မ့ပၠါ(မင်းပြား)လီၫ်က၀ီၤကမျၢၫ်ဖိတဖၣ် တဲ၀ဲန့ၣ်လီၤ.
ရခၢၣ်သုးမုၫ်ဒိၣ်(AA) လဲၤထီၣ်ဒုး၀ဲ ၀့ၫ်ပလဲး၀း ပာ်ဃုာ် ကၠီးတီၣ်, မၠီးအူ(မြောက်ဦး), မ့ပၠါ(မင်းပြား), ပီးတီ(ပေါက်တော), တီၣ်ပၠိၣ်၀့ၫ်(တောင်ပြိုမြို့) တဖၣ်၀ံၤအလီၫ်ခံ မၤန့ၫ်ကွံာ်၀ဲ၀့ၫ်တဖၣ်အဂ့ၫ် သိၣ်မှံကရၢ(ညီနောင်မဟာမိတ်အဖွဲ့) ထုးထီၣ်ပာ်ဖျါဃာ်၀ဲန့ၣ်လီၤ.
ရခၢၣ်သုးမုၫ်ဒိၣ်(AA)အံၤ လဲၤဒုးမၤလီၤအုးကွံာ် သုးကီၣ်ကးအကဘီဒုးသုး(၃)ခိၣ်ဖဲ ကၠီးတီၣ်အဂ့ၫ် ဒီးဖဲလါဖ့ၤဘြူၤအါရံၤ(၁၂)သီအနံၤစ့ၫ်ကီး လဲၤဒုးမၤဟးဂီၤကွံာ် သုးကီၣ်ကးအကဘီဒုးသုး လီၫ်ခံတခိၣ် ဖဲ မ့ပၠါ(မင်းပြား)အဂ့ၫ် သိၣ်မှံကရၢ စံး၀ဲန့ၣ်လီၤ.
AA အတၫ်ထီၣ်ဒုးအပူၤ သုးကီၣ်ကးအသုးလၢ တမၤနၢၤတၫ်ဒုးဖဲ ရခၢၣ်ကီၫ်စဲၣ်အပူၤတဖၣ် ပညိၣ်ဒုးက့ၤ၀ဲ လီၫ်က၀ီၤကမျၢၫ်တဖၣ်အဂ့ၫ် သိၣ်မှံကရၢ ထုးထီၣ်တဲဖျါဃာ်၀ဲဖဲ မဟါအနံၤန့ၣ်လီၤ.
ref:WN
