လါနိၣ်၀့ဘၢၣ်(၂၁)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ကၠီၣ်တဲၣ်-ပယီၤကီၫ်ဆၢ ကီၫ်ဆၢတၫ်ကူၣ်လဲၫ်မၤကၤသုးကလၤအိၣ်အလီၫ် တနီသရံၣ်ကီၫ်ဆၣ်,၀့ၫ်မီတီၣ်အပူၤ ပှၤလီၫ် အိၣ်ကမှံဖိ ၂,၀၀၀ဂၤဘျဲၣ်လၢဃ့ၫ်ဟးထီၣ်တဖၣ် ဘၣ်အိၣ်ကဒုလၢကီၫ်ကၠီၣ်တဲၣ်,ပရၣ်ကၠိးကီၫ်ရ့ၣ်, Singkhongသ၀ီကပၤ ကစၢၫ်ကလိအဖီခိၣ်အဂ့ၫ် ပှၤမၤစၢၤပှၤလီၫ်အိၣ်ကမှံဖိတဖၣ်တဲ၀ဲလီၤ.
ကညီဒီကလုာ်စၢဖှိၣ်ကရၢ(KNU)ဒီးတၫ်ပၢၫ်ဆၢသုးပာ်ဖှိၣ်တဖၣ် ဖဲလါနိၣ်၀့ဘၢၣ်(၁၀)သီနံၤန့ၣ် စးထီၣ်ဒုး၀ဲ ၀့ၫ်မီတီၣ်အပူၤ သုးခီၣ်မံးရှၢၣ်သုးဖိတဖၣ်အကတီၫ် ဘၣ်ဃ့ၫ်ပူၤဖျဲးအသးဆူကီၫ်ကၠီၣ်တဲၣ်တကပၤန့ၣ်လီၤ.
စးထီၣ်ဖဲတၫ်ဒုးကဲထီၣ်အကတီၫ်န့ၣ် ပှၤလီၫ်အိၣ်ကမှံဖိအိၣ်ဒၣ်ထဲ ၁,၀၀၀ဂၤဘျဲၣ်ဘၣ်ဆၣ် လၢကတီၫ်အံၤ ပှၤလီၫ်အိၣ် ကမှံဖိအနီၫ်ဂံၫ်အိၣ်ထီၣ်လံ ၂,၀၀၀ဂၤဘျဲၣ်လံအဂ့ၫ် သၣ်သယၣ်အ့ဆူးတီပၠံးသီခါဖးဒိၣ်လၢမၤစၢၤပှၤလီၫ်အိၣ်ကမှံ တဲ၀ဲလီၤ.
“ဘၣ်အိၣ်လၢကီၫ်ဆၢကစၢၫ်ကလိအကျါလီၤ.ကၠီၣ်တဲၣ်ပဒိၣ်တဖၣ် တပျဲဒုးနုာ်ပှၤလီၫ်အိၣ်ကမှံဖိတဖၣ်လၢကၠီၣ်တဲၣ် ဟီၣ်က၀ီၤပူၤဘၣ်.ဒုးအိၣ်၀ဲဖဲကၠီၣ်တဲၣ်ဒီပယီၤကီၫ်ဆၢန့ၣ်လီၤ.ကၠီၣ်တဲၣ်ဘၣ်မူဘၣ်ဒါတဖၣ်,သ၀ီသးပှၫ်တဖၣ်တခီဟဲထီၣ်၀ဲန့ၫ်လီၤ.သိလ့ၣ်လၢဟဲဆှၢတၫ်အီၣ်တဖၣ် ဟဲထီၣ်၀ဲသ့အဂ့ၫ်”တဲ၀ဲလီၤ.
ပှၤလီၫ်အိၣ်ကမှံဖိတဖၣ်န့ၣ် ဘၣ်ဆဲးလီၤဒဲလၢအကစၫ်ဒၣ်၀ဲဒီးအိၣ်ဖဲကီၫ်ဆၢအဂ့ၫ် တၫ်သ့ၣ်ညါဘၣ်လီၤ.
၀့ၫ်မီတီၣ်န့ၣ် KNU,သုးက့နီၫ်ဂံၫ်(၄) အစုတီၤဖီလာ်သုးဖိတဖၣ်ဒီးတၫ်ပၢၫ်ဆၢသုးပာ်ဖှိၣ်တဖၣ် ထီၣ်ဒုးမၤန့ၫ်၀ဲဖဲလါနိၣ်၀့ ဘၢၣ်(၁၄)သီအနံၤန့ၣ်လီၤ.
ကၠီၣ်တဲၣ်ပှၤဘၣ်မူဘၣ်ဒါတဖၣ်စ့ၫ်ကီး ဖဲလါနိၣ်၀့ဘၢၣ်(၁၆)သီအနံၤန့ၣ် ဒုးသ့ၣ်ညါပှၤလီၫ်အိၣ်ကမှံဖိတဖၣ်လၢ ကဘၣ်အိၣ်ဖဲတၫ်လီၫ်၀ဲအံၤ လၢခံ(၂)လါဃၣ်ဃၣ်သ့အဂ့ၫ် သၣ်သယၣ်အ့ဆူးတီပၠံးသီခါဖးဒိၣ်တဲ၀ဲလီၤ.
“ကၠီၣ်တဲၣ်ပှၤဘၣ်မူဘၣ်ဒါတဖၣ် လဲၤဆူ၀ၫ်ဘးခီဒီးကယံာ်ပှဲၤသီလဲၣ်န့ၣ်လဲၤတဲသကိး၀ဲလီၤ.လၢတကပၤ တဲဆၢအစှၤ ကတၢၫ်ကဘၣ်အိၣ်၀ဲဖဲန့ၣ်(၂)လါဃၣ်ဃၣ်လီၤ.လၢကတီၫ်အံၤဒု က့ၤနုာ်လီၤဆူ၀့ၫ်မီတီၣ်အပူၤတန့ၫ်ဒံးဘၣ်အဂ့ၫ်”တဲ၀ဲ လီၤ.
ပှၤလီၫ်အိၣ်ကမှံဖိတဖၣ်အဂီၫ် တၫ်လုၫ်ထံလီၫ်,တၫ်ဟးလီၫ်,ဂ့ၫ်ဂီၫ်အူသိလ့ၣ်တီၣ်ပှၤဆါတခိၣ်ဒီးဆူၣ်ချ့၀ဲၤကျိၤ ဆံးဆံးဖိတခါ ကၠီၣ်တဲၣ်ပှၤဘၣ်မူဘၣ်ဒါတဖၣ် ရဲၣ်ကျဲၤဃာ်၀ဲအဂ့ၫ် သၣ်သယၣ်အ့ဆူးတီပၠံးသီခါဖးဒိၣ်တဲ၀ဲလီၤ.
လၢကတီၫ်အံၤ ပှၤလီၫ်အိၣ်ကမှံဖိတဖၣ်အဂီၫ် ဟုသး,ခီနီဃ့အဘိၣ်ဒီးညၣ်ဒၢ တၫ်အိၣ်ဃ့တဖၣ် အိၣ်ဒၣ်ထဲတနွံအဂီၫ် လီၤ.တၫ်အီၣ်ဃ့တဖၣ် မ့ၫ်လၢာ်န့ၣ် တၫ်ကီတၫ်ခဲအိၣ်ထီၣ်သ့အဂ့ၫ် ပှၤမၤစၢၤပှၤလီၫ်အိၣ်ကမှံတဖၣ် တဲ၀ဲလီၤ.
မီတီၣ်ကီၫ်ဆၢအပူၤ ပယီၤသုးတကပၤ အကဘီယူၤဟဲ၀ဲအိၣ်ဒီးဟီၣ်က၀ီၤတၫ်အိၣ်သးတဂၢၫ်ဒံးဘၣ်အဃိ ၀့ၫ်မီတီၣ် ကျဲနုာ်လီၤန့ၣ် လၢကတီၫ်အံၤKNUကးတံာ်ဃာ်၀ဲလီၤ.
မီတီၣ်တၫ်ဒုးအပူၤ သုးခီၣ်မံးရှၢၣ်သုးဖိဘၣ်တၫ်ဖီၣ်န့ၫ်၀ဲ(၄၃)ဂၤအဂ့ၫ် ဖဲလါနိၣ်၀့ဘၢၣ်(၁၄)သီအနံၤန့ၣ် KNUထုးထီၣ် ဘိးဘၣ်ရၤလီၤတၫ်ကစီၣ်လီၤ.
တၫ်ဒုး၀ံၤလံဘၣ်ဆၣ် ပှၤလီၫ်အိၣ်ကမှံဖိတဖၣ် က့ၤဆူ၀့ၫ်မီတီၣ်တန့ၫ်ဒံးဘၣ်ဒီး ကဘၣ်အိၣ်ဒံးကဒီးဖဲန့ၣ်အဂ့ၫ် သၣ်သ ယၣ်အ့ဆူးတီပၠံးသီခါဖးဒိၣ်လၢမၤစၢၤပှၤလီၫ်အိၣ်ကမှံဖိတဖၣ်တဲ၀ဲန့ၣ်လီၤ.
