လါနိၣ်၀့ဘၢၣ် ၅သီ, ၂၀၂၅နံၣ်, အၣ်ထူခ့တၢ်ကစီၣ်
ယိၤဒိၣ်ကီၢ်စဲၣ်မုၢ်ထီၣ်တပၤ, နီၣ်ဂံၢ်(၄)ဟီၣ်က၀ီၤလီၤဆီလၢ ဘၣ်တၢ်ကိးအီၤဒ် မဲလါပှၤဖီၣ်စုက၀ဲၤကရၢ(NDAA)န့ၣ် အိၣ်လဲၣ်တၢ်လံၣ်တၢ်လီတၢ်ဖံးတၢ်မၤလၢအမ့ၢ် ကၠါဖၠးစဲးတၢ်ပီးတၢ်လီတဖၣ် အမၤဟးဂီၤကွံၥ်၀ဲအဂ့ၢ်န့ၣ် NDAAထုးထီၣ်ပၥ်ဖျါဃၥ်၀ဲဖဲ မဟါအနံၤန့ၣ်လီၤ.
လါအီးကထိဘၢၣ် ၃၁သီအနံၤ, ဖဲ မဲလါ၀့ၢ်တၢ်ဒွဲၣ်အူတၢ်ကမှံၤတၢ်လီၢ်အပူၤ နီၣ်ဂံၢ်(၄)ဟီၣ်က၀ီၤလီၤဆီပၢၤကီၢ်န့ၣ် ကၠါဖၠးတၢ်ဖံးတၢ်မၤဂ့ၢ်၀ီတၢ်ပီးတၢ်လီလၢမၤန့ၢ်၀ဲတဖၣ် စူးကါက့ၤ၀ဲသုတန့ၢ်အဂီၢ် မၤဟးဂီၤကွံၥ်၀ဲအသိး ဒွဲၣ်မူမၤဟးဂီၤကွံၥ်၀ဲအဂ့ၢ် ပၥ်ဖျါဃၥ်၀ဲန့ၣ်လီၤ.
တၢ်ပီးတၢ်လီတဖၣ်လၢ အမၤဟးဂီၤကွံၥ်၀ဲတဖၣ်အကျါ လီတဲစိတဖၣ်, ခီၣ်ဖၠူထၢၣ်တဖၣ်, Rout tarတဖၣ်ပၣ်ဃုၥ်၀ံၤ မ့ၢ်ကွၢ်လၢအနီၣ်ဂံၢ်နီၣ်ဒွးတခီ ကအိၣ်၀ဲတုၤ ၁ကလးဃၣ်ဃၣ်ဒီး လီၤလၢစ့ယွၣ် အကလီၢ်(၁၀)ဃၣ်ဃၣ်အဂ့ၢ် စံး၀ဲန့ၣ်လီၤ.
တၢ်ပီးတၢ်လီလၢတၢ်မၤဟးဂီၤကွံၥ်၀ဲတဖၣ်န့ၣ် တၢ်နုၥ်လီၤဖီၣ်၀ဲ ကၠါဖၠးတၢ်မၤလီၢ်အဆၢကတီၢ် တၢ်မၤန့ၢ်၀ဲ၀ံၤ တၢ်မၤဟးဂီၤကွံၥ်ဒ်အံၤန့ၣ် တၢ်ဒုးလီၤပှီၢ် ကၠါဖၠးတၢ်မၤလီၢ်ဂ့ၢ်၀ီ တၢ်မၤနၢၤအဂ့ၢ် ပၥ်ဖျါဃၥ်၀ဲန့ၣ်လီၤ.
ဒ်အမ့ၢ် လီၢ်က၀ီၤပဒိၣ်တဖုအသိး တၢ်ကဒုးလီၤပှီၢ်ကွံၥ် ကၠါဖၠးတၢ်မၤလီၢ်တဖၣ် ဆူၣ်ဆူၣ်ကိၤကိၤအဂ့ၢ် မ့ၢ်တၢ်ဟ့ၣ်ဒုးသ့ၣ်ညါကမျၢၢ်အဂ့ၢ် စံး၀ဲန့ၣ်လီၤ.
မဲလါဒီး ၀းသုးမုၢ်ဒိၣ်(UWSA) ပၢဆှၢဟီၣ်က၀ီၤတဖၣ်အံၤ မ့ၢ်ဟီၣ်က၀ီၤတဖၣ်လၢ အိၣ်ပှဲၤဒီး ကၠါဖၠးတၢ်ဖံးတၢ်မၤတဖၣ်၀ံၤ တရူးပဒိၣ် ဒုးလီၤပှီၢ်ကၠါဖၠးတၢ်မၤတဖၣ်အဆၢကတီၢ် လီၢ်က၀ီၤပှၤဖီၣ်စုက၀ဲၤကရၢတဖၣ် ပၥ်ဖှိၣ်မၤသကိးတၢ်လၢ တၢ်ဒုးလီၤပှီၢ်ကၠါဖၠးဂ့ၢ်၀ီ၀ံၤ ပှၤမၤကၠါဖၠးတၢ်မၤလၢတၢ်ဖီၣ်န့ၢ်အီၤတဖၣ်စ့ၢ်ကီး ဆီတလဲဟ့ၣ်လီၤ၀ဲဆူ တရူးပဒိၣ်အအိၣ်န့ၣ်လီၤ.
တနံၣ်အံၤအတီၢ်ပူၤ နီၣ်ဂံၢ်(၄)ဟီၣ်က၀ီၤအံၤ ဒုးအိၣ်ထီၣ်၀ဲ တၢ်ပၥ်ဖှိၣ်မၤသကိးဒီး ကီၢ်တရူး စံၣ်ညီၣ်ကွီၢ်ဂ့ၢ်၀ီတၢ်ကရၢကရိ ၀ဲၤကျိၤလၢဘၣ်ထွဲတဖၣ်၀ံၤ တၢ်ကပၢၤ၀ဲ ကၠါဖၠးတၢ်ဖံးတၢ်မၤတဖၣ်ဟဲဒိၣ်ထီၣ်အဂီၢ် ပၣ်ဃုၥ်၀ဲလၢ တၢ်အရ့ဒိၣ်အသနၢၣ်အပူၤအဂ့ၢ် ဟ့ၣ်ဒုးသ့ၣ်ညါဃၥ်၀ဲန့ၣ်လီၤ.
တၢ်ပညိၣ်ဒုးလီၤပှီၢ်အီၤ, တၢ်ကတြီဒုးလီၤပှီၢ် လၢတၢ်အိၣ်ယၢၤတဖၣ်ဒီး တၢ်ထိၣ်ဃူတဲသကိးတၢ်တဖၣ်အသိး တၢ်ကဒုးလီၤပှီၢ်ကွံၥ် ကၠါဖၠးတၢ်မၤလီၢ်သုးကလၢၤတဖၣ်လၢ အဂံၢ်ခီၣ်ထံးခီၣ်ဘိအဂ့ၢ် မဲလါသုးမုၢ်ဒိၣ် ထုးထီၣ်ပၥ်ဖျါဃၥ်၀ဲန့ၣ်လီၤ.
