လါနိၣ်၀့ဘၢၣ် ၄သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကရ့ၣ်နံၣ်တၢ်ပၢၢ်ဆၢသုးတဖၣ် ပၢဆှၢဃၥ် ကီၢ်ကရ့ၣ်နံၣ်, ဒံၣ်မီစိၤမုၢ်နုၥ်တပၤအိၣ် ကီၢ်ကရ့ၣ်ပၢၤကီၢ်၀ဲၤကျိၤ(KSP)၀ဲၤဒၢးအံၤ ဘၣ်တၢ်ဟဲဒုးတ့ၢ်လၢမ့ၣ်ပိၢ်လၢ ကဘီယူၤအဃိ ပှၤဘၣ်သံ၀ဲ ၅ဂၤအဂ့ၢ် တၢ်သ့ၣ်ညါဘၣ်န့ၣ်လီၤ.
လါနိၣ်၀့ဘၢၣ် ၃သီအနံၤ, ဂီၤ၇နံၣ်ရံၣ်ဃၣ်ဃၣ်အဆၢကတီၢ် သုးကီၣ်မံးရှၢၣ်အသုး ကဘီယူၤဒုးသုး ဟဲဒုးတ့ၢ်လီၤမ့ၣ်ပိၢ် ဖဲ ဒံၣ်မီၤစိၤမုၢ်နုၥ်တကပၤအိၣ် KSP၀ဲၤဒၢးအိၣ်တၢ်လီၢ်အဃိ ပိၥ်ခွါဘၣ်သံ၀ဲ ၄ဂၤ၀ံၤ ပိၥ်မုၣ် ဘၣ်သံ၀ဲ ၁ဂၤအဂ့ၢ် တၢ်သ့ၣ်ညါဘၣ်န့ၣ်လီၤ.
“ဟဲတ့ၢ်လီၤ၀ဲဖဲ KSP၀ဲၤဒၢးတီတီလီၤ. လီၤဂၥ်ဒ်သိး အသ့ၣ်ညါတၢ်လီၢ်တၢ်ကျဲၤလီၤတံၢ်လီၤ. ပိၥ်ခွါ ၄ဂၤ, ပိၥ်မုၣ် ၁ဂၤသံ၀ဲ”အဂ့ၢ် ဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
ကရ့ၣ်နံၣ်တၢ်ပၢၢ်သုးတပၤတခီ ဘၣ်ထွဲဒီး KSP၀ဲၤဒၢး ဘၣ်တၢ်ဟဲဒုးတ့ၢ်လီၤအီၤလၢ မ့ၣ်ပိၢ်တၢ်ဂ့ၢ်န့ၣ် တထုးထီၣ်ပၥ်ဖျါဃၥ်၀ဲ တၢ်ကစီၣ်နီတမံၤဒံးဘၣ်န့ၣ်လီၤ.
သုးကီၣ်မံးရှၢၣ်အသုးအံၤ ဒ်သိးကဒုးန့ၢ်က့ၤ ဒံၣ်မီၤစိၤမုၢ်နုၥ်တကပၤအဂီၢ် ဟဲထီၣ်မၤ၀ဲဒုးယၤရဲၣ်ကျဲၤတဖၣ်အသိး မၤ၀ဲ ကလံၤကျါတၢ်ဒုးတဖၣ်ဒီး ဟဲဒုးတ့ၢ်လီၤမ့ၣ်ပိၢ်လၢဒြိတဖၣ် အိၣ်ထီၣ်၀ဲတပယူၥ်ဃီအဂ့ၢ် ပှၤလၢသ့ၣ်ညါ၀ဲ ဟီၣ်ခိၣ်မဲၥ်ဖံးခိၣ်တၢ်အိၣ်သး တနီၤစံး၀ဲန့ၣ်လီၤ.
ဖဲအပူၤကွံၥ် လါအီးကထိဘၢၣ်အပူၤ ဒံၣ်မီၤစိၤဒီးဖရူၣ်စိၤကီၢ်ဆၣ်အပူၤ ခီဖျိသုးကီၣ်မံးရှၢၣ်အသုး မၤ၀ဲဒြိတၢ်ဒုးတဖၣ်အဃိ ကမျၢၢ်ဘၣ်သံ၀ဲ ၃ဂၤ၀ံၤ ဘၣ်ဒိ၀ဲ ၈ဂၤအဂ့ၢ် ကရ့ၣ်နံၣ်ဒီကလုၥ်တၢ်ဒီသဒၢသုး (KNDF) ထုးထီၣ်ပၥ်ဖျါဃၥ်၀ဲန့ၣ်လီၤ.
သုးကီၣ်မံးရှၢၣ်အသုးန့ၣ် ပညိၣ် ဟဲဒုးခးလီၤ၀ဲ တမ့ၢ်သုးဂ့ၢ်၀ီတၢ်ခးပနီၣ်တဖၣ်အဃိ ထံဖိကီၢ်ဖိကမျၢၢ်တခီ ကအိၣ်ဒီးသုးဂ့ၢ်၀ီတၢ်ပလီၢ်ပဒီအဂီၢ် KNDFဟ့ၣ်သဆၣ်ထီၣ်ဃၥ်၀ဲန့ၣ်လီၤ.
