လါအီးကထိဘၢၣ်(၃၁)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ကမဲရကၤကီၫ်ခိၣ်ဒီၣ်နၢၣ်ထရၢးန့ၣ် လၢကလံၤထံးခိၣ်ယံယါအဂီၫ် တၫ်ကတ့ထီၣ် နူကလံယါကဘီထံလာ်တခိၣ်အဂီၫ် ဟ့ၣ်တၫ်ပျဲပာ်ဂၢၫ်ပာ်ကျၢၤ၀ဲအဂ့ၫ် ထုးထီၣ်တဲဖျါ၀ဲလီၤ.
ဟ့ၣ်၀ဲတၫ်ပျဲဒ်သိးအံၤအဃိ ကလံၤထံးခိၣ်ရံယါန့ၣ် လၢထံကီၫ်စှၤဘ့ၣ်အကျါ ကဲထီၣ်ထံကီၫ်တဘ့ၣ်လၢန့ၫ်ပၢဘၣ် နူကလံယါကဘီထံလာ်န့ၣ်လီၤ.
ကီၫ်ခိၣ်ဒီၣ်နၢၣ်ထရၢးန့ၣ်ဖဲအတၫ်ဟဲဆူ အ့ရှၢၣ် ဖဲထံၣ်လိာ်အသးဒီးကလံၤထံးခိၣ်ရံယါကီၫ်ခိၣ် လံၣ်ကၠ့မၠီၣ်ဒီးခိၣ်နၫ်လၢ လီၫ်က၀ီၤအဂၤတဖၣ်အကတီၫ် တဲ၀ဲလၢအၢၣ်လီၤ၀ဲလၢကပှ့ၤကလံၤထံးခိၣ်ရံယါအရ့ၣ်နီၣ်သိ ဒီးဟီၣ်လာ်ဂာ်သ၀ံအါ အါဂီၫ်ဂီၫ်အဂ့ၫ်န့ၣ်လီၤ.
ထရၢးဒီးကလံၤထံးခိၣ်ရံယါကီၫ်ခိၣ်လံၣ်ကၠ့မၠီၣ်တဖၣ်န့ၣ် လါအီးကခိဘၢၣ်(၂၉)သီနံၤ လၢကလံၤထံးခိၣ်ရံယါ ပတီၫ်ထီတၫ်အိၣ်ဖှိၣ်အပူၤ ထံကီၫ်ခံဘ့ၣ်အဘၢၣ်စၢၤ တၫ်ကူၣ်လဲၫ်မၤကၤတၫ်အၢၣ်လီၤလၢဘံဘူတဖၣ် အတၫ်ဂ့ၫ်တၫ်ကျိၤလီၤတံၫ်လီၤဆဲးတဖၣ် အၢၣ်လီၤတူၫ်လိာ်သကိး၀ဲန့ၣ်လီၤ.
ကလံၤထံးခိၣ်ရံယါတကပၤ နူကလံယါသိတဖၣ် ကထုးထီၣ်၀ဲလၢအနီၫ်ကစၫ်အဂီၫ် ကလံၤထံးခိၣ်ရံယါကီၫ်ခိၣ် ဃ့ထီၣ်ဃာ်၀ဲ ကမဲရကၤတၫ်ပျဲန့ၣ်လီၤ.ထံကီၫ်ခံဘ့ၣ်အဘၢၣ်စၢၤ တၫ်အၢၣ်လီၤအဖီခိၣ် ကလံၤထံးခိၣ်ရံယါန့ၣ် အမဲရကၤတၫ်ဟ့ၣ်တၫ်ပျဲမ့ၫ်တအိၣ်ဘၣ်န့ၣ် ထုးထီၣ်နူကလံယါအသိလၢအနီၫ်ကစၫ်ဒၣ်၀ဲတန့ၫ်ဘၣ်.
လၢကတီၫ်အံၤ ကဘီထံလာ်လၢတၫ်သူ၀ဲဒီးဒံၣ်စဲၣ်အလီၫ် နူကလံယါဂံၫ်ဘါသဟီၣ်ကဘီထံလာ်တခိၣ် တၫ်ကတ့ထီၣ်၀ဲအဂီၫ် ပဟ့ၣ်တၫ်ပျဲအဂ့ၫ် ထရၢးန့ၣ် ကွဲဖျါဃာ်၀ဲလၢအပှၤတ၀ၢလံာ်ကဘျံးပၤအပူၤန့ၣ်လီၤ.
