လါစဲးပထ့ဘၢၣ်(၄)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကဒိၣ်စိက့ၤ ရၤမတံ-ကီးတရံးအ့ရှၢကျဲမုၢ်ကန့ၢ်အဂီၢ် သုးကီၣ်မံးရှၢၣ်စူးကါ၀ဲ ဟီၣ်ခိၣ်လိၤသုးကျိၤတဖၣ်လၢဂံၢ်ဘါအကထိတဖၣ်တကးဘၣ် သုးသိလ့ၣ်ထး, မျိၥ်တဖၣ်, မ့းစဲသိလ့ၣ်တဖၣ်, ကျိဖးဒိၣ်သုးတဖၣ်, တၢ်ဘှီထီၣ်ကျဲတိၤသုးလၢ ကရၢအကလုၥ်ကလုၥ်အသိး စူးကါ၀ဲ ပတီၢ်ထီဒြိတဖၣ်, ဟဲဒုးခးစၢၤတၢ်လၢ ကလံၤကျါတဖၣ်၀ံၤ ဟဲထီၣ်မၤဒုးယၤရဲၣ်ကျဲၤအဂ့ၢ် တၢ်သ့ၣ်ညါဘၣ်န့ၣ်လီၤ.
“ခဲအံၤစှၤသီအတီၢ်ပူၤန့ၣ် ဟဲထီၣ်အါထီၣ်လၢ ကျဲလီၢ်လံၤတပၤမ့ၢ်ဂ့ၤ, အ့ရှၢကျဲမုၢ်အဖီခိၣ်တပၤမ့ၢ်ဂ့ၤလီၤ. ရၤမတံ ၂၇၅စ့ၢ်ကီး ဖဲမနၤန့ၣ် ဟးထီၣ်သုးကျိၤအဃိ တၢ်ဘၣ်သဂၢၢ်ခးလိၥ်သးအိၣ်ထီၣ်၀ဲလီၤ. ခးလီၤ၀ဲ ကျိဖးဒိၣ်, မ့စဲမျိၥ်တဖၣ်တဘီယူၥ်ဃီလီၤ. ခးလီၤတၢ်လၢမုၢ်နံၤခီလံၤလံၤဒီးတုၤတနံၤအံၤတပတုၥ်အသးဒံးဘၣ်. အိၣ်လၢကီးတရံးအဟးထီၣ် အ့ရှၢကျဲတပၤဒီး ခးလီၤ၀ဲမ့းစဲတဖၣ်န့ၣ် လဲၤတုၤဆူ ရၤမတံ ၀့းရှါညါ”အဂ့ၢ် ကညီဂံၢ်ခီၣ်ထံးသုးဂ့ၢ်၀ီတၢ်ကစီၣ်လၢ အဘူးဒီးသုးပၥ်ဖှိၣ် စံး၀ဲဖဲ လါစဲးပထ့ဘၢၣ်(၂)သီအနံၤန့ၣ်လီၤ.
၂၇၅အပူၤ တၢ်ထီၣ်ဒုး ကၠီၣ်တဲၣ်ကီၢ်ဆၢသုးကလၢၤတဖၣ်အပူၤ သုးစံၣ်ဖျိးဂံၢ်ဘါလၢ ဟဲက့ၤပၥ်ဖှိၣ်ထီၣ်သးတဖၣ်ပၣ်ဃုၥ် ထၢဖှိၣ်ဃၥ်၀ဲအဖီခိၣ် အသုးဂံၢ်ဘါကအိၣ်တုၤ ၇၀၀တုၤ၁၀၀၀အဘၢၣ်စၢၤအဂ့ၢ်, နီၣ်ဂံၢ် ၂ တိၤတပၤစ့ၢ်ကီး အဂံၢ်အဘါအိၣ်၀ဲ ၃၀၀ဃၣ်ဃၣ်အဂ့ၢ် ပှၤလီၢ်က၀ီၤဖိတဖၣ် စံး၀ဲန့ၣ်လီၤ.
“မဟါအနံၤန့ၣ် တၢ်နၢ်ဟူဘၣ်ကျိဖးဒိၣ်အကလုၢ်တဖၣ်ဒီတနံၤလီၤ. ခးလီၤ၀ဲ မုၢ်နၤ မုၢ်ဆါလီၤ. အခဲအံၤ ဂီၤ၆နၣ်ရံၣ်ဃၣ်ဃၣ်လံၤလံၤန့ၣ် တၢ်နၢ်ဟူဘၣ်၀ဲကျိဖးဒိၣ်အကလုၢ်တဖၣ်လီၤ. မဲကနဲၣ်, ကွ့ကလ့, ထံမူထၣ်သ၀ီတပၤတခီ တၢ်ဘၣ်သဂၢၢ်ခးလိၥ်သးတဖၣ်အိၣ်ထီၣ်၀ဲ”အဂ့ၢ် ပှၤ၀့ၢ်ရၤမတံဖိတဂၤ စံး၀ဲန့ၣ်လီၤ.
သုးကီၣ်မံးရှၢၣ်န့ၣ် ကဒိၣ်စိက့ၤ အ့ရှၢကျဲမုၢ်ကန့ၢ်အဂီၢ် မၤ၀ဲဒုးယၤရဲၣ်ကျဲၤအဆၢကတီၢ် ကးတံၥ်ဃၥ်၀ဲ ကၠီၣ်တဲၣ်-ပယီၤကီၢ်ဆၢ တၢ်ကူၣ်လဲၢ်မၤကၤ နီၣ်ဂံၢ်(၂)တိၤ၀ံၤအလီၢ်ခံ ကမၤ၀ဲတၢ်ထီၣ်ဒုး ဒုးယၤရဲၣ်ကျဲၤအဂီၢ် အိၣ်ကတဲၥ်ကတီၤအသးအဂ့ၢ် စံး၀ဲန့ၣ်လီၤ.
KNLA ဒီးတၢ်ပၢၢ်ဆၢသုးပၥ်ဖှိၣ် ပၢဆှၢဃၥ်၀ဲ ရၤမတံ-ကီးတရံးအ့ရှၢကျဲမုၢ်အံၤ ဖဲ၂၀၂၃နံၣ်, လါဒံၣ်စ့ဘၢၣ်လံၤလံၤ၀ံၤ ကဒိၣ်စိက့ၤအဂီၢ် သုးဟံးန့ၢ်ဆူၣ်တၢ်စိတၢ်ကမီၤ သုးရိၣ်မဲခိၣ်ကျၢၢ် ၂ စိ၀့နီၢ်ကစၢ်ဒၣ်၀ဲ ဟဲလီၤဆူ မီၣ်လမၠဲၣ်၀ံၤ ဖဲ၂၀၂၄နံၣ်, လါအ့ဖြ့ၣ် န့ၣ် မၤ၀ဲ ထံကီၢ်အပတီၢ် အီၣ်စ့ၣ်ယးဒုးယၤရဲၣ်ကျဲၤဘၣ်ဆၣ် တုၤခဲအံၤဟဲထီၣ်ဆူတၢ်မဲၥ်ညါတန့ၢ်ဘၣ်န့ၣ်လီၤ.
၂၀၂၅နံၣ်, လါဒံၣ်စ့ဘၢၣ် ၂၈သီအနံၤ တၢ်ဃုထၢအကူၥ် ၁လၢ သုးကီၣ်မံးရှၢၣ်ကရဲၣ်ကျဲၤအံၤအပူၤ ဖၢနုၥ်ဃၥ်၀ဲစ့ၢ်ကီး ၀့ၢ်ရၤမတံ၀ံၤ ကတီၢ်ခဲအံၤ ဒုးယၤရဲၣ်ကျဲၤန့ၣ် ပၥ်ပနီၣ်၀ဲလၢ တချူးဘၣ် တၢ်ဃုထၢ အသီ ၉၀အတီၢ်ပူၤဒီး ဟဲထီၣ်မၤဒုးယၤရဲၣ်ကျဲၤတဖၣ်တပတီၢ်၀ံၤတပတီၢ်ဘၣ်ဆၣ် ဟဲထီၣ်ဖျိ၀ဲတန့ၢ်ဒံးဘၣ်ဒီး အပှၤသုးဖိသံဒီးဘၣ်ဒိအိၣ်ထီၣ်၀ဲအါအါဂီၢ်ဂီၢ်၀ံၤ ဂုၤက့ၤအခံခဲအံၤခဲအံၤအဂ့ၢ် တၢ်သ့ၣ်ညါဘၣ်လၢ တၢ်ပၢၢ်ဆၢသုပၥ်ဖှိၣ်အအိၣ်န့ၣ်လီၤ.
