လါစဲးပထ့ဘၢၣ်(၃)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးကီၣ်မံးရှၢၣ်အသုး ကဒိၣ်စိက့ၤ ကီးတရံး-ရၤမတံအ့ရှၢကျဲမုၢ်လၢ အသီ(၉၀)အတီၢ်အပူၤကန့ၢ်အဂီၢ် ဟဲထီၣ်သုးကျိၤမၤဒုးယၤရဲၣ်ကျဲၤလၢ သုးတြိၤ(၄)တြိၤဒ်အမ့ၢ် သုးတြိၤ၅၅, ၂၂, ၄၄, ဒီး သုးတြိၤ ၆၆တဖၣ်န့ၣ်လီၤ.
ကတီၢ်ခဲအံၤစ့ၢ်ကီး တၢ်ဒုးကဲထီၣ်သးကိးမုၢ်နံၤလၢ သုးက့(၆), ကီးတရံးကီၢ်ဆၣ်အပူၤအဂ့ၢ် KNLAဂံၢ်ခီၣ်ထံးသုးဂ့ၢ်၀ီတၢ်ကစီၣ်စံး၀ဲန့ၣ်လီၤ.
တၢ်ဒုးဆူၣ်၀ဲလၢ တၢ်ပၢၢ်ဆၢသိၣ်မှံသုးပၥ်ဖှိၣ်ဒီးသုးကီၣ်မံးရှၢၣ်အသုးအဘၢၣ်စၢၤ ဖဲအ့ရှၢကျဲမုၢ်အဖီခိၣ်အပူၤ သုးကီၣ်မံးရှၢၣ်အသုးတပၤ သံဒီးဘၣ်ဒိအိၣ်အါ၀ဲအဃိ ဖဲလါအီကူၥ်(၃၁)သီအနံၤ, မုၢ်ထူၣ်အဆၢကတီၢ်န့ၣ် အကီၢ်ခီခိၣ်နီၢ်ကစၢ်အကရၢတဖၣ် ဟဲထီၣ်၀ဲလၢကြုၢ်တုဆူ ကီးတရံးတပၤအဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
“ကီၢ်ခီခိၣ်ဟဲထီၣ်အပူၤ ပွဲးသိလ့ၣ်အ၀ါ(၇)ခိၣ်န့ၣ် အဂံၢ်အဘါကအိၣ်တုၤ(၄၀)ဃၣ်ဃၣ်န့ၣ်လီၤ. ဖဲကီၢ်ခီခိၣ်ဟဲထီၣ်၀ဲအပူၤန့ၣ် သိလ့ၣ်ဒိးဟံၣ်အ၀ါ(၂)ခိၣ်စ့ၢ်ကီး ပၣ်ဃုၥ်၀ဲန့ၣ်လီၤ. ပၣ်ဃုၥ်စ့ၢ်ကီးဒီး သိလ့ၣ်ဖးဒိၣ်(၂)ခိၣ်န့ၣ်လီၤ. သိလ့ၣ်အဖီခိၣ်စ့ၢ်ကီး သုးကီၣ်မံးရှၢၣ်အပှၤသုးဖိ ပၣ်ဃုၥ်၀ဲ(၄၀)ဃၣ်ဃၣ်”အဂ့ၢ် KNLAဂံၢ်ခီၣ်ထံးသုးဂ့ၢ်၀ီတၢ်ကစီၣ် စံး၀ဲန့ၣ်လီၤ.
တကးဘၣ် ကဒိၣ်စိက့ၤ ကီးတရံး-အ့ရှၢကျဲမုၢ်အဂီၢ် စူးကါ၀ဲသုးအဂံၢ်အဘါအါအါဂီၢ်ဂီၢ်၀ံၤ ဟဲထီၣ်သုးကျိၤဘၣ်ဆၣ် တၢ်ဘၣ်ဒိဘၣ်ထံးအါ၀ဲအဃိ ဟဲထီၣ်၀ဲတန့ၢ်ဘၣ်အဂ့ၢ် စံး၀ဲန့ၣ်လီၤ.
အီၣ်စ့ၣ်ယၣ်ဒုးယၤရဲၣ်ကျဲၤလၢ ဘၣ်တၢ်တီၣ်ခိၣ်ရိၣ်မဲအီၤလၢ သုးရိၣ်မဲခိၣ်ကျၢၢ်(၂) စိ၀့နီၢ်ကစၢ်အံၤ ယံၤထီၣ်၀ဲ ၁နံၣ်တ၀ၣ်ဃၣ်ဃၣ်ဘၣ်ဆၣ် ဟဲထီၣ်လၢတၢ်မဲၥ်ညါတန့ၢ်ဘၣ်ဒီး ဟဲတုၤအိၣ်ပတုၥ်အသးဖဲ တီနီၢ်ထံလီၤဆူအကပၤန့ၣ်လီၤ.
“တၢ်ဒုးန့ၣ်ကဲထီၣ်၀ဲကိးမုၢ်နံၤလီၤ. သုးကီၣ်မံးရှၢၣ်တပၤ ခးကျိဖးဒိၣ်, ဒုးစၢၤတၢ်လၢဒြိလၢ အသုးကျိၤဟဲထီၣ်၀ဲဟီၣ်က၀ီၤတဖၣ်အပူၤလီၤ. အ၀ဲသ့ၣ်မၤပှဲၤအသုးဂံၢ်ဘါအါအါဂီၢ်ဂီၢ်၀ံၤ ဟဲထီၣ်သုးကျိၤဘၣ်ဆၣ် တၢ်ဘၣ်ယိၣ်တအိၣ်ဘၣ်. ပ၀ဲတကပၤန့ၣ် ကဟံးန့ၢ်တၢ်လီၢ်ဒီး ပခိးခးအီၤန့ၣ်လီၤ”အဂ့ၢ် KNLA ဂံၢ်ခီၣ်ထံးသုးဂ့ၢ်၀ီတၢ်ကစီၣ် စံး၀ဲန့ၣ်လီၤ.
“ဒူၣ်ဒါတကပၤ သံဒီးဘၣ်ဒိအိၣ်အါမးလီၤ. ပှၤသုးသီဖိတဖၣ်စ့ၢ်ကီးပၣ်ဃုၥ်၀ဲလီၤ. သုးဖိလၢဟ့ၣ်ဖျိးကွံၥ်စ့ၢ်ကီးအိၣ်၀ဲလီၤ. ကြုၢ်တု (၅၄၅)သုးအပူၤစ့ၢ်ကီး သုးသီ(၁၀)ဂၤဘျဲၣ် ဃ့ၢ်ဖျိးကွံၥ်၀ဲဘၣ်ဆၣ် ဘၣ်တၢ်က့ၤဖီၣ်န့ၢ်အီၤအဂ့ၢ်” စံး၀ဲန့ၣ်လီၤ.
တကးဘၣ် တၢ်ဒုးတဖၣ်ဆူၣ်၀ဲလၢ ကီးတရံးကီၢ်ဆၣ်, အ့ကၠံဟီၣ်က၀ီၤအပူၤ၀ံၤ သုးကီၣ်မံးရှၢၣ်တပၤ သံဒီးဘၣ်ဒိအိၣ်အါ၀ဲအဃိ ဂုၤက့ၤအခံအိၣ်အသိး ဟဲထီၣ်သုးကျိၤ တနံၤ ၃ဘျီ ၄ဘျီစ့ၢ်ကီးအိၣ်၀ဲအဂ့ၢ် စံး၀ဲန့ၣ်လီၤ.
Ref: SP
