လါအီကူၥ်(၂၂)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးခီၣ်မံးရှၢၣ်အသုးဒီး PNOသုးပၥ်ဖှိၣ်လၢ သုးအဂံၢ်အဘါအါအါဂီၢ်ဂီၢ်ဟဲထီၣ်သုးကျိၤဆူ ၀့ၢ်ဒံၣ်မီစိၤ, ကီၢ်ကရ့ၣ်နံၣ်အဃိ တၢ်ဒုး၀ဲဆူၣ်၀ဲ၀ံၤ တၢ်ပၢၢ်ဆၢသုးပၥ်ဖှိၣ်တပၤ ဂုၤက့ၤအခံအဂ့ၢ် တၢ်သ့ၣ်ညါဘၣ်လၢ တၢ်ပၢၢ်ဆၢသုးပၥ်ဖှိၣ်အအိၣ်န့ၣ်လီၤ.
သုးခီၣ်မံးရှၢၣ်ဒီးအသုးပၥ်ဖှိၣ်သုးကျိၤအံၤ ဖဲလါအီကူၥ်(၁၃)သီအနံၤဃၣ်ဃၣ်န့ၣ် ဟဲနုၥ်လီၤ၀ဲဆူ ဒံၣ်မီၤစိၤ၀့ၢ်ပူၤအဂ့ၢ် စံး၀ဲန့ၣ်လီၤ.
ဖဲလါအီကူၥ်(၁၈)သီအနံၤန့ၣ် တၢ်ဘၣ်သဂၢၢ်ခးလိၥ်သးအိၣ်ထီၣ်၀ဲဒီး သုးခီၣ်မံးရှၢၣ်သုးကျိၤလၢဟဲထီၣ်သုးကျိၤဒီး တၢ်ပၢၢ်ဆၢသုးပၥ်ဖှိၣ်အဘၢၣ်စၢၤ၀ံၤ တၢ်ဒုးအပူၤ သုးကီၣ်ကးတပၤ စူးကါ၀ဲ ရၢးရှါထုးထီၣ်စကီးဒြိတဖၣ်, ဒြိဖးဒိၣ်တဖၣ် ၃ခိၣ်၄ခိၣ်လၢတနံၤအတီၢ်ပူၤအသိး တကးဘၣ် စူးကါ၀ဲ ပတီၢ်ထီတၢ်သ့တၢ်ဘၣ်တဖၣ်ဒီး သုးသိလ့ၣ်ထးဒီး ကျိဖးဒိၣ်တဖၣ်အဂ့ၢ် စံး၀ဲန့ၣ်လီၤ.
“လၢပ၀ဲတကပၤတၢ်ဒုးကဲထီၣ်တ့ၢ်၀ဲအသီ(၁၀)ဘျဲၣ်ညါ.သုးကီၣ်ကးတပၤစူးကါ၀ဲပတီၢ်ထီတၢ်သ့တၢ်ဘၣ်၀ံၤဒုး၀ဲအဃိ ဘၣ်ဂုၤက့ၤအခံလၢ ဒံၣ်မီစိၤ”အဂ့ၢ် တၢ်ပၢၢ်ဆၢသုးပၥ်ဖှိၣ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
လါအီကူၥ်(၁၈)သီအနံၤလၢ တၢ်ဒုးကဲထီၣ်အပူၤ လီၢ်က၀ီၤကမျၢၢ်တၢ်ဒီသဒၢသုးအပှၤသုးဖိ(၅)ဂၤဘၣ်သံ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ. ပှၤသုးဖိလၢ လီၤတၢ်ဒုး(၅)ဂၤအကျါ တၢ်က့ၤထံၣ်န့ၣ်၀ဲထဲဒၣ်အစိၣ်(၁)စိၣ်လီၤဒီး အစိၣ်အဂၤတဖၣ်တခီ တၢ်က့ၤထံၣ်န့ၢ်အီၤလၢထံကျိပူၤဖဲ လါအီကူၥ်(၂၀)သီအနံၤန့ၣ်လီၤ.
သုးခီၣ်မံးရှၢၣ်အသုးပၥ်ဖှိၣ် က့ၤဒုးမၤန့ၢ်၀ဲ၀့ၢ်ဒံၣ်မီစိၤ၀ံၤအလီၢ်ခံ ဟီၣ်က၀ီၤလၢအဂၤတဖၣ်အပူၤစ့ၢ်ကီး ကမၤဒုးယၤရဲၣ်ကျဲၤအဂီၢ် ကတဲၥ်ကတီၤ၀ဲအဂ့ၢ် စံး၀ဲန့ၣ်လီၤ.
သုးခီၣ်မံးရှၢၣ်တကပၤနုၥ်လီၤပၢဆှၢက့ၤ၀့ၢ်ဒံၣ်မီစိၤဘၣ်ဆၣ် တမ့ၢ်လၢအပၢဆှၢန့ၢ်က့ၤခဲလၢၥ်ဘၣ်ဒီး တၢ်ဒုးဆူၣ်ထီၣ်အဖၢမုၢ်ဒီး တၢ်ပၢၢ်ဆၢသုးပၥ်ဖှိၣ်အဘၢၣ်စၢၤန့ၣ်လီၤ.
၀့ၢ်ဒံၣ်မီစိၤန့ၣ် အိၣ်၀ဲဒၣ်ဖဲ ၀့ၢ်လွဲၢ်ကီၢ်အမုၢ်နုၥ်တကပၤ၀ံၤ ဖဲဟီၣ်က၀ီၤတဖၣ်အပူၤ သုးခီၣ်မံးရှၢၣ်အံၤ ဒ်သိးကမၤ၀ဲတၢ်ဃုထၢကန့ၢ်ကသ့အဂီၢ် တၢ်ဂုၥ်ကျဲးစၢးတခါအဂ့ၢ်ဒီး ဒ်သိးကဒိၣ်စိက့ၤဟီၣ်က၀ီၤအဂီၢ် သုးခီၣ်မံးရှၢၣ်တပၤ ဒိးန့ၢ်၀ဲ ပတီၢ်ထီတၢ်သ့တၢ်ဘၣ်တဖၣ်, စုက၀ဲၤဒီးကျိချံပှၥ်သၣ်တၢ်ဆီၣ်ထွဲမၤစၢၤတဖၣ်လၢ တရူး,ရှၢးရှါ, အ့ဒံယါဒီးဘဲၣ်လၣ်ရူးထံကီၢ်တဖၣ်အအိၣ်အဂ့ၢ် Justic For Myanmarထုးထီၣ်ပၥ်ဖျါဃၥ်၀ဲန့ၣ်လီၤ.
