လါအီကူၥ်(၂၂)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကီၢ်ကၠီၣ်တဲၣ်အပူၤ တၢ်ပညိၣ်၀ဲဖိသၣ်ဒီးသူၣ်ခ့သးပှၢ်တဖၣ်၀ံၤ တၢ်လံၣ်အီၣ်လီအီၣ်ကျိၥ်စ့အိၣ်အါထီၣ်၀ဲအဃိ ပှၤလၢအသးနံၣ်အိၣ်ထဲန့ၣ်တဖၣ် အစ့းတၢးအခီးလၢသူ၀ဲတဖၣ် တၢ်ဆှၢခီကျိၥ်စ့လၢအိၣ်လဲအဂီၢ် တသီန့ၣ် တၢ်ကပျဲဒၣ်ထဲ (၅)ကလးဘး (အမဲရကၤဒီလၣ် ၁၅၃၇)လီၤအဂ့ၢ် ကၠီၣ်တဲၣ်လီၢ်ခၢၣ်သးစ့တၢး ထုးထီၣ်ဘိးဘၣ်ရၤလီၤဃၥ်၀ဲဖဲ လါအီကူၥ်(၁၉)သီအနံၤန့ၣ်လီၤ.
တၢ်ဆှၢခီကျိၥ်စ့န့ၣ် တၢ်ပၥ်ပနီၣ်ဃၥ်၀ဲအပတီၢ်သၢပတီၢ်၀ံၤ တၢတပတီၢ် ၅၀,၀၀၀ဘး(ဒီလၣ် ၁၅၃၇)အဖီလၥ်, ခံတပတီၢ် ၂၀၀, ၀၀၀ဘး (ဒီလၣ် ၆၁၄၇)အဖီလၥ်ဒီး သၢတပတီၢ် ၂၀၀,၀၀၀ဘးဆူအဖီခိၣ် တၢ်ပၥ်ပနီၣ်ဃၥ်၀ဲအဂ့ၢ်, ဒိးသန့ၤထီၣ်သးလၢ စ့တၢးအခီးတခါစုၥ်စုၥ်လၢ ပှၤလၢစူးကါအနီၢ်ကစၢ်တၢ်ဂ့ၢ်တၢ်ကျိၤအဖီခိၣ် တၢ်အိးထီၣ်အခီးအသီမ့ၢ်ဂ့ၤ, မိၣ်ဘဲစ့တၢးမ့ၢ်ဂ့ၤ ဒီးအ့ၣ်ထၣ်နဲးစ့တၢးမ့ၢ်ဂ့ၤ တၢ်ကပျဲစူးကါအီၤဖဲ စးထီၣ်လၢတလါအံၤလါလၢၥ်အဂ့ၢ် တၢ်သ့ၣ်ညါဘၣ်န့ၣ်လီၤ.
လီၢ်ခၢၣ်သးစ့တၢးအတၢ်ထုးထီၣ်ပၥ်ဖျါအဖီခိၣ် တၢ်ပၥ်ပနီၣ်တၢ်ဆှၢခီကျိၥ်စ့ဒ်အံၤန့ၣ် ခီဖျိတၢ်ကဒုးလီၤပှီၢ် ကိးနံၣ်ဒဲး ဒီလၣ်အဘံၣ်လံၣ်ယၣ်လၢဘၣ်တၢ်လံၣ်အီၣ်လီအီၣ်အီၤ အိၣ်လဲတၢ်လံၣ်တၢ်လီကျိၥ်စ့တၢ်ဖံးတၢ်မၤတဖၣ်အဂီၢ်, တၢ်ကဒီသဒၢ ပှၤဟုၣ်ကျိၥ်စ့တဖၣ် ဒ်သိးထုးထီၣ်ကျိၥ်စ့အါအါဂီၢ်ဂီၢ်သုတန့ၢ်တဘျီဃီအဂီၢ်, ပှၤလၢဘၣ်တၢ်လံၣ်လီအီၤတဖၣ် ဒ်သိးအကျိၥ်စ့တနီၤကဒိးန့ၢ်က့ၤအဂီၢ် တၢ်ပညိၣ်မၤ၀ဲဒ်အံၤအဂ့ၢ် ပၥ်ဖျါဃၥ်၀ဲန့ၣ်လီၤ.
အပူၤကွံၥ် ကၠီၣ်တဲၢ်လီၢ်ခၢၣ်သးစ့တၢးအတၢ်ပၥ်ပနီၣ်အဖီခိၣ် တသီန့ၣ် တၢ်ဆှၢခီကျိၥ်စ့တခါစုၥ်စုၥ်အဂီၢ် ၅၀,၀၀၀ဘးလၢ တၢ်စူးကါ တၢ်ကဘၣ် scan အမဲာ်သၣ်သနူ၀ံၤ ခဲလၢၥ်ပၥ်ဖှိၣ် ၂၀၀,၀၀၀ဘး တၢ်ဆှၢခီ၀ဲန့ၢ်အသိး ကီၢ်ကၠီၣ်တဲၣ်ပူၤ ပှၤလၢစူးကါ မိၣ်ဘဲစ့တၢးအခီး အိၣ်၀ဲ(၁၂)ကကွဲၢ်ဃၣ်ဃၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲအပူၤကွံၥ် လါယူၤအတီၢ်ပူၤ တၢ်လံၣ်တၢ်လီကျိၥ်စ့တၢ်မူၤတၢ်ရၢ်အိၣ်ထီၣ်၀ဲ (၂၄,၅၀၀)ဃၣ်ဃၣ်၀ံၤ စ့ယိၤခဲလၢၥ်ပၥ်ဖှိၣ် (၂.၈)ဘံၣ်လံၣ်ယၣ်(ဒီလၣ် ၈၆.၁)ကကွဲၢ် ဘၣ်တၢ်လံၣ်လီအီၤအဃိ တၢ်မူၤတၢ်ရၢ်တခါစုၥ်စုၥ်န့ၣ် စ့ယိၤ ၁၁၄,၀၀၀ဘး ဘၣ်တၢ်လံၣ်အီၤအဂ့ၢ်ဒီး အဒိၣ်ကတၢၢ် တၢ်လံၣ်တၢ်လီကျိၥ်စ့တၢ်ဆှၢခီတၢ်မူၤတၢ်ရၢ်န့ၣ် စ့ယိၤဘူးထီၣ်ဘး၀ဲတုၤ (၄.၉)ကကွဲၢ်ညါအဂ့ၢ် လီၢ်ခၢၣ်သးစ့တၢး ပၥ်ဖျါဃၥ်၀ဲန့ၣ်လီၤ.
တနံၣ်အံၤ အဆိကတၢၢ်(၆)လါအတီၢ်ပူၤ ဖိသၣ် ၇၈,၀၀၀ဘျဲၣ်လၢသးနံၣ်အိၣ်(၁၅)နံၣ်ဆူအဖီလၥ်ဒီး ၄၁၀,၀၀၀ဘျဲၣ်လၢသးနံၣ်အိၣ်(၆၅)နံၣ်ဘျဲၣ်တဖၣ် ဘၣ်တၢ်လံၣ်လီကျိၥ်စ့အဂ့ၢ် တၢ်သ့ၣ်ညါဘၣ်န့ၣ်လီၤ.
Ref: Bangkok Post
