ဘၣ်ထွဲဒီးသုးဂ့ၢ်၀ီတၢ်မၤစၢၤန့ၣ် တမ့ၢ်ကမၤစၢၤ၀ဲလၢၤ ကရၢနီတဖုလၢၤဘၣ်အဂ့ၢ် “၀”သုးမုၢ်ဒိၣ် ဆဲတဲၥ်၀ဲ

လါအီကူၥ်(၂၁)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်

“ဝ”သွံၣ်စၢဖှိၣ်သုးမုၢ်ဒိၣ်(UWSA) ထံၣ်လိၥ်သးဒီး ပလီၣ်(တအီ)ဒီကလုၥ်တၢ်ထူၣ်ဖျဲးသုးမုၢ်ဒိၣ်(TNLA), ကီၢ်ပယီၤဒံၣ်မိၣ်ကရံးတံးသိၣ်မှံသုးမုၢ်ဒိၣ်(MNDAA)ဒီး ယိၤဒိၣ်ကီၢ်စဲၣ်တၢ်လဲၤထီၣ်လဲၤထီၣ်သုးမုၢ်ဒိၣ်(SSPP) ပှၤဖီၣ်စုက၀ဲၤကရၢ(၃)ဖု ဖဲ၀့ၢ်ပၣ်ဆါ၀ံၤ ဘိးဘၣ်ရၤလီၤ၀ဲ အဖိးသဲစးသုးဂ့ၢ်၀ီတၢ်ဆၢတဲၥ်အဂ့ၢ် WSTV ပၥ်ဖျါဃၥ်၀ဲဖဲ မဟါအနံၤန့ၣ်လီၤ.

“ဝ”ကီၢ်စဲၣ် လီၢ်ခၢၣ်သးထံရူၢ်ကီၢ်သဲးပၠူၣ်ရိၣ် ထီဘီကမံးတံၥ်ကရၢဖိ ပဒိၣ်ပှၤပၢၤလီၢ်ဆ့ၣ်နီၤ ခံဂၤတဂၤ ကီၢ်ချၢတၢ်ရ့လိၥ်မုၥ်လိၥ်ကိတိၥ် Zhao Guoanန့ၣ် အ၀ဲသ့ၣ်တခီ တမ့ၢ်ကမၤစၢၤ၀ဲလၢၤ စုက၀ဲၤဒီးစုက၀ဲၤပီးလီ နီတမံၤလၢၤဘၣ်အဂ့ၢ်, သုးဂ့ၢ်၀ီတၢ်လဲၤသရံးသးမ့ၢ်ဂ့ၤ, မ့တမ့ၢ် ကရၢဖဲလဲၣ်တဖုမ့ၢ်ဂ့ၤ တၢ်ဂ့ၢ်အိၣ်ဒ်လဲၣ်ဂ့ၤ, ကိးဆၢကတီၢ်ဒဲး, တၢ်လီၢ်ဖဲလဲၣ်မ့ၢ်ဂ့ၤ, တမ့ၢ်လၢကမၤစၢၤ၀ဲလၢၤ ကျိၥ်စ့တၢ်ဆီၣ်ထွဲမၤစၢၤလၢၤဘၣ်အဂ့ၢ် စံး၀ဲန့ၣ်လီၤ.

ဘၣ်ထွဲဒီးတၢ်ဆၢတဲၥ်အံၤအဖီခိၣ် ကဘိးဘၣ်ရၤလီၤ၀ဲဆူ ထံဖိကီၢ်ဖိကမျၢၢ်အအိၣ် အဖိးသဲစး၀ံၤ တၢ်ကရၢကရိတဖၣ်တခီ တၢ်သုတဟဲဃ့ ဒ်သိးစုက၀ဲၤဒီးစဲးတၢ်ပီးတၢ်လီတဖၣ်, ကျိၥ်စ့တၢ်မၤစၢၤတဖၣ် မ့တမ့ၢ် ဘၣ်ထွဲဒီးသုးဂ့ၢ်၀ီတၢ်ဂ့ၢ်သ့ၣ်တဖၣ်” ဆူ “ဝ”ကီၢ်စဲၣ်အအိၣ်၀ံၤ တၢ်သုတဟဲမၤတံၥ်တၥ်အီၤတဂ့ၤအဂီၢ်စ့ၢ်ကီး စံး၀ဲန့ၣ်လီၤ.

ကရၢ(၃)ဖုလၢ ဟဲထီၣ်၀ဲတၢ်အိၣ်ဖှိၣ်အံၤစ့ၢ်ကီး ဘၣ်ထွဲဒီး “ဝ”အတၢ်ဆၢတဲၥ်အဖီခိၣ် နၢ်ပၢၢ်၀ဲအဂ့ၢ်န့ၣ် စံး၀ဲအဂ့ၢ် ပၥ်ဖျါဃၥ်၀ဲန့ၣ်လီၤ.

Ref:Wa Land News