လါအီကူၥ်(၁၉)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ပၣ်တံၣ်ခဲလၢၥ်ဒံၣ်မိၣ်ကရ့ၣ်စံၣ်တၢ်ဃုထၢ အကူၥ်(၁)အံၤ တၢ်ကရဲၣ်ကျဲၤမၤအီၤဖဲ ခါလၢကဟဲလါဒံၣ်စ့ဘၢၣ်(၂၈)သီအနံၤအဂ့ၢ် သုးခီၣ်မံးရှၢၣ် အကီၢ်စၢဖှိၣ်တၢ်ဃုထၢခီၣ်မံးရှၢၣ်-UEC ဘိးဘၣ်ရၤလီၤ၀ဲဖဲ လါအီကူၥ်(၁၈)သီအနံၤန့ၣ်လီၤ.
သုးခီၣ်မံးရှၢၣ်အသုးအံၤ ထံကီၢ်ဒီတဘ့ၣ်အပတီၢ် ဘၣ်ပျၢ်ကွံၥ်၀ဲ ၀့ၢ်(၉၄)ဖျၢၣ်၀ံၤ ကနီၤဖးရဲၣ်ကျဲၤ၀ဲတၢ်ဃုထၢဒ်တကူၥ်တဖၣ်အသိးဒီး အကူၥ်လၢအိၣ်တ့ၢ်တဖၣ်အဂီၢ် မုၢ်နံၤမုၢ်သီကရဲၣ်ကျဲၤမၤ၀ဲတဖၣ် ကဘိးဘၣ်ရၤလီၤကဒီး၀ဲအဂ့ၢ် လံၥ်ဘိးဘၣ်ရၤလီၤအပူၤ ပၥ်ဖျါဃၥ်၀ဲန့ၣ်လီၤ.
ဟီၣ်က၀ီၤလၢကမၤ၀ဲတၢ်ဃုထၢတဖၣ် တလါအံၤ (၁၅)သီအနံၤန့ၣ် UECဘိးဘၣ်ရၤလီၤ၀ဲ၀ံၤ ဖဲန့ၣ်အကျါ ပၣ်ဃုၥ်၀ဲစ့ၢ်ကီးဒီး ကလုၥ်ဒူၣ်ပှၤဖီၣ်စုက၀ဲၤကရၢဒီး တၢ်ပၢၢ်ဆၢကရၢတဖၣ် ထီၣ်ဒုးမၤန့ၢ်ပၢဆှၢဃၥ် ဟီၣ်က၀ီၤတဖၣ်စ့ၢ်ကီး ပၣ်ဃုၥ်၀ဲန့ၣ်လီၤ.
သုးခီၣ်မံးရှၢၣ်အံၤ ကရဲၣ်ကျဲၤမၤ၀ဲ တၢ်ဃုထၢအံၤဒ် တၢ်မၤန့ၢ်တၢ်ဖးအအါကတၢၢ်သနူ(FPTP), တၢ်ကၢကီၣ်သဃီၤလိၥ်သးသနူ(PR), တၢ်ဃါဃုၥ်ခၢၣ်စးသနူ(MMP)တဖၣ်အသိးအဂ့ၢ် စံး၀ဲန့ၣ်လီၤ.
တၢ်ဃုထၢလၢသုးကီၣ်ကးကမၤ၀ဲအံၤန့ၣ် ပၣ်တံၣ်လၢကနုၥ်လီၤထိၣ်သတြီၤတၢ်အိၣ်၀ဲ အဖု(၅၀)၀ံၤ ကၠးခဲၣ်ယ့ပၣ်တံၣ်-USDP, အူကိၣ်ကိၣ်ကၠံတီၣ်ခိၣ်ရိၣ်မဲ ပၠံၣ်သူးပၣ်တံၣ်ဒီး ဒီၣ်သဲးသဲးခဲၣ်တီၣ်ခိၣ်ရိၣ်မဲ ပၠံၣ်သူးရှ့းဆီၣ်ပၣ်တံၣ်တဖၣ်စ့ၢ်ကီး ကတဲၥ်ကတီၤပၥ်သးလၢ ကနုၥ်လီၤထိၣ်သတြီၤတၢ်အဂီၢ်န့ၣ်လီၤ.
မ့မ့ၢ်လၢ ကလုၥ်ဒူၣ်ပှၤဖီၣ်စုက၀ဲၤကရၢတဖၣ်ဒီးတၢ်ပၢၢ်ဆၢဂံၢ်ဘါကရူၢ်တဖၣ်တခီ တၢ်သုတပၣ်ဃုၥ်ပၣ်ဂီၤလၢ သုးခီၣ်မံးရှၢၣ်အံၤ တၢ်ဃုထၢအယီၤအဘျၣ်အပူၤဒီး ကထီဒါပၢၢ်ဆၢတၢ်အဂီၢ် ဆီၣ်တခုထီၣ်ဃၥ်၀ဲန့ၣ်လီၤ.
