သုးခီၣ်မံးရှၢၣ်လဲၤတ့ၢ်လီၤမ့ၣ်ပိၢ်ဖဲမိၤခံလီၢ်က၀ီၤအဃိ ကမျၢၢ်(၃၂)ဂၤဘၣ်သံ၀ဲအဖီခိၣ် ဟီၣ်ခိၣ်ဘီမုၢ်ထံကီၢ်တဖၣ် ကဟံးန့ၢ်ဂ့ၢ်၀ီအဂီၢ် IECဆီၣ်တခုထီၣ်

လါအီကူၥ်(၂၀)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်

တနံၣ်အံၤအတီၢ်ပူၤ သုးခီၣ်မံးရှၢၣ်အသုး လဲၤဒုးခးလီၤတၢ်လၢကလံၤကျါဖဲ ကီၢ်ကရ့ၣ်နံၣ်, မိၤခံလီၢ်က၀ီၤပူၤအိၣ်ထီၣ်၀ဲ(၁၁)ဘျီ၀ံၤ ဖဲအပူၤကွံၥ်လါအီကူၥ်(၁၇)သီအနံၤ လဲၤဒုးတ့ၢ်လီၤမ့ၣ်ပိၢ်အပူၤ ကမျၢၢ်(၃၂)ဂၤ ဘၣ်သံ၀ဲဒီဒူၣ်ဒီထၢ၀ံၤ (၅)ဂၤဘၣ်ဒိ၀ဲဒီး ကမျၢၢ်တနီၤဘၣ်လီၤမၢ်ကွံၥ်၀ဲအဂ့ၢ် ကရ့ၣ်နံၣ်တၢ်ဘၢၣ်စၢၤပၢပြးကီၣ်ကး(IEC) ထုးထီၣ်ပၥ်ဖျါဃၥ်၀ဲဖဲ လါအီကူၥ်(၁၉)သီအနံၤန့ၣ်လီၤ.

လါအီကူၥ်(၁၇)သီအနံၤ, ဂီၤ(၇း၅၀)နၣ်ရံၣ်ဒီး (၁၂)နၣ်ရံၣ်ဃၣ်ဃၣ်အဆၢကတီၢ် သုးခီၣ်မံးရှၢၣ်အသုး လဲၤဒုးတ့ၢ်လီၤမ့ၣ်ပိၢ်အပူၤ ဘၣ်၀ဲတၢ်ဆါဟံၣ်ဒီးကမျၢၢ်အိၣ်ဟံၣ်ဃီတဖၣ်၀ံၤ တၢ်သံတၢ်ပှၢ်ဒီးတၢ်ဘၣ်ဒိဘၣ်ထံးတဖၣ်အိၣ်ထီၣ်၀ဲအဃိ ဘီမုၢ်စၢဖှိၣ်ကရၢဒီးအၣ်စံၣ်ယၣ်ပၣ်ဃုၥ် ဟီၣ်ခိၣ်ဘီမုၢ်ထံကီၢ်တဖၣ်တခီ ကဟံးန့ၢ်ဂ့ၢ်၀ီ တဖိးသဲစးသုးကရူၢ်အံၤလၢ မၤကမၣ်သုးကွီၢ်မ့ၣ်အံၤအဖီခိၣ် တုၤလီၤတီၤလီၤအဂီၢ် IECဆီၣ်တခုထီၣ်ဃၥ်၀ဲန့ၣ်လီၤ.

မီၤစိရိၤပယီၤသုးမုၢ်ဒိၣ် အကလံၤကျါတၢ်ဒုးခးလီၤတၢ်တဖၣ်န့ၣ် မၤ၀ဲဖဲ  ကီၢ်ကရ့ၣ်နံၣ်ပၣ်ဃုၥ် ထံကီၢ်ဒီတဘ့ၣ်အပူၤ၀ံၤ သုးဂ့ၢ်၀ီအဖီခိၣ်မၤ၀ဲတၢ်ဆီၣ်သနံးအဂ့ၢ် IECနဲၣ်ရွဲၣ်သဃဲၤ(၂) အူပညါခိၣ်အီၣ် စံး၀ဲန့ၣ်လီၤ.

ကရ့ၣ်နံၣ်ဒီကလုၥ်တၢ်ဒီသဒၢသုး(KNDF)ပၣ်ဃုၥ် သိၣ်မှံတၢ်ပၢၢ်ဆၢသုးတဖၣ်ပၢဆှၢဃၥ် စၢၤပူၤထးပူၤတၢ်မၤလီၢ်အိၣ် မိၤခံလီၢ်က၀ီၤအံၤန့ၣ်စးထီၣ်ဖဲလါယူၤလံၤလံၤန့ၣ်မိၤစိရိၤပယီၤအသုးလဲၤဒုးတ့ၢ်လီၤတၢ်လၢကလံၤကျါအိၣ်ထီၣ်၀ဲတပယူၥ်ဃီန့ၣ်လီၤ.

ဖဲအပူၤကွံၥ် လါယူၤ(၂၅)သီအနံၤစ့ၢ်ကီး လဲၤတ့ၢ်မ့ၣ်ပိၢ်အဃိ စၢၤပူၤထးပူၤပှၤမၤတၢ်ဖိ တစှၤန့ၢ်(၇)ဂၤဘၣ်သံ၀ဲ၀ံၤ (၂၀)ဘျဲၣ် ဘၣ်ဒိ၀ဲန့ၣ်လီၤ.

ဒ်သိး သုးခီၣ်မံးရှၢၣ်အသုးပညိၣ်ဒုး မိၤခံလီၢ်က၀ီၤအပူၤအိၣ် ကမျၢၢ်ဖိတဖၣ်တကးဘၣ် ပညိၣ်ဒုး၀ဲစ့ၢ်ကီး စၢၤပူၤထးပူၤတၢ်မၤလီၢ်တဖၣ်န့ၣ် မ့ၢ်ဒၣ်အဲၣ်ဒိးဟ့ၣ်ဆီၣ်သနံး၀ဲ မုၥ်ကျိၤ၀ဲၤကွၥ်၀ံၤ ကမၤဟးဂီၤကွံၥ် တၢ်ပၢၢ်ဆၢဂံၢ်ဘါကရူၢ်တဖၣ် အတၢ်ကျိၥ်စ့ဟဲနုၥ်လီၤအကျိၤအဂ့ၢ် တၢ်ပဲၥ်ထံနီၤဖးတဖၣ်စ့ၢ်ကီးအိၣ်ထီၣ်၀ဲန့ၣ်လီၤ.

ဘြံးတံးခိၣ်လိၣ်နံၣ်ပၢတၢ်အစိၤလံၤလံၤဒီးတုၤမုၢ်မဆါတနံၤ နံၣ်(၁၀၀)ဘျဲၣ် တၢ်မၤစၢၤပူၤထးပူၤတၢ်ဖံးတၢ်မၤတဖၣ်လၢ မိၤခံစၢၤပူၤထးပူၤတၢ်မၤလီၢ်တဖၣ်အံၤ မိၤစိရိၤပယီၤသုးကရူၢ်အတၢ်ပၢဖီလၥ် ကီၢ်ပယီၤစံပွါယ့အူပဲၣ်လံမံၣ်တဲး မၤတ့ၢ်၀ဲဖဲ ၂၀၀၂တုၤ၂၀၂၄နံၣ်အတီၢ်ပူၤ၀ံၤ ၂၀၂၄နံၣ်စးထီၣ်သီန့ၣ် တၢ်ပၢၢ်ဆၢဂံၢ်ဘါကရူၢ်တဖၣ် ဒိၣ်စိပၢဆှၢက့ၤ၀ဲ ဟီၣ်က၀ီၤအံၤန့ၣ်လီၤ.

ကတီၢ်ခဲအံၤတခီ ခီဖျိသုးကရူၢ်အံၤအသုး မၤကလံၤကျါတၢ်ဒုးတဖၣ်အဃိ ပှၤမၤတၢ်ဖိလၢဟဲမၤတၢ်ဖဲ စၢၤပူၤထးပူၤတၢ်မၤလီၢ်တဖၣ် က့ၤဆူအိၣ်ဆိးလီၢ်ကျဲအိၣ်အသိး တၢ်ဆါတၢ်ပှ့ၤကျးတဖၣ်စ့ၣ်ကီး ကးတံၥ်ဃၥ်၀ဲအဂ့ၢ် စံး၀ဲန့ၣ်လီၤ.

သုးခီၣ်မံးရှၢၣ်အံၤ ဖဲအပူၤကွံၥ် လါယူၤစ့ၢ်ကီး က့ၤပၢဆှၢက့ၤ၀ဲ ကီၢ်ကရ့ၣ်နံၣ်, ၀့ၢ်မိပၠဲ၀ံၤအလီၢ်ခံ တချူးလၢတၢ်ဃုၢအဆၢကတီၢ် ကဒိၣ်စိက့ၤဟီၣ်က၀ီၤလၢအိၣ်တ့ၢ်တဖၣ်အဂီၢ် ဟဲထီၣ်သုးကျိၤတဖၣ်အိၣ်၀ဲအဃိ ဒံၣ်မီစိၤဒီးဖၣ်ဆီကီၢ်ဆၣ်တဖၣ်အပူၤ တၢ်ဒုးကဲထီၣ်သးတဖၣ်အိၣ်ထီၣ်၀ဲကိးမုၢ်နံၤလီၤအဂ့ၢ် တၢ်သ့ၣ်ညါဘၣ်လၢ လီၢ်က၀ီၤဖိတဖၣ်အအိၣ်န့ၣ်လီၤ.

Ref: The Irrawaddy