လါအီကူၥ်(၁၁)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
တလၢၤကီၢ်စဲၣ်, ကၠဲးထိၣ်ကီၢ်ဆၣ်, လၢၢ်ကတံၤ၀့ၢ်အပူၤ ဖဲ၂၀၂၅နံၣ်, လါအီကူၥ်၈သီအနံၤ ထဲတသီအတီၢ်ပူၤ ပှၤဘူးထီၣ်၄၀ဃၣ်ဃၣ်ဘၣ်တၢ်ဖီၣ်အီၤ၀ံၤဖဲန့ၣ်အကျါပၣ်ဃုၥ်စ့ၢ်ကီးပှၤစံၣ်သုးပှၤလီၤအိၣ်ကမှံဖိတဖၣ်အဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
ဖဲအနံၤ ဂီၤ၁၀နၣ်ရံၣ် အဆၢကတီၢ်ဃၣ်ဃၣ် သုးဒီးပၢၤကီၢ်သုးလၢဂံၢ်ဘါအိၣ်၂၀ဘျဲၣ်အံၤ ဟဲနုၥ်လီၤဖီၣ်၀ဲ ပှၤစံၣ်သုးပှၤလီၤအိၣ်ကမှံဖိ၁၅ဂၤလၢ ဟဲအိၣ်ကဒု ဖဲ၀့ၢ်လၢၢ်ကတံၤ(သ့ၣ်စယဲး) “လိၣ်ယၣ်ပၠ့းပှၤတ၀ၢတၢ်မၤစၢၤကရၢ”အလီၢ် န့ၣ်လီၤ.
၀ံၤအလီၢ်ခံ မုၢ်ထူၣ်၁၂နၣ်ရံၣ်အဆၢကတီၢ်ဃၣ်ဃၣ်စ့ၢ်ကီး က့ၤဖီၣ်၀ဲ ပိၥ်ခွါဒီးပိၥ်မုၣ်လၢတစှၤန့ၢ် ၂၂ဂၤလၢကူသိးဆ့ကၤသူတဖၣ် လၢ၀့ၢ်လၢၢ်ကတံၤ(သ့ၣ်စယဲး) က၀ီဒ့ကျဲမုၢ်တဖၣ်အဖီခိၣ်န့ၣ်လီၤ.
ပှၤသးစၢ်လၢဘၣ်တၢ်ၣ်ဖီၣ်အီၤတဖၣ်န့ၣ် မ့ၢ်ပှၤတဖၣ်လၢအိၣ်ဖဲ ၀့ၢ်လၢၢ်ကတံၤ(သ့ၣ်စယး) ယွၣ်မးက၀ီၤဒ့အပူၤတဖၣ်အအါကတၢၢ်လီၤဒီး မ့မ့ၢ်ပှၤလီၤအိၣ်ကမှံဖိတဖၣ်တခီ မ့ၢ်လီၢ်က၀ီၤဖိတဖၣ်လၢအိၣ်ဖဲ ကွ့ဆ့း, ရှါစူး, ညီၣ်ခၠ့ၣ်ထီး, ၀့ကၣ်သ၀ီတဖၣ်အပူၤအဂ့ၢ် စံး၀ဲန့ၣ်လီၤ.
ပှၤလၢဘၣ်တၢ်ဖီၣ်ဃၥ်အီၤတဖၣ်န့ၣ် တၢ်ပၥ်အီၤဖဲ ၀့ၢ်လၢၢ်ကတံၤပၢၤကီၢ်သုးဒီး လၢၢ်ကတံၤအိၣ်သူၣ်လီၤ နီၣ်ဂံၢ်(၂၀၇)ခီၣ်ချ့သုးရ့ၣ်သုး၀ဲၤလီၢ်ခိၣ်သ့ၣ်အပူၤ၀ံၤတၢ်တဟ့ၣ်တၢ်ပျဲလၢကထံၣ်လိၥ်သးဒီးအဟံၣ်ဖိဃီဖိတဖၣ်ဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်ဖီၣ်အီၤဒ်အံၤန့ၣ် ခီဖျိလၢတၢ်လိၣ်ဘၣ်သုးသီအဖီခိၣ် ဘၣ်တၢ်ဖီၣ်၀ဲအဂ့ၢ် လီၢ်က၀ီၤဖိတဖၣ် ပဲၥ်ထံနီၤဖး၀ဲန့ၣ်လီၤ.
ဖဲအပူၤကွံၥ် လါယူၤလံ၃၀သီအနံၤစ့ၢ်ကီး သုးခီမံးရှၢၣ်အသုး အဂံၢ်အဘါအါအါဂီၢ်ဂီၢ် ဟဲနုၥ်လီၤဖီၣ် ပှၤသးစၢ်တဖၣ်လၢအိၣ်ဖဲ တလၢၤကီၢ်စဲၣ်, သထူၣ်ကီၢ်ဆၣ်, ပတ့ၣ်ယိသ၀ီပၣ်ဃုၥ် ပှၤသ၀ီဖိ၄၀ဂၤဃၣ်ဃၣ်အဂ့ၢ်၀ံၤတုၤမုၢ်မဆါတနံၤအံၤန့ၣ် ဘၣ်တၢ်ပျၢ်ကဒါက့ၤအီၤတအိၣ်ဒံးဘၣ်န့ၣ်လီၤ.
Ref: TLT
