လါအီကူၥ်(၇)သီ, ၂၀၂၅ နံၣ်, အၣ်ထူခ့ၣ်တၢ်ကစီၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်ကဝီၤ, ချၢၣ်လွံၢ်ထူၣ်ကီၢ်ရ့ၣ်, ဆီထံးကီၢ်ဆၣ်အပူၤ စးထီၣ်ဖဲ ၂၀၂၅ နံၣ်, လါယူၤလံ(၂၄)သီအနံၤ ထံဒိၣ်လုၢ်ဘၢတၢ်အဃိ သဝီလီၤဘျၢကွံၥ်ဝဲ ဘူးထီၣ်လၢ(၄၀)ဖျၢၣ် ဃၣ်ဃၣ်အမဲၥ်ညါ ခီဖျိပှၤကၠိဖိတဖၣ် ထီၣ်ကၠိတသ့လၢၤအဖီခိၣ် တၢ်ဘၣ်ပတုၥ်ကွံၥ်ကၠိတစိၢ်တလီၢ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သး ပၥ်ဖျါဃၥ်၀ဲန့ၣ်လီၤ.
တကးဒံးဘၣ်အမဲၥ်ညါ ခီဖျိကလံၤမုၢ်လီၤဒီးမၤဘၣ်ဒိဘၣ်ထံးတၢ်အဃိ ဟံၣ်(၁၁)ဖျၢၣ် ဟးဂီၤကွံၥ်ဝဲအဂ့ၢ် တၢ်သ့ၣ်ညါဘၣ်န့ၣ်လီၤ.
စးထီၣ်လၢ ၂၀၂၅ နံၣ်, လါယူၤလံ(၂၄)သီနံၤ ထံဒိၣ်လုၢ်ဘၢတၢ်အဃိ ဃိၣ်လိၥ်ကျိမုၢ်နုၥ်တပၤဒီး မုၢ်ထီၣ်တပၤသဝီတဖၣ် လီၤဘျၢကွံၥ်ဝဲန့ၣ်လီၤ.
လၢတၢ်န့ၣ်အဃိ ကဝီၤ(၃)ဟီၣ်ကဝီၤအပူၤ သ၀ီ၄ဖျၢၣ်လၢအမ့ၢ် ညီၣ်သၣ်ယၣ်သဝီ, ဖါဘီၣ်သဝီ, ညီၣ်ခၠ့ၣ်ထီးဒီးကၠိၣ်ခၠီသဝီတဖၣ်လၢဟံၣ်ခိၣ်အိၣ်(၅၀၀)ဘျဲၣ်ထံလုၢ်ဘၢကွံၥ်ဝဲလၢအပၥ်ဃုၥ်ဒီးစံၥ်အ့ကၢၣ်(၁၆၉၅.၃၉)အ့ကၢၣ်အဂ့ၢ် KNU တၢ်ကစီၣ်တၢ်ပၥ်ဖျါအဖီခိၣ် တၢ်သ့ၣ်ညါဘၣ်န့ၣ်လီၤ
မ့မ့ၢ်လၢ ကဝီၤ(၁)ဟီၣ်ကဝီၤအပူၤတခီ သ၀ီ(၃၄)ဖျၢၣ်ထံလုၢ်ဘၢကွံၥ်အီၤဒီး ကၠိသ့ၣ်တဖၣ်စ့ၢ်ကီး တၢ်ထီၣ်ကၠိတသ့လၢၤဘၣ်အဖီခိၣ် တၢ်ပတုၥ်ဃၣ်အီၤအဂ့ၢ် တၢ်သ့ၣ်ညါဘၣ်န့ၣ်လီၤ.
၂၀၂၅ နံၣ်, လါယူၤလံ(၂၆)သီအပူၤ ကလံၤမုၢ်ဖးဒိၣ်လီၤဆူၣ်ဆူၣ်အဃိ ဆီထံးကီၢ်ဆၣ်, ကဝီၤ(၁)ဟီၣ်ကဝီၤအပူၤ ဝဲၢ်ပၠ့ၣ်ယ့ၣ်ကရူၢ်ဒူသဝီ, ဆဲးရှံးလၣ်သဝီ ကိၣ်အီၣ်မ့ထိဒီး ကိၣ်မၠိအီၣ် အဟံၣ်(၂)ဖျၢၣ်, ယိတါသဝီအပူၤ အူလးအူ, အူတ့း, အူန့ၢ်လ့အူဒီး ကိၣ်လိၣ် သ့ၣ်တဖၣ်အဟံၣ် ခဲလၢၥ်(၆)ဖျၢၣ် ဟးဂီၤလီၤပှီၢ်ကွံၥ်ဝဲန့ၣ်လီၤ.
ဒ်န့ၣ်အသိး ကဝီၤ(၃)ဟီၣ်ကဝီၤ, ကၠိၣ်ခၠီသဝီအပူၤတခီ သ၀ီဖိတဖၣ်လၢအမ့ၢ် ကလါကၠံ, အူသ့လွ့ၣ်, သးစ့ၣ်အူ, အူသါစိ သ့ၣ်တဖၣ် အဟံၣ်လီၤပှီၢ်ဟးဂီၤကွံၥ်ဝဲဒၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးတၢ်ကစီၣ်တၢ်ပၥ်ဖျါအဖီခိၣ် တၢ်သ့ၣ်ညါဘၣ်န့ၣ်လီၤ.
