လါအီကူာ်(၇)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
တနီသရံၣ်ကီၫ်ခီ,ဘျံး-ဒ၀ဲၫ်ကီၫ်ရ့ၣ်အပူၤ တၫ်ဃုထၢလၢတၫ်ကမၤ၀ဲလၢသုးမီၤစိရိၤအတၫ်စိကမီၤကအိၣ်ဂၢၫ်ဆိးကျၢၤအဂီၫ်အံၤ တဟ့ၣ်တၫ်ပျဲဘၣ်အဂ့ၫ် ကညီဒီကလုာ်စၢဖှိၣ်ကရၢ(KNU),သုးက့နီၫ်ဂံၫ်(၄)ပှၤဘၣ်မူဘၣ်ဒါတဲ၀ဲလီၤ.
ကီၫ်ပယီၤပူၤ ကီၫ်ဆၣ်ခဲလၢာ်ပာ်ဖှိၣ် ၂၀၀ဘျဲၣ်အပူၤ တၫ်ဃုထၢန့ၣ် နီၤဖးလီၤ၀ဲဒီးကမၤ၀ဲ ဖဲ ၂၀၂၅နံၣ်,လါဒံၣ်စဲဘၢၣ် ဒီး၂၀၂၆နံၣ်လါယနူၤအါရံၤတဖၣ်အပူၤအဂ့ၫ်သုးဟံးန့ၫ်ထံကီၫ်တၫ်စိတၫ်ကမီၤအခိၣ် မ့အီၣ်လဲၣ်တဲဃာ်၀ဲလီၤ.
ဘၣ်ဆၣ်သနာ်က့ ကညီဒီကလုာ်စၢဖှိၣ်ကရၢ(KNU)တၫ်ပၢဟီၣ်က၀ီၤလၢအမ့ၫ် တနီသရံၣ်,ဘျံး-ဒ၀ဲၫ်ကီၫ်ရ့ၣ်အပူၤ တမ့ၫ်ကပျဲမၤ၀ဲတၫ်ဃုထၢဘၣ်အဂ့ၫ် သုးက့နီၫ်ဂံၫ်(၄)ဘျံး-ဒ၀ဲၫ်ကီၫ်ရ့ၣ်နဲၣ်ရွဲၣ်သဃဲၤ ပဒိၣ်စီၤအဲၣ်နၤတဲ၀ဲလီၤ.
“တၫ်ဃုထၢလၢသုးခီၣ်မံးရှၢၣ်ကမၤ၀ဲန့ၣ် KNUတတူၫ်လိာ်ဘၣ်.တၫ်တမ့ၫ်ကျိၤကျဲလၢ တၫ်ဒုးအိၣ်ထီၣ်ကီၫ်ပယီၤဒံၣ်မိၣ် ကရ့ၣ်စံၣ်သနူန့ၣ်ဘၣ်.မ့ၫ်ဒ်သိးသုးမီၤစိရိၤတဖၣ် အတၫ်စိတၫ်ကမီၤကအိၣ်ဂၢၫ်ဆိးကျၢၤအဂီၫ်လီၤ.လ့ၤတက့ၤပတူၫ် လိာ်တသ့ဘၣ်.ပတၫ်ပၢဟီၣ်က၀ီၤပူၤဒု မၤ၀ဲတသ့ဘၣ်.ပထီဒါလီၤ.ထံဖိကီၫ်ဖိကမျၢၫ်အါတက့ၫ်စ့ၫ်ကီး အသးတအိၣ် ဟ့ၣ်တၫ်ဖးဘၣ်.တၫ်န့ၣ်အဃိ ကအိၣ်ဆၢထၢၣ်လၢတၫ်ပၢၫ်ဆၢတကပၤဒီးကမျၢၫ်တဖၣ် တၫ်ခွဲးတၫ်ယာ်လၢမၤန့ၫ်မၤသ့ တဖၣ်ကမၤဒၣ်၀ဲ.သုးပဒိၣ်န့ၣ်ပတတူာ်လိာ်အီၤလၢဖိးသဲစးဘၣ်.မ့ၫ်ဒၣ်ဒ်သိး အသနူအၢသီအံၤ တၫ်စိကမီၤကအိၣ်ဂၢၫ် ဆိးကျၢၤအဂီၫ်န့ၣ်လီၤ.”
၂၀၂၅နံၣ်,လၢတနီသရံၣ်ကီၫ်ခီ,ဘျံး-ဒ၀ဲၫ်ကီၫ်ရ့ၣ်အပူၤ ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA)သုးဖိတဖၣ်, တလၢၤတၫ်ပၢၫ်ဆၢဂံၫ်ဘါကရၢတဖၣ်,ဒုးယၤ ၃၃ အစုတီၤဖီလာ်သုးဖိတဖၣ်,ဒ၀ဲၫ်လီၫ်က၀ီၤသုး,PDF,ပကဖသုးဒီးလီၫ်က၀ီၤတၫ်ပၢၫ်ဆၢသုးတဖၣ် ပာ်ဖှိၣ်ထီၣ်သး၀ံၤ မၤဆူၣ်ထီၣ်သုးဂ့ၫ်၀ီဒုးဃီၤ၀ဲသုးကီၣ်ကးန့ၣ်လီၤ.
တၫ်ဃုထၢလၢသုးပဒိၣ်ရဲၣ်ကျဲၤကမၤ၀ဲ သုတကဲထီၣ်အဂီၫ် ကတြီဆၢ၀ဲလၢကျဲအကလုာ်ကလုာ်အဂ့ၫ် ကီၫ်ခီလီၤဆီ ဒုးယၤ ၃၃ ဒုးယၤခိၣ် စီၤဒါကိၣ် တဲ၀ဲန့ၣ်လီၤ.
“တၫ်မၤတၫ်ဃုထၢအလီၫ်တအိၣ်ဘၣ်.အိၣ်ဒၣ်နဲၣ်ဃီၤကျိဒီးမၢကမျၢၫ်ဖၢနုာ်တၫ်ဖးလီၤ.တမ့ၫ်တၫ်ဃုထၢဒၢး.တၫ်အံၤအ၀ဲကိးဂၤဒဲးထံၣ်တ့ၫ်လံန့ၣ်လီၤ.အ၀ဲပှၤတၫ်ပၢၫ်ဆၢဖိတဖၣ်တခီပတဲဃာ်ပျီပျီလံ.မၤတၫ်ဃုထၢတန့ၫ်ဘၣ်.တမ့ၫ်စ့ၫ်ကီးတၫ်ဃုထၢလၢအတီအတြၫ်ဘၣ်.မၤ၀ဲအလီၫ်တအိၣ်ဘၣ်န့ၣ် ပတဲဃာ်လၢဖိးသဲစးအပူၤလီၤ.ပ၀ဲဒုလီၤတံၫ်လီၤ.ကတြီဆၢ လၢကျဲအကလုာ်ကလုာ်အပူၤလီၤ.ပဘိးဘၣ်ရၤလီၤတ့ၫ်ဃာ်အသိးဒီးမ့ၫ်တၫ်လၢပတဲတ့ၫ်ဃာ်န့ၣ်လီၤ”.
လၢကတီၫ်အံၤစ့ၫ်ကီး တနီသရံၣ်ကီၫ်ခီ,ဘျံး-ဒ၀ဲၫ်ကီၫ်ရ့ၣ်,သုးက့နီၫ်ဂံၫ်(၄)ဟီၣ်က၀ီၤအပူၤ ကၠီၣ်တဲၣ်-ပယီၤကီၫ်ဆၢ လၢအမ့ၫ် ထံခံကီၫ်ဆၢ,မီတီၣ်ကီၫ်ဆၢဒီတကျိၤ သုးကီၣ်ကးအသုးကလၢၤတဖၣ် ဘူးကလၢာ်ဃၣ်ဃၣ် KNLAဒီး တၫ်ပၢၫ်ဆၢသုးပာ်ဖှိၣ်တဖၣ် ထီၣ်ဒုးမၤန့ၫ်ဃာ်၀ဲလီၤ.
ဒ်န့ၣ်အသိး ဒ၀ဲၫ်-ဘျံး-ကီးသီ နီၫ်ဂံၫ်(၈) ကျဲမုၫ်ဒီတကျိၤစ့ၫ်ကီး ပၢဆှၢဃာ်၀ဲလီၤ.ကတီၫ်အံၤ အိၣ်တ့ၫ်ဒၣ်ထဲ နးအ့ၣ်တီၣ် သုးကလၢၤဒီးမီတီၣ်သုးတလၢၤ(၂)ဖျၢၣ်ဧိၤလီၤအဃိ တၫ်န့ၫ်ပၢဃာ်ဟီၣ်က၀ီၤ(၆၀)မျးကယၤဆူအဖီခိၣ်လံအဂ့ၫ် ပှၤ ဘၣ်မူဘၣ်ဒါတဖၣ်တဲ၀ဲလီၤ.
Ref: DVB
