လါယူၤလံ(၃၁)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ဖဲတယံာ်ဒံးဘၣ်အတီၫ်ပူၤ တၫ်ကဲထီၣ်တ့ၫ်အသးလၢ ကၠီၣ်တဲၣ်-ခဲၣ်ဘီဒံယါ ထံကီၣ်ခံဘ့ၣ်ကီၫ်ဆၢတၫ်ဒုးတၫ်သဘံၣ် သဘုၣ်အပူၤ ပှၤလၢအတၫ်ရ့လိာ်ဘူးဒီးကီၫ်ခဲၣ်ဘီဒံယါကိတိာ်ခိၣ်ကျၢၫ်လီၫ်လံၤ ဟိၣ်ဆၣ်, သုးခိၣ်ကျၢၫ်ဒိၣ်စိ(၁)ဂၤ ဘၣ်သံ၀ဲအဂ့ၫ် ဖဲလါယူၤလံ(၃၀)သီအနံၤန့ၣ် Bangkok Postတၫ်ကစီၣ်ပာ်ဖျါ၀ဲလီၤ.
သုးခိၣ်ကျၢၫ်ဒိၣ်စိ ဆရံၣ်ဒး အတၫ်သံတၫ်ပှၫ်န့ၣ် ခဲၣ်ဘီဒံယါသုးဂ့ၫ်ခီၣ်ထံးတၫ်ကစီၣ်တခါ ပာ်ဂၢၫ်ပာ်ကျၢၤ၀ဲ ဖဲအပူၤကွံာ်မုၫ်ခံနံၤ၀ံၤ အ၀ဲန့ၣ်လၢခဲၣ်ဘီဒံယါသုးမုၫ်ဒိၣ်ဒီး၀ံစိာ်တီဆှၢသုးတြိၤ(၃)န့ၣ် မ့ၫ်ပှၤဘၣ်မူဘၣ်ဒါခံဂၤတဂၤအဂ့ၫ် တဲ၀ဲလီၤ.
သုးခိၣ်ကျၢၫ်ဒိၣ်စိ ဆရံၣ်ဒးန့ၣ် ထံကီၫ်ခံဘ့ၣ် တၫ်သဘံၣ်သဘုၣ်ဆူၣ်ထီၣ်အဃိ တၢၣ်ပီၣ်တဲသကိးတၫ်ဒီး ကီၫ်ကၠီၣ် တဲၣ်,ဆူၣ်ရၣ်နရံၣ်သုး၀ဲၤလီၫ်ခိၣ်သ့ၣ် သုးခိၣ်ကျၢၫ်ဂီၫ်ဂ့ၫ် ဆိၣ်ဖီးဖၣ်ရၣ်၀့းအသိး အပူၤကွံာ် ၂၀၁၁နံၣ် ဟီၣ်ခိၣ်တၫ်န့ၫ်သါတၫ်လီၫ်လၢအမ့ၫ် ထံကီၫ်ခံဘ့ၣ်ကီၫ်ဆၢအပူၤ ပရံၣ်ယၣ်ဘံၣ်ဟၣ်တၫ်ဘူၣ်တၫ်ဘါတၫ်သူၣ်ထီၣ်လီၫ်လံၤ တၫ်န့ၫ်ပၢ ဘၣ်အဂီၫ် တၫ်သဘံၣ်သဘုၣ်၀ဲန့ၣ်အပူၤစ့ၫ်ကီး အ၀ဲပာ်ဃုာ်၀ဲအဂ့ၫ် တၫ်ကစီၣ်ပူၤ ပာ်ဖျါ၀ဲလီၤ.
ဘၣ်ထွဲဒီးအတၫ်သံတၫ်ပှၫ်အဖီခိၣ် ကၠီၣ်တဲၣ်ကိတိာ်ခိၣ်ကျၢၫ်အပှၤဟ့ၣ်ကူၣ်တၫ် ကၠၣ်ခရၣ်ပီးဖၣ်ခဲတခီ”ကၠီၣ်တဲၣ် အတၫ်ဒုးဆၢအဃိ ခဲၣ်ဘီဒံယါ သုးခိၣ်ကျၢၫ်ဒိၣ်စိ ဆရံၣ်လၢဘၣ်သံအံၤ ထံကီၫ်ခံဘ့ၣ်အဘၢၣ်စၢၤ တၫ်ဂာ်သွံၣ်ဂာ် စီၤကဲကထီၣ်အဂီၫ် မ့ၫ်ပှၤဆီၣ်တခူထီၣ်တၫ်တဂၤလီၤန့ၣ် တချူးသးပ့ၤနီၣ် ဘၣ်မၤနီၣ်မၤဃါဃာ်အဂ့ၫ်” ကွဲးဖျါဃာ် ၀ဲလၢအFacebookအသိး, ဟီၣ်က၀ီၤလၢတၫ်ဂ့ၫ်လိာ်ဘှီလိာ်ကဲထီၣ်လၢအမ့ၫ် မၠးတရံးကၣ်ဟီၣ်က၀ီၤ Tri Muk Pavilionအပူၤ ပှၤတီခိၣ်ရိၣ်မဲမၤတၫ်ဒ့တၫ်အူတၫ်သူၣ်၀ံၣ်သးဆၢအမူးစ့ၫ်ကီး မ့ၫ်အမါလီၤအဂ့ၫ် တဲ၀ဲန့ၣ်လီၤ.
ဘၣ်ထွဲဒီးတၫ်မၤတဖၣ်အံၤအဖီခိၣ် ကၠီၣ်တဲၣ်သုးဘၣ်မူဘၣ်ဒါတဖၣ် ဟ့ၣ်ပလီၫ်ဃာ်၀ဲဘၣ်ဆၣ် သုးခိၣ်ကျၢၫ်ဒိၣ်စိ ဆရံၣ်ဒးန့ၣ် လၢတၫ်ပာ်ပနီၣ်ဃာ်ကၠီၣ်တဲၣ်ဟီၣ်က၀ီၤပူၤ ခူတၫ်ပူၤကျိၤတဖၣ်ပာ်ဃုာ် စးထီၣ်ဃုအ့ၣ်လိာ်တၫ်အဃိ တၫ်အံၤပာ်ဖျါထီၣ် ကီၫ်ခဲၣ်ဘီဒံယါ အတၫ်အိၣ်ကတဲာ်ကတီၤအသးလၢ တၫ်မၤဆူၣ်ထီၣ်တၫ်ဖ့ၣ်ဆၢတဖၣ်လီၤအဂ့ၫ် ကၠၣ်ခရၣ်ပီးတဲ၀ဲလီၤ.
Ref: DVB
