ထံဒိၣ်လၢရၤမတံ၀ံၤ တၢ်ဘၣ်ကးတံၥ်ဃၥ် ပယီၤ-ကၠီၣ်တဲၣ် တိၤနီၣ်ဂံၢ်(၁)တစိၢ်တလီၢ်

လါယူၤလံ(၃၁)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်

ကညီကီၢ်စဲၣ်,ရၤမတံ၀့ၢ်အပူၤခီဖျိသူမွဲကျိထံဒိၣ်အဃိတၢ်ဘၣ်ကးတံၥ်ဃၥ်၀ဲပယီၤကၠီၣ်တဲၣ်တၢ်ရ့မုၥ်လိၥ်တိၤနီၣ်ဂံၢ် (၁)တစိၢ်တလီၢ်ဒီး ခီဖျိထံနုၥ်လီၤလၢ၀့ၢ်ပူၤအဃိ ကမျၢၢ်ဘၣ်ကီဘၣ်ခဲလၢထံ(၃)ကထိဘျဲၣ်အံၤ ဘၣ်လဲၤသုးကစီၤအိၣ် ဖဲတၢ်မၤပူၤဖျဲးအလီၢ်(၈)ခါအအိၣ်အဂ့ၢ် ပှၤမၤပူၤဖျဲးတၢ်တဖၣ် စံး၀ဲန့ၣ်လီၤ.

လါယူၤလံ(၂၈)သီအနံၤန့ၣ် ခီဖျိမူခိၣ်စူၤလီၤ၀ဲတပယူၥ်ဃီအဃိ သူမွဲကျိထံ ဟဲပှဲၤလီၤလၣ်၀ဲန့ၣ်လီၤ. လါယူၤလံ(၃၀)သီအနံၤ, မုၢ်ဃ့ၢ်လီၤ(၁၂)နၣ်ရံၣ်ဘျဲၣ်အဆၢကတီၢ် တၢ်ထိၣ်ဒွးအဖီခိၣ် သူမွဲကျိထံန့ၣ် ထီၣ်တလၢကွံၥ် ၀့ၢ်ရၤမတံထံတၢ်လီၤဘၣ်ယိၣ်တၢ်ပနီၣ် ၉၆၃စ့ၣ်တံၣ်မံၣ်တၣ်၀ံၤ တုၤဃီၤလၢ ၁,၃၆၅စ့ၣ်တံၣ်မံၣ်တၣ်န့ၣ်လီၤ.

ထံဒိၣ်နိယွၤအဃိ နီၣ်ဂံၢ်(၁),(၂),(၃),(၄), (၅)က၀ီၤဒ့ဒီး ဟံၣ်လၢအိၣ်ဖဲ သူမွဲကၢၢ်နံၤဒီတကျိၤတၢ်လီၢ်လီၤဖုၣ်တဖၣ် ထံလုၢ်ဘၢကွံၥ်၀ံၤဟံၣ်ခိၣ်(၈၀၀)ဘျဲၣ်,ပှၤနီၣ်ဂံၢ်(၃,၀၀၀)ဘျဲၣ်ဘၣ်လဲၤအိၣ်ကဒုအသးဖဲတၢ်မၤပူၤဖျဲးအလီၢ်တဖၣ်န့ၣ်လီၤ.

“ကတီၢ်ခဲအံၤန့ၣ် ယဟဲအိၣ်လၢ တၢ်မၤပူၤဖျဲးအလီၢ်နီၣ်ဂံၢ်(၈)န့ၣ်လီၤ. ပ၀ဲသ့ၣ်တဖၣ်န့ၣ် အါတက့ၢ်ပဟဲအိၣ်ဖဲ တမၣ်ယိၣ်ဒီးသီခါဖၠၣ်တဖၣ်န့ၣ်လီၤ. ထံဒိၣ်တၢတဘျီန့ၣ် အ၀ဲသ့ၣ်ကတီၤပၥ်၀ဲတၢ်ဖိတၢ်လံၤ၀ံၤလၢၥ်လံ. ကျးတၢ်ဖီလၥ်တကထၢန့ၣ် မၤကဆှီက့ၤ၀ံၤလံ. ထံဒိၣ်ထီၣ် ခံဘျီတဘျီဘၣ်ဆၣ် တၢ်ဖိတၢ်လံၤလၢတၢ်တီၣ်ဃၥ်လၢ ထံဒိၣ်တၢတဘျီတဖၣ် တပၥ်လီၤက့ၤဘၣ်ဒံးလၢ တၢ်ဖီလၥ်အဃိ တၢ်ကီတၢ်ခဲတအိၣ်ဘၣ်. တၢ်ကီတၢ်ခဲအိၣ်ဒၣ်လၢ တၢ်အီၣ်တၢ်အီအဂီၢ်လီၤ”အဂ့ၢ် ပှၤ၀့ၢ်ရၤမတံဖိတဂၤ စံး၀ဲန့ၣ်လီၤ.

ကမျၢၢ်ဘၣ်ကီဘၣ်ခဲလၢထံတဖၣ်အံၤ လဲၤသုးအိၣ်ကဒုးအသးဖဲ တၢ်မၤပူၤဖျဲးအလီၢ်(၈)ခါလၢအမ့ၢ် ကၠၣ်ခဲးတီသီခါဖၠၣ်, အတ့းထၣ်အီၣ်ထမၣ်ယိၣ်, ကိန၀့သီခါဖၠၣ်, ဖါခၠီးကီၣ်, ယ့ၣ်ပူၣ်တီၣ်ပီၣ်သီခါဖၠၣ်, ဟ့ၣ်မၣ်အူသီခါဖၠၣ်, တီယးကၠီ, တမးယၣ်အီၣ်သီခါဖၠၣ်န့ၣ်လီၤ.

၀့ၢ်ရၤမတံန့ၣ် ကိးနံၣ်ဒဲးဘၣ်ကွၢ်ဆၢၣ်မဲၥ်ဘၣ်ထံဒိၣ်နိယွၤအဃိ ပှၤ၀့ၢ်တဖၣ်စ့ၢ်ကီး တၢ်လဲၤခီဖျိအိၣ်၀ဲအဖီခိၣ် တၢ်သံတၢ်ပှၢ်အိၣ်ထီၣ်စှၤဘၣ်ဆၣ် အဲၣ်ဒိးလၢ ဂ့ၢ်ဂီၤအူတၢ်မၤပူၤဖျဲးကရၢတဖၣ် ကအိၣ်လၢလၢပှဲၤပှဲၤအဂီၢ်အဂ့ၢ် ပှၤ၀့ၢ်ဖိတဖၣ်စံး၀ဲန့ၣ်လီၤ.

“ပှၤမၤပူၤဖျဲးတၢ်ဖိတဖၣ်န့ၣ် စှၤဒိၣ်မးလီၤ. ၀ံၤအလီၢ်ခံ မ့ၢ်ဟဲဒၣ်လဲၥ်န့ၣ် တကၢကီၥ်ဒီးအပှၤဘၣ်. လၢအနီသ့ၣ်တပၤန့ၣ် ပှၤမၤပူၤဖျဲးတၢ်ဖိတဖၣ်စှၤဒိၣ်မးလီၤ. အနီသ့ၣ်မ့ၢ်တအိၣ်ဒီးတၢ်လဲၤခီဖျိဘၣ်န့ၣ် တၢ်လီၤဘၣ်ယိၣ်တၢ်အိၣ်သးလီၤ. ပတၢ်လဲၤခီဖျိအိၣ်အဃိသး ပှၤကညီတၢ်သံတၢ်ပှၤစှၤလီၤ”အဂ့ၢ် ပှၤ၀့ၢ်ဖိလီၢ်ခံတဂၤ စံး၀ဲန့ၣ်လီၤ.

ကၠီၣ်တဲၣ်-ပယီၤကီၢ်ဆၢ ၀့ၢ်မဲးဆီးအပူၤစ့ၢ်ကီး ခီဖျိမူခိၣ်စူၤတပယူၥ်ဃီ၀ံၤ သူမွဲခံထံဟဲဒိၣ်ထီၣ်အဃိ ထံဒိၣ်နိယွၤတဖၣ်ကဲထီၣ်၀ဲန့ၣ်လီၤ.

ခီဖျိထံဒိၣ်နိယွၤအဃိ တၢ်ရ့ၣ်လိၥ်မုၣ်လိၥ်တိၤ နီၣ်ဂံၢ်(၁)ပၣ်ဃုၥ် သူမွဲခံထံကျိဒီတကျိၤ တၢ်လီၢ်လီၤဖုၣ်က၀ီၤဒ့တဖၣ်အပူၤ ထံဟဲနုၥ်လီၤ၀ဲန့ၣ်လီၤ.

Ref: DVB