လါယူၤလံ(၂၈)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကီၢ်ကၠီၣ်တဲၣ်ဒီးခၣ်ဘီဒံယါ ထံကီၢ်ခံဘ့ၣ်အဘၢၣ်စၢၤ သုးဂ့ၢ်၀ီတၢ်သဘံၣ်သဘုၣ်တဖၣ်အဃိ ကၠီၣ်တဲၣ်တပၤ ကကးတံၥ်ဃၥ်၀ဲ တၢ်သိၣ်လိကၠိ(၇၅၀)ဘျဲၣ်တစိၢ်တလီၢ်အဂီၢ် ဂံၢ်ခီၣ်ထံးကူၣ်သ့ခီၣ်မရှ့ၣ်၀ဲၤဒၢး(OBEC) ထုးထီၣ်၀ဲတၢ်ကလုၢ်အဂ့ၢ် Bangkok Post တၢ်ကစီၣ်ပၥ်ဖျါဃၥ်၀ဲန့ၣ်လီၤ.
ဖဲလါယူၤလံ(၂၅)သီအနံၤန့ၣ် OBEC နဲၣ်ရွဲၣ် ထၣ်နုး၀ီၣ်ကၠ့ၣ်ဒၣ် စံး၀ဲလၢ တၢ်အံၤန့ၣ် တယံၥ်တမီၤဒံးဘၣ် တၢ်ဒုးတဖၣ်ကဲထီၣ်လၢ ကီၢ်ဆၢအကပၤအဃိ တၢ်ဘၣ်ဆၢတဲၥ်လီၤ၀ဲဒ်အံၤအဂ့ၢ်န့ၣ်လီၤ.
ဖဲအပူၤကွံၥ် လါယူၤလံ(၂၄)သီအနံၤ, ခီဖျိခၣ်ဘီဒံယါ ခးလီၤ၀ဲမျိၥ်တဖၣ်အဃိ လဲၤလီၤတဲၥ်ဒီးဘၣ်၀ဲ ဆံၣ်ဆခဲးကီၢ်စဲၣ်, ကၣ်ထၣ်လဲးကီၢ်ရ့ၣ်, PTT သိကျးအပူၤ 7 Eleven၀ံၤအလီၢ်ခံ တၢ်ကကးတံၥ်ကွံၥ် တၢ်သိၣ်လိကၠိတဖၣ် တစိၢ်တလီၢ်အဂီၢ် ဒီး ဖဲလၢ တၢ်ခးလီၤမျိၥ်တဖၣ်အပူၤ (၉)တီၤကၠိဖိမုၣ်တဂၤသံ၀ဲဒီး ပှၤအါအါဂီၢ်ဂီၢ် ဘၣ်ဒိ၀ဲန့ၣ်လီၤ.
ကတီၢ်ခဲအံၤ တၢ်နဲၣ်လီၤတဖၣ်အဖီခိၣ် ကီၢ်ဆၢဆံၣ်ဆခဲးဒီးယၣ်ဆိၣ်ထိလီၢ်က၀ီၤအပူၤ တၢ်သဘံၣ်သဘုၣ်ကဲထီၣ်သးတၢ်လီၢ်အကပၤ တၢ်သိၣ်လိကၠိတဖၣ်အပူၤ ဖိသၣ်လၢဟဲမၤလိတၢ်တဖၣ် တၢ်ကသုးဘၣ်အီၤဆူတၢ်လီၢ်လၢအပူၤဖျဲး, တၢ်ကပတုၥ်ကွံၥ်တၢ်ဖံးလိမၤလိတဖၣ်တဘျီဃီအသိး တၢ်ကလူၤပိၥ်မၤထွဲတုၤလီၤတီၤလီၤ OBEC အဂ့ၢ်ဂီၤအူတၢ်ခီၣ်ဆၢတၢ်တိၥ်ကျဲၤတဖၣ်၀ံၤ တၢ်ကအိၣ်ခိးကွၢ် ကၠိဖိတဖၣ်အတၢ်ဘံၣ်တၢ်ဘၢအဂီၢ် နဲၣ်လီၤဃၥ်၀ဲအဂ့ၢ်န့ၣ် မံးစထၢၣ်ထၣ်နုး စံး၀ဲန့ၣ်လီၤ.
ကၠီၣ်တဲၣ်ကူၣ်သ့၀ဲၤကျိၤ နၣ်ရူၣ်မိၣ်ပ့ၣ်ရိၣ်ဆ့ၣ်၀ဲးစ့ၢ်ကီး ကၠိဖိဒီးအဟံၣ်ဖိဃီဖိလၢ တူၢ်ဘၣ်၀ဲတၢ်တမုၥ်တလၢ်တဖၣ်အဂီၢ် တၢ်ကဆီၣ်ထွဲမၤစၢၤဘၣ် နီၢ်သးဂ့ၢ်၀ီဒီး တၢ်ဆီၣ်ထွဲမၤစၢၤတဖၣ် တဘျီဃီအဂီၢ် နဲၣ်လီၤဃၥ်၀ဲအဂ့ၢ် ပၥ်ဖျါဃၥ်၀ဲလၢတၢ်ကစီၣ်အပူၤန့ၣ်လီၤ.
တကးဘၣ် ဒ်သိးကၠိဖိတဖၣ်သုတဟးထီၣ်လၢကၠိအဂီၢ်, တၢ်သုးကစီၤအိၣ်၀ဲအဆၢကတီၢ် ကဒိးန့ၢ်ဘၣ်နီၢ်သးဂ့ၢ်၀ီတၢ်မၤစၢၤဒီး ကဖံးလိမၤလိဘၣ်က့ၤလၢ ကီၢ်ဆၢဒူသ၀ီတဖၣ်အဂီၢ် တၢ်ဆၢကတီၢ်ဖုၣ်(၇)သီတုၤ(၃၀)သီဒီး တၢ်ဆၢကတီၢ်အယံၤအထၢ(၃)လါတုၤ(၁၂)လါအတီၢ်ပူၤ တၢ်ကဟ့ၣ်၀ဲ တၢ်က့ၤသူၣ်ထီၣ်ဆီလီၤတၢ်ဖံးတၢ်မၤတၢ်တိၥ်ကျဲၤအဂီၢ် နဲၣ်လီၤဃၥ်၀ဲန့ၣ်လီၤ.
OBECပၢဆှၢတၢ်ကမံးတံၥ်တဖၣ်, လီၢ်က၀ီၤကူၣ်သ့ပှၤဘၣ်မူဘၣ်ဒါတဖၣ်တခီ ဘၣ်ထွဲဒီးတၢ်အိၣ်သးတဖၣ်အဖီခိၣ် ကအိၣ်ခိးကွၢ်ဆၢတဲၥ်၀ဲတပယူၥ်ဃီဒီး ဂ့ၢ်ဂီၤအူတၢ်ကလဲၤကွၢ်သမံသမိးတၢ်လၢ ဟီၣ်ခိၣ်မဲၥ်ဖံခိၣ်၀ံၤ ကကိး၀ဲတၢ်အိၣ်ဖှိၣ်တဖၣ်အသိး တၢ်ကဒုးသ့ၣ်ညါ၀ဲ တၢ်အိၣ်သးတၢ်လဲၤထီၣ်လဲၤထီၣ်ဒီးဂ့ၢ်၀ီအူတၢ်ရဲၣ်တၢ်ကျဲၤတဖၣ် ဆူ မိၢ်ပၢ်တဖၣ်အအိၣ်အဂ့ၢ် စံး၀ဲန့ၣ်လီၤ.
Source : Bangkok Post
