လါယူၤလံ(၂၈)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
အ့ၣ်ယၣ်၀တံၣ်ကီၢ်ခီ, ဟီကတးကီၢ်ရ့ၣ်, အ့ၣ်ကပူၣ်ကီၢ်ဆၣ်, သ၀ီတနီၤအပူၤ သုးကီၣ်ကးတြီဃၥ်၀ဲ တၢ်၀ံစိၥ်တီဆှၢ ဂံၢ်ခီၣ်ထံးတၢ်အီၣ်ပနံၥ်တၢ်ဖိတၢ်လံၤတဖၣ်ဒီး ကသံၣ်ကသီတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
စးထီၣ်ဖဲအပူၤကွံၥ် လါယူၤလံ(၂၅)သီအနံၤန့ၣ် သုးကီၣ်ကးတြီဃၥ်၀ဲ တၢ်တီဆှၢ ကသံၣ်ကသီဒီးဟုသးတဖၣ်ဆူ အ့ၣ်ကပူၣ်ကီၢ်ဆၣ်,ထိပီၣ်ဒီးကၠံပ့ၣ်သ၀ီတဖၣ်အပူၤ၀ံၤမ့မ့ၢ်လၢသ၀ီတနီၤတခီဒိးသန့ၤထီၣ်သးလၢပနံၥ်တၢ်ဖိတၢ်လံၤအဖီခိၣ်တၢ်မ့ၢ်ဟ့ၣ်လီၤ၀ဲကျိၥ်စ့မးထုးထီၣ်န့ၢ်၀ဲတၢ်တီဆှၢတၢ်ပျဲလံၥ်အုၣ်သးအဂ့ၢ်တၢ်သ့ၣ်ညါဘၣ်လၢလီၢ်က၀ီၤဖိတဖၣ်အအိၣ်န့ၣ်လီၤ.
“တၢ်ဘၣ်လဲၤဟံး လံၥ်အုၣ်သးလၢ က၀ီၤဒ့ပၢပြးခိၣ်အအိၣ်လီၤ. ဒိးသန့ၤထီၣ်သးလၢ ပနံၥ်တၢ်ဖိတၢ်လံၤအဖီခိၣ် လံၥ်အုၣ်သးအဂီၢ် ဘၣ်ဟ့ၣ်၀ဲ (၃)ကထိကၠးတုၤအကလးအဂ့ၢ်န့ၣ်လီၤ. သမံသမိး၀ဲစ့ၢ်ကီး ပနံၥ်တၢ်ဖိတၢ်လံၤလၢတၢ်ဟဲက့ၤပှ့ၤတဖၣ်”အဂ့ၢ် အ့ၣ်ကပူၣ်လီၢ်က၀ီၤဖိတဂၤ စံး၀ဲန့ၣ်လီၤ.
အ့ၣ်ကပူၣ်ကီၢ်ဆၣ် ပ့နဲကွ့, တီၣ်စ့, ပဒးကိ, ကွ့းကၠံသ၀ီတဖၣ်အပူၤတခီ တၢ်ဟ့ၣ်တၢ်ပျဲ တၢ်တီဆှၢ တၢ်အီၣ်ပနံၥ်တၢ်ဖိတၢ်လံၤန့ၣ် တၢ်ဟ့ၣ်ထဲဒၣ်(၅)သီအတီၢ်ပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးအသုးအံၤ တြီတံၥ်ဃၥ် တၢ်တီဆှၢ တၢ်အီၣ်ပနံၥ်တၢ်ဖိတၢ်လံၤဒီးကျဲတံး(ရ့ၣ်နီၣ်သိ)တဖၣ် ဖဲအ့ၣ်ကပူၣ်ကီၢ်ဆၣ်အပူၤတကးဘၣ်တြီတံၥ်ဃၥ်၀ဲစ့ၢ်ကီးလၢယ့ၣ်ကၠံၣ်,ယ့ၣ်နးသၣ်တၢ်သမံသမိးတြဲၤ၀ံၤ လံၥ်အုၣ်သးလၢတဆီဘၣ်တဆီတဖၣ် မ့ၢ်ပၣ်ဃုၥ်၀ဲမး တၢ်ဟ့ၣ်တၢ်ပျဲတီဆှၢ၀ဲအဂီၢ်န့ၣ်လီၤ.
ကတီၢ်ခဲအံၤန့ၣ် တၢ်ဒုးတဖၣ်ကဲထီၣ်အသး ဖဲအ့ၣ်ကပူၣ်ဒီးလ့မၠဲးနၣ်ကီၢ်ဆၣ်အဆၢ၀ံၤ သုးကီၣ်ကးကမၤ၀ဲ သုးကလၢၤဒီသဒၢတဖၣ်အဂီၢ် နီၤဟးထီၣ်ကွံၥ် လီၢ်က၀ီၤဖိတဖၣ်လၢအိၣ်ဖဲသ၀ီတနီၤအပူၤအဂ့ၢ် တၢ်သ့ၣ်ညါဘၣ်လၢ ပှၤလီၢ်အိၣ်ကမှံဖိတဖၣ်အအိၣ်န့ၣ်လီၤ.
ဖဲအပူၤကွံၥ်စှၤသီအတီၢ်ပူၤ မုၢ်နုၥ်ကလံၤထံးကီၢ်ခီသုး၀ဲၤလီၢ်ခိၣ်သ့ၣ်(နတခ)သုးရိၣ်မဲခိၣ်ပၣ်ဃုၥ် သုးလီၢ်လၤအိၣ်တဖၣ်လၢ အီၣ်ကဘျံးကဘျၣ်ကျိၥ်စ့ ဟ့ၣ်တၢ်ပျဲတီၣ်သွီနုၥ်လီၤ တၢ်အီၣ်ပနံၥ်တၢ်ဖိတၢ်လံၤဒီး ကျဲတံး(ရ့ၣ်နီၣ်သိ)လၢ ရၢၢ်ခၢၣ်ကီၢ်စဲၣ်ပူၤတဖၣ်စ့ၢ်ကီး တၢ်ပၥ်လီၤတၢ်စံၣ်ညီၣ်သံ ဒီး တၢ်ပၥ်လီၤဃိၥ်ပူၤအယံၤအထၢန့ၣ်လီၤ.
Ref: AT
