အံၣ်စရ့စးထီၣ်လဲၤဒုး ကၣ်စၣ်တၢ်ခၢၣ်သးဟီၣ်က၀ီၤလၢ ခိခိၣ်ဒီးကလံၤကျ

လါယူၤလံ(၂၂)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်

လါယူၤလံ(၂၁)သီအနံၤဂီၤအဆၢကတီၢ်န့ၣ် အံၣ်စရ့သုးမုၢ်ဒိၣ် စးထီၣ်လဲၤဒုး ကၣ်စၣ်ကါမၠီၣ်တၢ်ခၢၣ်သးဟီၣ်က၀ီၤ, ဒ့ယၣ်အဲၣ်ဘၣ်လၣ်၀့ၢ်လၢ ခိခိၣ်ဒီးကလံၤကျါန့ၣ်လီၤ.

လီၢ်က၀ီၤပှၤဟံးတၢ်ကစီၣ်ဖိတဖၣ်အတၢ်တဲအဖီခိၣ် အံၣ်စရ့သုးသိလ့ၣ်ထးတဖၣ်ဒီးသုးသိလ့ၣ်တဖၣ်အံၤ ဃုၥ်ဒီးကလံၤကျါတၢ်ဒီသဒၢအဖီခိၣ် ဟဲနုၥ်လီၤ၀ဲလၢ၀့ၢ်ပူၤလၢဂံၢ်ဘါအါအါဂီၢ်ဂီၢ်၀ံၤမျိၥ်တဖၣ်ဒီးကျိဖးဒိၣ်တဖၣ်စ့ၢ်ကီး အိၣ်ရၤလီၤဃၥ်အသးန့ၣ်လီၤ.

တၢ်လီၢ်တဖၣ်အံၤန့ၣ်တၢ်တယၢ်၀ဲလၢအံၣ်စရ့ကမျၢၢ်လၢဟါမးကရၢဖီၣ်ဃၥ်တၢ်လီၢ်အသိး၀ံၤပှၤဘၣ်ကီဘၣ်ခဲဖိအကထိတဖၣ်လၢ ဟဲဃ့ၢ်အိၣ်ကဒုးလၢ ကလံၤထံး၀့ၢ်တဖၣ်လၢအမ့ၢ် ရၣ်ဖၣ်ဒီးခါယိန့းအအိၣ်တဖၣ်စ့ၢ်ကီး အိၣ်၀ဲန့ၣ်လီၤ.

ဘီမုၢ်စၢဖှိၣ်ကရၢပှၤဟီၣ်ခိၣ်ဖိတၢ်ဒိသူၣ်ဒိသး၀ဲၤဒၢး(OCHA)တခီ အံၣ်စရ့သုးမုၢ်ဒိၣ် တၢ်ကလုၢ်အံၤန့ၣ် အမၤဘၣ်ဒိဘၣ်ထံး ပှၤဟီၣ်ခိၣ်တၢ်ဒိသူၣ်ဒိသးတၢ်ဖံးတၢ်မၤတဖၣ် လၢကၣ်စၣ်ဟီၣ်က၀ီၤအဂီၢ်အဂ့ၢ် စံး၀ဲန့ၣ်လီၤ.

ဒ့ယၣ်အဲၣ်ဘၣ်လၣ်၀့ၢ်အပူၤ ပှၤဟီၣ်ခိၣ်ဖိတၢ်ဒိသူၣ်ဒိသးတၢ်မၤစၢၤ တၢ်ပၥ်ကီၤအလီၢ်တဖၣ်, တၢ်ဟ့ၣ်ကသံၣ်ဒၢဒီးဂံၢ်ခီၣ်ထံးတၢ်သူၣ်ထီၣ်လၢအရ့ဒိၣ်တဖၣ် အိၣ်၀ဲအဃိ တၢ်သူၣ်ထီၣ်တဖၣ်အံၤမ့ၢ်ဟးဂီၤကွံၥ်န့ၣ် သးသမူတၢ်လီၤဘၣ်ယိၣ်အိၣ်၀ဲအဂ့ၢ် OCHA ဟ့ၣ်ပလီၢ်ဃၥ်၀ဲန့ၣ်လီၤ.

ကၣ်စၣ်ကလံၤစိးဟီၣ်က၀ီၤအပူၤအံၣ်စရ့သုးမုၢ်ဒိၣ်ခး၀ဲကမျၢၢ်ဖိလၢအိၣ်ခိးဘီမုၢ်စၢဖှိၣ်ကရၢတၢ်ဆီၣ်ထွဲမၤစၢၤတဖၣ်အဃိ ဘၣ်သံ၀ဲ(၆၇)ဂၤအဂ့ၢ် ကၣ်စၣ်ပှၤဘၣ်မူဘၣ်ဒါတဖၣ် စံး၀ဲန့ၣ်လီၤ.

မ့မ့ၢ်လၢအံၣ်စရ့သုးမုၢ်ဒိၣ်တခီ တၢ်ကဒီသဒၢ တၢ်မၤပျံၤမၤဖုးလၢဟဲအိၣ်ထီၣ်သတူၢ်ကလၥ်တဖၣ်အဂီၢ် တၢ်ဟ့ၣ်ပလီၢ်၀ဲအဂ့ၢ် စံး၀ဲန့ၣ်လီၤ. ဘၣ်ထွဲဒီးပှၤသံအနီၣ်ဂံၣ်နီၣ်ဒွးတခီ ဂ့ၢ်လိၥ်ဃၥ်၀ဲန့ၣ်လီၤ.

ဆူၣ်ချ့ကိတိၥ်၀ဲၤကျိၤ အလါယူၤလံ(၁၉)သီအနံၤ အလံၥ်ဘိးဘၣ်ရၤလီၤအဖီခိၣ် ကၣ်စၣ်ဟီၣ်က၀ီၤအပူၤ တၢ်သၣ်၀ံၣ်လီၤဒိတဖၣ်ဟဲဆူၣ်ထီၣ်၀ံၤ ပှၤလၢအလီၤဘှံးလီၤတီၤဂံၢ်ဘါတအိၣ်တဖၣ် ဟဲတုၤဆူတၢ်ဆါဟံၣ်တဖၣ်အိၣ်အါထီၣ်၀ံၤ တယံၤတမီၤဘၣ်ဒီး ပှၤလၢအကယၤတဖၣ်န့ၣ် သံ၀ဲသ့အဂ့ၢ် ဟ့ၣ်ပလီၢ်ဃၥ်၀ဲန့ၣ်လီၤ.

Ref:BBC