လါယူၤလံ(၁၈)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ခီဖျိတၢ်ဒုးလီၤပှီၢ်ကၠါဖၠးအဃိ စ့တၢးအခီးတဖၣ်လၢတၢ်လဲၤအိးထီၣ်ဃၥ်ဖဲကၠီၣ်တဲၣ်ပှၤနီၢ်တဂၤစ့တၢးတဖၣ် တၢ်သမံသမိးကျိၣ်စ့တၢ်လဲၤသရံးသးအဃိပှၤကီၢ်ပယီၤဖိအခီးအါတက့ၢ်န့ၣ်ဘၣ်တၢ်ကးတံၥ်ကွံၥ်အီၤတစိၢ်တလီၢ်,တၢ်ဆှၢခီကျိၥ်စ့ဒီးတၢ်ဆီတလဲဒီလၣ်တဖၣ်တၢ်ပၥ်ပနီၣ်အဒူၣ်အဆၢ,ပတုၥ်ဃၥ်အီၤတဖၣ်ဘၣ်ကွၢ်ဆၢၣ်မဲၥ်ဘၣ်အါထီၣ်အဂ့ၢ် တၢ်သ့ၣ်ညါဘၣ်လၢ ပှၤလၢစူးကါ၀ဲတဖၣ်အအိၣ်န့ၣ်လီၤ.
အခီးတနီၤလၢတၢ်တကးတံၥ်ကွံၥ်စ့ၢ်ကီးန့ၣ် ကီၢ်ချၢတၢ်ဆှၢခီကျိၥ်စ့တဖၣ်တဟဲနုၥ်လီၤတၢ်ဘၣ်အသိး တနီၤန့ၣ် တၢ်ကးတံၥ်ကွံၥ်ဃၥ် Mobile Bankingန့ၣ်လီၤ.
ပှၤလၢဘၣ်တၢ်ကးတံၥ်ကွံၥ်အခီးအါတက့ၢ်န့ၣ် မ့ၢ်ပှၤတဖၣ်လၢ ဟဲထီၣ်ကၠိဒီးဟဲဖံးမၤတၢ်လၢကၠီၣ်တဲၣ် ဒီးပှၤမၤမုၥ်ကျိၤ၀ဲၤကွၢ်ဘၣ်ထွဲဒီးကၠီၣ်တဲၣ်တဖၣ်စ့ၢ်ကီး ပၣ်ဃုၥ်၀ဲအဂ့ၢ်တၢ်သ့ၣ်ညါဘၣ်န့ၣ်လီၤ.
ကတီၢ်ခဲအံၤအခီးတနီၤလၢဘၣ်တၢ်ကးတံၥ်ဃၥ်တစိၢ်တလီၢ်တဖၣ်အကျါနီၢ်ကစၢ်အိၣ်ဆိးလံၥ်အုၣ်သးတၢ်ဂ့ၢ်တၢ်ကျိၤဒီးလီတဲစိနီၣ်ဂံၢ်လၢတၢ်တီၣ်ထီၣ်ဃၥ်ခိၣ်ဂီၤတၢ်ဂ့ၢ်တၢ်ကျိၤတဖၣ် တဖိးမံလိၥ်သးတဖၣ်စ့ၢ်ကီး ပၣ်ဃုၥ်၀ဲန့ၣ်လီၤ.
တၢ်ဂ့ၢ်ခိၣ်သ့ၣ်လၢတၢ်ကးတံၥ်ကွံၥ်အခီးတဖၣ်န့ၣ်ခီဖျိကၠါဖၠးတၢ်ဖံးတၢ်မၤတဖၣ်အပူၤကျိၥ်စ့လၢဒိးန့ၢ်၀ဲတဖၣ် တၢ်ဆီတလဲဆှၢခီတၢ်တဖၣ်အါထီၣ်၀ဲအဃိအဂ့ၢ် ကၠီၣ်တဲၣ်တၢ်ကစီၣ်တဖၣ် ပၥ်ဖျါဃၥ်၀ဲန့ၣ်လီၤ.
ခီဖျိတၢ်ဂ့ၢ်သ့ၣ်တဖၣ်အဃိကတီၢ်ခဲအံၤန့ၣ်တၢ်ဆှၢခီကီၢ်ချၢကျိၥ်စ့တဖၣ်တန့ၢ်ဘၣ်အဃိပှၤလၢဖံးမၤတၢ်ဆီတလဲဆှၢခီတၢ်ဖံးတၢ်မၤတဖၣ်,ဟီၣ်ခိၣ်ထံကီၢ်လၢအဂၤတဖၣ်ဆှၢခီကျိၥ်စ့ဆူဟံၣ်ဖိဃီဖိလၢအိၣ်ကီၢ်ကၠီၣ်တဲၣ်တဖၣ်တန့ၢ်ဘၣ်အဃိ ဘၣ်သဂၢၢ်ဘၣ်ဒီးတၢ်ကီတၢ်ခဲတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ကီၢ်ကၠီၣ်တဲၣ်အပူၤကီၢ်ပယီၤခီကီၢ်ပှၤမၤတၢ်ဖိတဖၣ်ပၣ်ဃုၥ်ခၣ်ဘီဒံယါ,ဘံးယဲးနၣ်,လၣ်အိၣ်,တရူးထံဖိကီၢ်ဖိတဖၣ်အိၣ်၀ဲဘၣ်ဆၣ် ကီၢ်ပယီၤပူၤသုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ တၢ်ဂ့ၢ်အကလုၥ်ကလုၥ်အဖီခိၣ် ပှၤလၢဟဲနုၥ်လီၤဆူကၠီၣ်တဲၣ်န့ၣ်မ့ၢ်အအါကတၢၢ်လၢပှၤကီၢ်ပယီၤဖိတဖၣ်အသိးကျိၣ်စ့တၢ်နုၥ်လီၤဟးထီၣ်အအါကတၢၢ်စ့ၢ်ကီးန့ၣ်မ့ၢ် ပှၤကီၢ်ပယီၤဖိတဖၣ်အဃိ အခီးလၢတၢ်ကးတံၥ်ဃၥ်အအါကတၢၢ်မ့ၢ်ပှၤကီၢ်ပယီၤဖိတဖၣ်ဒီး ခံဘျီတဘျီအအါကတၢၢ်မ့ၢ် ပှၤတရူးဖိတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်ကဒုးလီၤပှီၢ်ကွံၥ် ကၠီၣ်တဲၣ်-ပယီၤကီၢ်ဆၢ အိၣ်လဲတၢ်လံၣ်တၢ်လီကျိၣ်စ့တၢ်ဖံးတၢ်မၤဒီးကီၢ်ဆၢခီဂၥ် ကွီၢ်မ့ၣ်တဖၣ်အဂီၢ်စ့တၢးအခီး(၂)ကကွဲၢ်ဃၣ်ဃၣ်လၢတလၢပှဲၤဒီးလံၥ်အုၣ်သးတၢ်ဂ့ၢ်တၢ်ကျိၤတဖၣ်ဖဲ၂၀၂၅နံၣ်စးထီၣ်သီန့ၣ် တၢ်ကးတံၥ်ကွံၥ်အီၤအဂ့ၢ် ကၠီၣ်တဲၣ်ပဒိၣ်ဘိးဘၣ်ရၤလီၤဃၥ်၀ဲဖဲ လါအ့ဖြ့ၣ်အတီၢ်ပူၤန့ၣ်လီၤ.
နီၢ်ကစၢ်စ့တၢးအခီစရီတဖၣ် တၢ်မ့ၢ်ပျဲစူးကါပှၤအဂၤဒီးတၢ်လံၣ်တၢ်လီကွီၢ်မ့ၣ်တဖၣ်မ့ၢ်အိၣ်ထီၣ်တခီ အထီကတၢၢ် တၢ်ကပၥ်လီၤဃိၣ်ပူၤ(၃)နံၣ် မ့တမ့ၢ် တၢ်ကအီၣ်လီး စ့ယိၤ(၃)ကလီၢ်ဘးမ့တမ့ၢ်တၢ်ပၥ်လီၤတၢ်ကမၣ်(၂)ခါလၢၥ်မ့ၢ်ဂ့ၤ, တၢ်လိၥ်ကွီၢ်အီၤသ့ဒ်ပှၤလၢပၣ်ဃုၥ်ဒီးဆီၣ်ထွဲတၢ်မူၤတၢ်ရၢ်အံၤသ့အသိးတၢ်လိၥ်ကွီၢ်ပှၤလၢမၤကမၣ်တၢ်နီၢ်နီၢ်တဂၤသ့အဂ့ၢ် ဟ့ၣ်ပလီၢ်ဃၥ်၀ဲန့ၣ်လီၤ.
ကီၢ်ကၠီၣ်တဲၣ်အပူၤ ပဒိၣ်ဒီးပှၤနီၢ်တဂၤစ့တၢးခဲလၢၥ်ပၥ်ဖှိၣ်အိၣ်၀ဲ(၂၇)ခါ၀ံၤ ဖဲန့ၣ်အကျါ Bangkok Bank, Kasikorn Bank, Krung Thai Bank, Siam Commercial Bankတဖၣ်န့ၣ် မ့ၢ်ပှၤကီၢ်ပယီၤဖိတဖၣ် စူးကါ၀ဲအအါကတၢၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
