လါယူၤလံ(၁၄)သီ, ၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်က၀ီၤ, ရၤမတံ၀့ၢ်ကလံၤထံးတပၤ ကၠီၣ်တဲၣ်-ကီၢ်သူလ့ၤကီၢ်ဆၢ ၀ီၢ်လ့ၤဟီၣ်က၀ီၤအပူၤ ဖဲမဟါအနံၤ, မုၢ်ထူၣ်အဆၢကတီၢ် သုးကီၣ်ကးအသုးဟဲတ့ၢ်လီၤမ့ၣ်ပိၢ်အဂ့ၢ် ကၠီၣ်တဲၣ်တၢ်ကစီၣ်သန့ Khaosod ပၥ်ဖျါဃၥ်၀ဲန့ၣ်လီၤ.
သုးကီၣ်ကးအသုး YAK -130အကလုၥ် ကဘီဒုးသုး(၂)ခိၣ်န့ၣ် ဟဲတ့ၢ်လီၤ၀ဲမ့ၣ်ပိၢ်(၇)ဖျၢၣ်ဆူ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အိၣ်အလီၢ် လၢ၀ီၢ်လ့ၤဟီၣ်က၀ီၤအပူၤအဂ့ၢ် စံး၀ဲန့ၣ်လီၤ.
“ဟဲတ့ၢ်လီၤ၀ဲမ့ၣ်ပိၢ်လၢကလံၤကျါန့ၣ် လီၤတဲၥ်၀ဲဒၣ်ဖဲအ၀ဲသ့ၣ်သုးကလၢၤအကပၤန့ၣ်လီၤ. ဒ်သိးအသုးကလၢၤသုတလီၤအဂီၢ် ဒီသဒၢန့ၢ်၀ဲဧါ တသ့ၣ်ညါဘၣ်”အဂ့ၢ် ဂံၢ်ခီၣ်ထံးကညီတၢ်ကစီၣ် စံး၀ဲန့ၣ်လီၤ.
ခီဖျိဟဲတ့ၢ်လီၤမ့ၣ်ပိၢ်အဃိ မ့ၣ်ပိၢ်လီၤတဲၥ်ပိၢ်ဖးထီၣ်၀ဲဒၣ် ဖဲ၀့ၢ်၀ီၢ်လ့ၤအကပၤအိၣ် ထံသၢလၢၢ်သ၀ီတၢ်သိၣ်လိကၠိအဖီခိၣ်၀ံၤ တၢ်သိၣ်လိဒၢးတဖၣ်, ကျးတၢ်လီၢ်တဖၣ်ဒီး ဟံၣ်တနီၤ ဘၣ်ဟးဂီၤကွံၥ်၀ဲအသိး မဟါအနံၤ ဟါလီၤခီအဆၢကတီၢ်စ့ၢ်ကီးန့ၣ် သုးကီၣ်ကးအသုး Y12အံၤ ဟဲဆှၣ်၀့ၤ၀ီၤတၢ်အိၣ်၀ဲ (၃)ဘျီ(၄)ဘျီညါအဂ့ၢ် ပှၤလၢမၤစၢၤ၀ဲ ပှၤစံၣ်သုးပှၤလီၢ်အိၣ်ကမှံဖိတဖၣ် စံး၀ဲန့ၣ်လီၤ.
သုးကီၣ်ကး ပီၢ်လဲၢ်နံၤဟီၣ်က၀ီၤ ကီၢ်ခီသုး၀ဲၤလီၢ်ခိၣ်သ့ၣ်အစုတီၤဖီလၥ် နီၣ်ဂံၢ်(၁၃)ဒုးယၤရဲၣ်ကျဲၤတၢ်နဲၣ်လီၤ သုး၀ဲၤလီၢ်ခိၣ်သ့ၣ်စကခ(၁၃)ဒုးယၤခိၣ်နဲၣ်လီၤတၢ်ဒ်အမ့ၢ်၀ီၢ်လ့ၤသုးတၢ်တိၥ်ကူၣ်ကျဲၤဒီး၀ီၢ်လ့ၤတၢ်နဲၣ်လီၤအဖီလၥ်အိၣ် အူကရံးထၣ်သုးကလၢၤတဖၣ်အံၤ KNLAဒီးတၢ်ပၢၢ်ဆၢသုးပၥ်ဖှိၣ်တဖၣ် စးထီၣ်ထီၣ်ဒုး၀ဲဖဲတလါအံၤ စးထီၣ်သီး မဟါအနံၤန့ၣ် ထီၣ်ဒုးမၤန့ၢ်အ၀ံၤအတဲၥ်လံန့ၣ်လီၤ.
တၢ်ထီၣ်ဒုးမၤန့ၢ် သုးကလၢၤ၀ံၤအလီၢ်ခံ လီၢ်က၀ီၤကမျၢၢ်ဖိလၢလဲၤအိၣ်ကဒုဆူ ကၠီၣ်တဲၣ်တပၤတဖၣ်အကျါ အူကရံးထၣ်ဒီးဆွ့ၣ်အ့မၠဲၣ် လီၢ်က၀ီၤဖိ(၁၃၀)ဂၤတခီ မဟါအနံၤမုၢ်ထူၣ်အဆၢကတီၢ်န့ၣ် က့ၤဆူအလီၢ်အကျဲလံဒီး ကၠီၣ်တဲၣ်သုးမုၢ်ဒိၣ်, ပၢၤကီၢ်ဒီးပၢပြးကရၢတဖၣ် ရဲၣ်ကျဲၤန့ၢ်၀ဲအဂ့ၢ်တၢ်သ့ၣ်ညါဘၣ်န့ၣ်လီၤ.
