ပှၤလီၫ်အိၣ်ကမှံ ၃၀၀၀ဂၤ လိၣ်ဘၣ် ပှၤတ၀ၢတၫ်မၤစၢၤတဖၣ်

လါယူၤလံ(၁၁)သီ,၂၀၂၅နံၣ်

ကၠီၣ်တဲၣ်-ပယီၤကီၫ်ဆၢ တၫ်ထီၣ်ဒုးသုးကီၣ်ကးအသုးကလၢၤတဖၣ်အဃိ ကမျၢၫ်၃၀၀၀ဂၤလၢ ဟဲဃ့ၫ်အိၣ်ကဒုတဖၣ် လိၣ်ဘၣ်ပှၤတ၀ၢတၫ်မၤစၢၤတဖၣ်အဂ့ၫ် ကညီကမျၢၫ်တၫ်ကရၢကကရိတဖၣ် တဲ၀ဲလီၤ.

ကညီကီၫ်စဲၣ်,၀့ၫ်ရၤမတံကလံၤထံး သုးကီၣ်ကးအအူကရ့ၣ်ထၣ်သုးကလၢၤဒီး၀ီၫ်လ့ၤတၫ်တိာ်ကူၣ်ကျဲၤသုးကလၢၤတဖၣ် တၫ်က၀ီၤတံာ်ဃာ်၀ဲ၀ံၤ ဖဲလါယူၤလံ(၃)နံၤန့ၣ် တၫ်စးထီၣ်ဒုး၀ဲလၢဒြိအဃိ သုးကီၣ်ကးခးစၢၤ၀ဲလၢကဘီယူၤလီၤ.

လၢကတီၫ်အံၤတၫ်ဒုးတဖၣ်ဆူၣ်ထီၣ်အဃိ အူကရ့ၣ်ထၣ်,၀ီၫ်လ့ၤမၠဲၣ်ဒူသ၀ီ ကမျၢၫ်၃၀၀၀ဂၤဘျဲၣ် ဘၣ်လဲၤဃ့ၫ်အိၣ်ကဒုလၢ သူမွဲကျိ၀ၫ်လၢဘူးဒီးကၠီၣ်တဲၣ်န့ၣ်လီၤ.တၫ်န့ၣ်အဃိ ပှၤလီၫ်အိၣ်ကမှံဖိတဖၣ် ကွၫ်ဆၢၣ်မဲာ်ဘၣ်တၫ်အိၣ်ဆိးအီၣ်အီအဂီၫ် တၫ်ဂ့ၫ်ကီတဖၣ်န့ၣ်လီၤ.

ကညီပိာ်မုၣ်ကရၢ(KWO)နဲၣ်ရွဲၣ်ခိၣ်ကျၢၫ်(၂)နီၫ်အဲၣ်တဖှံဖီ တဲ၀ဲလၢ “တၫ်အိၣ်သးလၢအခဲအံၤဒု လိၣ်ဘၣ်၀ဲဒၣ်တၫ်အီၣ် တၫ်အီလီၤ.မၤစၢၤတန့ၫ်လၢလၢပှဲၤပှဲၤဘၣ်.လၢကတီၫ်အံၤ မူခိၣ်စူၤဒိၣ်အဃိ အ၀ဲသ့ၣ်ကအိၣ်ဆိးအဂီၫ် တၫ်ကီတၫ်ခဲအိၣ်၀ဲအဂ့ၫ်”န့ၣ်လီၤ.

အပူၤကွံာ် လါယူၤလံ(၃)သီနံၤဒီး(၄)သီအနံၤ သုးကီၣ်ကးခးလီၤကျိဖးဒိၣ် ဆူ၀ီၫ်လ့ၤမၠဲၣ်သ၀ီပူၤတပယူာ်ဃီအဃိ ကမျၢၫ်(၃)ဂၤဘၣ်ဒိဘၣ်ထံး၀ံၤ လၢအကျါ(၁)ဂၤဘၣ်သံ၀ဲန့ၣ်လီၤ.

တၫ်န့ၣ်အဃိ တၫ်ဟ့ၣ်ပှၤလီၫ်ကမှံဖိတဖၣ် ပှၤတ၀ၢတၫ်မၤစၢၤမ့ၫ်တန့ၫ်လၢလၢပှဲၤပှဲၤဘၣ်န့ၣ် အိၣ်ဆိးအီၣ်အီအဂီၫ် တၫ်ကီတၫ်ခဲအိၣ်၀ဲအဂ့ၫ် ပှၤလီၫ်က၀ီၤဖိတဖၣ်တဲ၀ဲလီၤ.

ပှၤလီၫ်က၀ီၤဖိတဂၤတဲ၀ဲလၢ “တၫ်ကရၢကရိလၢမၤထွဲပှၤတ၀ၢတၫ်ဆီၣ်ထွဲမၤစၢၤတဖၣ်န့ၣ် အဂံၫ်ဘါတနၢၤ၀ဲ ပှၤလီၫ်အိၣ်ကမှံဖိတဖၣ်ဘၣ်.တၫ်မၤစၢၤမ့ၫ်တန့ၫ်လၢလၢပှဲၤပှဲၤဘၣ်ဒု အိၣ်ဆိးအီၣ်အီအဂီၫ် တၫ်ဂ့ၫ်ကီအိၣ်၀ဲလီၤ.”

သုးဟံးန့ၫ်ထံကီၫ်တၫ်စိတၫ်ကမီၤ၀ံၤအလီၫ်ခံ ပှၤလီၫ်အိၣ်ကမှံနီၫ်ဂံၫ် အိၣ်ဒၣ်ထဲ(၆)ကလီၫ်ဘျဲၣ်ဧိၤလီၤဘၣ်ဆၣ် (၄)နံၣ်ဘျဲၣ်အတီၣ်ပူၤ ဟဲအိၣ်အါထီၣ်၀ဲ(၁၀)ကလီၫ်ဘျဲၣ်န့ၣ်လီၤ.တကးဘၣ် ပှၤတ၀ၢတၫ်မၤစၢၤတဖၣ်စ့ၫ်ကီး လိၣ်ဘၣ်၀ဲလၢဂ့ၫ်ဂီၫ်အူအပူၤအဂ့ၫ် ကမျၢၫ်တၫ်ကရၢကရိတဖၣ် ထုးထီၣ်ဘိးဘၣ်ရၤလီၤ၀ဲအဖီခိၣ် တၫ်သ့ၣ်ညါဘၣ်လီၤ.

ref: dvb