လါယူၤလံ(၁၁)သီ,၂၀၂၅နံၣ်
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုး လဲၤတ့ၢ်လီၤမ့ၣ်ပိၢ် ဖဲကီၢ်ကရ့ၣ်နံၣ်, ဖၣ်ဆီကီၢ်ဆၣ်, မိၤခံလီၢ်က၀ီၤ,လီၢ်လိၣ်ထံသ၀ီပူၤအဃိဟံၣ်ဖိဃီဖိ(၅)ဂၤဘၣ်သံ၀ဲအဂ့ၢ်ကီၢ်ကရ့ၣ်နံၣ်တၢ်ဘၢၣ်စၢၤပၢပြးကီၣ်ကး(IEC)နဲၣ်ရွဲၣ်သဃဲၤ(၂) သရၣ်ဘညါ စံး၀ဲန့ၣ်လီၤ.
မဟါအနံၤလါယူၤလံ(၉)သီအနံၤန့ၣ် သုးကီၣ်ကးအသုး သူ၀ဲပီၣ်(၅၀၀)မ့ၣ်ပိၢ်ဒီးဟဲတ့ၢ်လီၤ၀ဲန့ၣ်လီၤ. ပှၤလၢသံ(၅)ဂၤန့ၣ် မ့ၢ်ဒၣ်ဟံၣ်ဖိဃီဖိတဒူၣ်ဃီအဂ့ၢ် စံး၀ဲန့ၣ်လီၤ.
“တၢ်သ့ၣ်ညါဘၣ်အသိးန့ၣ် တဲ၀ဲလၢဟံၣ်ဖိဃီဖိတဒူၣ်ဧိၤလီၤ. တၢ်သ့ၣ်ညါဘၣ်၀ဲဒ်သိးအံၤ”အဂ့ၢ် သရၣ်ဘညါစံး၀ဲန့ၣ်လီၤ.
ပှၤလၢသံဟံၣ်ဖိဃီဖိ(၅)ဂၤန့ၣ် မ့ၢ်ကွၢ်လၢသးနံၣ်တခီ သးနံၣ်(၃)နံၣ်အိၣ်ပိၥ်မုၣ်တဂၤ, သးနံၣ်(၈)နံၣ်အိၣ်ပိၥ်မုၣ်တဂၤ, သးနံၣ်(၂၈)နံၣ်အိၣ်ပိၥ်ခွါတဂၤဒီးပိၥ်မုၣ်တဂၤ, သးနံၣ်(၅၇)နံၣ်အိၣ် ပိၥ်မုၣ်တဂၤခဲလၢၥ်ပၥ်ဖှိၣ် (၅)ဂၤအဂ့ၢ်စံး၀ဲန့ၣ်လီၤ.
ခီဖျိသုးကီၣ်ကးအသုး လဲၤတ့ၢ်လီၤမ့ၣ်ပိၢ်အဃိ သးနံၣ်(၁၅)နံၣ်အိၣ်ဖိသၣ်(၃)ဂၤပၣ်ဃုၥ် ပိၥ်ခွါ(၃)ဂၤဒီး ပိၥ်မုၣ်(၃)ဂၤစ့ၢ်ကီး ဘၣ်ဒိ၀ဲ၀ဲၤ ပိၥ်မုၣ်(၁)ဂၤတခီ ဘၣ်ဒိနးနးအသိး အဂၤ(၅)ဂၤတခီ ဘၣ်ဒိ၀ဲတဆံးတက့ၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
တကးဘၣ် ကမျၢၢ်ဟံၣ်ဃီ(၆)ဖျၢၣ်, တၢ်ဘါယွၤသရိၥ်ဒီးတၢ်အိၣ်ဖှိၣ်တၢ်သူၣ်ထီၣ်တဖၣ်စ့ၢ်ကီး ဘၣ်ဒိဟးဂီၤကွံၥ်၀ဲအဂ့ၢ် စံး၀ဲန့ၣ်လီၤ.
ဖဲအပူၤကွံၥ် လါယူၤ(၂၅)သီအနံၤစ့ၢ်ကီး ခီဖျိသုးကီၣ်ကးအသုး လဲၤတ့ၢ်လီၤမ့ၣ်ပိၢ်ဆူ မိၤခံလီၢ်က၀ီၤအပူၤအဃိ ပိၥ်ခွါ(၈)ဂၤသံ၀ဲ၀ံၤ ဘၣ်ဒိ၀ဲအါအါဂီၢ်ဂီၢ်န့ၣ်လီၤ.
တၢ်ဒုးကဲထီၣ်သးတအိၣ်ဘၣ်ဒီး သုးကီၣ်ကးအသုး မၤကလံၤကျါတၢ်ဒုးလဲၤတ့ၢ်လီၤမ့ၣ်ပိၢ်ဆူ မိၤခံလီၢ်က၀ီၤအပူၤန့ၣ် အိၣ်ထီၣ်၀ဲလံ (၇)ဘျီလံန့ၣ်လီၤ.
ref: Kantarawaddy Times
