လါယူၤလံ(၇)သီ, ၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကရၢခိၣ် ပဒိၣ်စီၤကွဲၤထူဝ့ အလံၥ်ဟ့ၣ်ယုၢ်ဆူ တၢ်ကရၢကရိသူၣ်ထီၣ် “ကညီသးမုၢ်ဒိၣ်” ၦဲၤထီၣ် (၇၆) နံၣ်မုၢ်နံၤအပူၤ တဲလီၤဃၥ်၀ဲလၢ တၢ်ကမၤကတၢၢ်ကွံၥ် သုးမီၤစိရိၤဒီးမီၤစိရိၤအဂီၢ် ပှၤခဲလၢၥ် ကဘၣ်ပၥ်ဖှိၣ်မၤသကိးတၢ်အဂ့ၢ်န့ၣ်လီၤ.
ကညီတၢ်ပၢၢ်ဆၢတၢ်ဂဲၤလိၥ်ဒီတစိၤအပူၤန့ၣ် တၢ်သူ၀ဲမီၤစိရိၤသနူတဖၣ်လၢ ကျဲအကလုၥ်ကလုၥ်ဘၣ်ဆၣ် မ့မ့ၢ်လၢဘၣ်ကွၢ်ဆၢၣ်မဲၥ်ဒူၣ်ဒါတခီ မ့ၢ်ဒၣ်တခါဃီလီၤအဂ့ၢ် ပၥ်ဖျါဃၥ်၀ဲန့ၣ်လီၤ.
မုၢ်မဆါတနံၤန့ၣ်သုးမီၤစိရိၤအသုးတဖၣ်ဟံးန့ၢ်ဆူၣ်ဃၥ်ထံကီၢ်တၢ်စိတၢ်က၀ီၤ၀ံၤ သူ၀ဲ၂၀၀၈တၢ်ဘျၢခိၣ်သ့ၣ်ဒ်တၢ်ဒီသဒၢအသိးဒီး မ့ၢ်ပှၤဖီၣ်စုက၀ဲၤကရၢတဖုလၢ ကွၢ်၀ဲအတၢ်စိတၢ်ကမီၤကဂၢၢ်ကျၢၤအဂီၢ်ဒီး အတၢ်ဘၣ်ဘျူးကအိၣ်အဂီၢ်လီၤအဂ့ၢ် စံး၀ဲန့ၣ်လီၤ.
သုးမီၤစိရိၤအသုးလၢ ဖီၣ်ဃံးဃၥ်တၢ်စိတၢ်ကမီၤဒီးတၢ်ပၢတၢ်ပြးလၢပၢဆူၣ်တၢ်အံၤန့ၣ် တမ့ၢ်လၢကဒုးအိၣ်ထီၣ်တၢ်မုၥ်တၢ်ခုၣ်တသ့ဘၣ်အဂ့ၢ် စံး၀ဲန့ၣ်လီၤ.
လၢတၢ်န့ၣ်အဃိ သုးမီၤစိရိၤဒီးမီၤစိရိၤအတၢ်ပၢတၢ်ပြး ကကတၢၢ်ကွံၥ်အဂီၢ် ကဘၣ်သူ၀ဲကျဲအကလုၥ်ကလုၥ်ဒီး ကဘၣ်ထီဒါပၢၢ်ဆၢတၢ်အဂ့ၢ် တဲလီၤဃၥ်၀ဲလၢ အလံၥ်ဟ့ၣ်ယုၢ်အပူၤန့ၣ်လီၤ.
