လါယူၤ(၂၆)သီ,၂၀၂၅နံၣ်
ကညီကီၢ်စဲၣ်, ၀့ၢ်ရၤမတံအပူၤ ခီဖျိလၢပှၤဖီၣ်စုက၀ဲၤကရၢအါတလၢအဃိ သုးကီၣ်ကးအစုတီၤဖီလၥ်အပှၤတဖၣ် ကဖီၣ်၀ဲသိလ့ၣ်လၢလဲၣ်စ့ၣ်တအိၣ်တဖၣ်အဂီၢ် တၢ်ကီတၢ်ခဲအိၣ်၀ဲအဂ့ၢ် ပှၤ၀့ၢ်ဖိတဖၣ် စံး၀ဲန့ၣ်လီၤ.
လါမ့ၤ(၂၀)သီအနံၤ ဖဲန့ၣ်ပၠံၣ်တီၣ်န့ၣ် သုးကီၣ်ကးအစုတီၤဖီလၥ်အပှၤတဖၣ် မၤ၀ဲတၢ်ထိၣ်ဃူတၢ်ဖံးတၢ်မၤတၢ်အိၣ်ဖှိၣ်အပူၤ သုးကီၣ်ကးအခိၣ်နဲၣ်လီၤ၀ဲလၢ တၢ်ကဖီၣ်၀ဲ သိလ့ၣ်ဒီးမီၣ်တီၣ်တုၥ်လၢလဲၣ်စ့ၣ်တအိၣ်တဖၣ်အဂ့ၢ် နဲၣ်လီၤ၀ဲန့ၣ်လီၤ.
လၢတၢ်န့ၣ်အဃိ စးထီၣ်လၢလါယူၤ(၁)သီအနံၤန့ၣ် ကညီကီၢ်စဲၣ်အပူၤ တၢ်စးထီၣ်ဖီၣ်၀ဲ သိလ့ၣ်ဒီးမီၣ်တီၣ်တုၥ်လၢလဲၣ်စ့ၣ်တအိၣ်တဖၣ်ဘၣ်ဆၣ် မမ့ၢ်လၢ၀့ၢ်ရၤမတံအပူၤတခီ တၢ်ကဖီၣ်၀ဲအဂီၢ် ကီခဲ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“ကတီၢ်ခဲအံၤတခီ တၢ်ဖီၣ်အီၤတထံၣ်ဒံးဘၣ်. ပှၤဖီၣ်စုက၀ဲၤကရၢတဖၣ် ပၢဆှၢဃၥ်၀ဲအဆၢကတီၢ်ကဲထီၣ်အဃိဒီး သိလ့ၣ်တဖၣ်န့ၣ်ခီဖျိအအါလၢပှၤဖီၣ်စုက၀ဲၤကရၢတဖၣ်လီၤ.လၢတၢ်န့ၣ်အဃိအ၀ဲသ့ၣ်ဖီၣ်ထဲကမျၢၢ်ဖိအသိလ့ၣ်တဖၣ်လီၤဒီးမ့မ့ၢ်ပှၤဖီၣ်စုက၀ဲၤကရၢအသိလ့ၣ်တဖၣ်တခီ တဖီၣ်၀ဲဘၣ်အဃိ တၢ်သဘံၣ်သဘုၣ်အိၣ်ထီၣ်လီၤ. အ၀ဲသ့ၣ်စ့ၢ်ကီးန့ၣ် အဲၣ်ဒိးမၤ၀ဲလၢအကျိၤအကျဲဘၣ်ဘၣ်အဂ့ၢ် တၢ်ထံၣ်ဘၣ်၀ဲလီၤ. အမ့ၢ်ဖီၣ်၀ဲအနီၢ်ကီၢ်န့ၣ် တၢ်ဂ့ၢ်ကီအိၣ်ထီၣ်ဒီးပှၤဖီၣ်စုက၀ဲၤကရၢတဖၣ်အဂ့ၢ်” ၀့ၢ်ပူၤပှၤဘၣ်မူဘၣ်ဒါစံး၀ဲန့ၣ်လီၤ.
၀့ၢ်ရၤမတံအပူၤ သုးကီၣ်ကးအပှၤတဖၣ် သမံသမိးထဲဒၣ် သိလ့ၣ်ဒီးမီၣ်တီၣ်တုၥ်တဖၣ် အနီၣ်ဂံၢ်ဒီးလဲၣ်စ့ၣ်တဖၣ်၀ံၤ လ့ၤလိၤဟးထီၣ်ဒ်ညီနုၥ်အသိးန့ၣ်လီၤ. သိလ့ၣ်လၢလဲၣ်စ့ၣ်တအိၣ်တဖၣ်န့ၣ် ခီ၀ဲနီၣ်ဂံၢ်(၁)တၢ်ရ့လိၥ်မုၥ်လိတိၤ၀ံၤ လဲၤဆူ၀့ၢ်မဲဆီးတပၤတသ့ဘၣ်အဂ့ၢ် ၀့ၢ်ပူၤပှၤဘၣ်မူဘၣ်ဒါတဖၣ် စံး၀ဲန့ၣ်လီၤ.
၀့ၢ်ရၤမတံအပူၤ ပှၤဖိၣ်စုက၀ဲၤကရၢတဖၣ်ဒ်အမ့ၢ် DKBA, BGF, KNU/KNLA(PC)ကရၢတဖၣ် ဟဲဆီလီၤဃၥ်၀ဲ တၢ်ရ့လိမုၥ်လိၥ်၀ဲၤဒၢးတဖၣ်ဒီးအပှၤသုးဖိတဖၣ်၀ံၤ ဟူးဂဲၤ၀ဲန့ၣ်လီၤ.
“၀့ၢ်ရၤမတံအပူၤန့ၣ် တဖီၣ်၀ဲဘၣ်. မ့ၢ်ဖီၣ်၀ဲလၢရၤမတံအပူၤန့ၣ် သုးကီၣ်ကးကအိၣ်အလီၢ်တအိၣ်ဘၣ်. ရၤမတံအပူၤန့ၣ် ကရၢအိၣ်အါမး. ၀ံၤအလီၢ်ခံတၢ်ထီဒါပၢၢ်ဆၢသုတကဲထီၣ်အဂ့ၢ်န့ၣ် ကရၢတဖၣ်ပၢၤဃၥ်၀ဲအဃိလီၤ. ဘၣ်ဆၣ်ဒီးမ့ၢ်လီၤလၢ ဖၣ်အၣ်တပၤတခီ တၢ်ဖီၣ်အီၤလီၤ. မ့မ့ၢ်တၢ်ကရၢကရိအပှၤတခီ လဲၤဆူဖၣ်အၣ်သ့လီၤ. လဲၤတၢ်တုၤလၢသၣ်မညးန့ၢ်လီၤ. ၀ံၤဘျီ က့ၤဆီတလဲဒီးသိလ့ၣ်လၢလဲၣ်စ့ၣ်အိၣ်လီၤ. တမ့ၢ်ထဲသိလ့ၣ်ဘၣ်. တၢ်ဖိတၢ်လံၤတဖၣ် ခဲလၢၥ်အဂ့ၢ်” ပှၤဖီၣ်စုက၀ဲၤကရၢတဖု အတၢ်ရ့လိၥ်မုၥ်လိၥ်၀ဲၤဒၢး ပှၤကတိၤတၢ်ပၢ စံး၀ဲန့ၣ်လီၤ.
သိလ့ၣ်လၢလဲၣ်စ့ၣ်တအိၣ်တဖၣ်ဒီးပနံၥ်တၢ်ဖိတၢ်လံၤတဖၣ် ဒ်သိးတၢ်ကတီၣ်သွီနုၥ်အီၤလၢ ကၠီၣ်တဲၣ်-ပယီၤကီၢ်ဆၢ ၀့ၢ်ရၤမတံတဆီဆူကီၢ်ပယီၤဒီတဘ့ၣ်အပူၤအဂီၢ် တၢ်ဘၣ်ဟ့ၣ်ကျိၥ်စ့တဖၣ်ဆူ ပှၤဖီၣ်စုက၀ဲၤကရၢတဖၣ်, ၀ဲၤကျိၤလၢဘၣ်ထွဲတဖၣ်ဒီး ဘၣ်တၢ်တီၣ်သွီနုၥ်၀ဲအဂ့ၢ် လီၢ်က၀ီၤဖိတဖၣ်စံး၀ဲန့ၣ်လီၤ.
ကညီကီၢ်စဲၣ်အပူၤ ခီဖျိတၢ်ဖီၣ်သိလ့ၣ်ဒီးမီၣ်တီၣ်တုၥ်လၢလဲၣ်စ့ၣ်တအိၣ်ဘၣ်တဖၣ်ဒီး တဖိးသဲစးပနံၥ်တၢ်ဖိတၢ်လံၤတဖၣ်အဃိ ပနံၥ်တၢ်ဖိတၢ်လံၤအပှ့ၤကလံၤတဖၣ် ဘၣ်ဒိၣ်ထီၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ref: dvb
