လါယူၤ(၂၄)သီ,၂၀၂၅နံၣ်
အမဲရကၤလဲၤဒုး အံၣ်ရၣ်၀ံၤအလီၢ်ခံ ကဒုးက့ၤအမဲရကၤအဂီၢ် ကဆိၣ်ကမိၣ်လၢကျိၤကျဲခဲလၢၥ်အဂ့ၢ်န့ၣ် အံၣ်ရၣ်တပၤ တဲလီၤ၀ဲန့ၣ်လီၤ.
လါယူၤ(၂၂)သီအနံၤ, ဂီၤအဆၢကတီၢ် အမဲရကၤပျဲလီၤ ကဘီယူၤတ့ၢ်လီၤမ့ၣ်ပိၢ်တဖၣ်၀ံၤ လဲၤတ့ၢ်လီၤမ့ၣ်ပိၢ်လၢ အံၣ်ရၣ်နူကလံယါပီညါတၢ်ဃိထံၣ်သ့ၣ်ညါသုးကလၢၤ(၃)ဖျၢၣ်လၢအိၣ်ဖဲအံၣ်ရၣ်ထံကီၢ်တၢ်ပၢဟီၣ်က၀ီၤအပူၤန့ၣ်လီၤ.
တၢ်လဲၤဒုးအီၤအံၤအဖီခိၣ် အံၣ်ရၣ်တခီမ့ၢ်ခီၣ်ဆၢဒုးက့ၤန့ၣ် ကကဲထီၣ်တၢ်မၤကမၣ်ဖးဒိၣ်တခါအဂ့ၢ် အမဲရကၤတဲပျံၤတဲဖူး၀ဲဘၣ်ဆၣ် အံၣ်ရၣ်မီၢ်သီတပၤတခီ ကဒုးဆၢက့ၤတၢ်အဂ့ၢ် တဲလီၤ၀ဲန့ၣ်လီၤ.
ကတီၢ်ခဲအံၤန့ၣ် အံၣ်ရၣ်ကပၥ်၀ဲ တၢ်ခးပနီၣ်လၢ အမဲရကၤသုးကလၢၤတဖၣ်လၢ ဟဲအိၣ်ဆီလီၤဃၥ် ဖဲမုၢ်ထီၣ်ခၢၣ်သးဟီၣ်က၀ီၤအပူၤတဖၣ်ကဲထီၣ်သ့အဆိကတၢၢ်၀ံၤသုးကလၢၤတဖၣ်ဒီးထံကီၢ်လၢတူၢ်လိၥ်ဃၥ်၀ဲတဖၣ်စ့ၢ်ကီး ဘၣ်အိၣ်၀ဲဒၣ်လၢတၢ်ဘၣ်ယိၣ်ဘၣ်ဘှီအပူၤန့ၣ်လီၤ.
ပှၤဃိထံၣ်သ့ၣ်ညါသုးဂ့ၢ်၀ီတဖၣ်တခီ အံၣ်ရၣ်န့ၣ်ဘၣ်ကွၢ်ဆၢၣ်မဲၥ်ဘၣ်ဒီးအမဲရကၤအတၢ်လဲၤဒုးအီၤ၀ံၤ (၄၈)နၣ်ရံၣ်အတီၢ်ပူၤ ကခီၣ်ဆၢက့ၤ၀ဲတခါခါအဂ့ၢ် ဟ့ၣ်ပလီၢ်ဃၥ်၀ဲန့ၣ်လီၤ.
အံၣ်ရၣ်ထံဂုၤကီၢ်ဂၤကိတိၥ် အဘဲးအၣ်ရဲၣ်ခၠံၣ်တခီ အမဲရကၤန့ၣ် အမၤသ့ဒၣ်ဒ် သူအဂံၢ်အဘါဒီးမၤပျံၤမၤဖူးတၢ်သ့လီအဂ့ၢ် ပၥ်ဖျါထီၣ်၀ဲအဂ့ၢ် တဲလီၤ၀ဲန့ၣ်လီၤ. အမဲရကၤန့ၣ် အဲၣ်တၢ်ဒုးတၢ်ယၤဒီးပညိၣ်ဒုးအံၣ်ရၣ်ထံဖိကီၢ်ဖိကမျၢၢ်တဖၣ်ဒ် ဒူၣ်ဒါအသိးအဃိ အမဲကၤကကွၢ်ဆၢၣ်မဲၥ်ဘၣ်ဒီး တၢ်ပိၥ်ထွဲထီၣ်အခံလၢ အၢအၢသီသီတဖၣ်အဂ့ၢ် အ၀ဲစံး၀ဲန့ၣ်လီၤ.
မ့မ့ၢ်လၢအမဲရကၤပဒိၣ်တခီ အယူၢ်န့ၢ်အတၢ်ဒုးယၤရဲၣ်ကျဲၤအံၤအမံၤလၢ Midnight Hammerဒီး လဲၤဒုး၀ဲန့ၣ် တမ့ၢ်အလဲၤဒုး အံၣ်ရၣ်သုးမုၢ်ဒိၣ်ဒီးအံၣ်ရၣ်ထံဖိကီၢ်ဖိကမျၢၣ်ဘၣ်ဒီး မ့မ့ၢ်တခီ လဲၤဒုးဒၣ်လီ အံၣ်ရၣ်နူကလံယါ အတၢ်တိၥ်ကျဲၤတဖၣ်လီၤအဂ့ၢ် တဲလီၤဃၥ်၀ဲန့ၣ်လီၤ.
ဘၣ်ဆၣ်ဒီး အံၣ်ရၣ်ပဒိၣ်တဖၣ်တခီ ကဒုးဆၢက့ၤအမဲရကၤအကျိၤအကျဲဒ်လဲၣ်အဂ့ၢ်န့ၣ် တၢၣ်ပီၣ်တဲသကိး၀ဲ ဒိၣ်ဒိၣ်မုၢ်မုၢ်လီၤအဂ့ၢ် စံး၀ဲန့ၣ်လီၤ.
အမဲရကၤကီၢ်ခိၣ် ဒီၣ်နၢၤထရၢးတခီ အံၣ်ရၣ်န့ၣ် တကြၢးဒုးဆၢက့ၤတၢ်ဘၣ်အဂ့ၢ် ဟ့ၣ်လီၤ၀ဲတၢ်ကလုၢ်၀ံၤ အံၣ်ရၣ်န့ၣ် ကဘၣ်ဃုထၢ၀ဲ တၢ်မုၥ်တၢ်ခုၣ်အကျဲ မ့တမ့ၢ် တၢ်ဘၣ်ဒိဘၣ်ထံးဒီးတၢ်လီၤဆံးလီၤစှၤကျိၤကျဲတဘိဘိလီၤအဂ့ၢ် စံး၀ဲန့ၣ်လီၤ.
အံၣ်ရၣ်ဆိကမိၣ်ရဲၣ်ကျဲၤလၢ ကဒုးဆၢက့ၤအမဲရကၤဒၣ်လဲၣ်န့ၣ် ဖဲအပူၤကွံၥ် တနွံဘျဲၣ်အတီၢ်ပူၤ ခီဖျိလၢအံၣ်စရ့အတၢ်လဲၤဒုးအီၤအဃိ သုးဂ့ၢ်၀ီဂံၢ်ခီၣ်ထံးအါအါဂီၢ်ဂီၢ် ဘၣ်လီၤဆံးလီၤစှၤ၀ဲအဃိ အတၢ်ရဲၣ်တၢ်ကျဲၤလၢကဒုးဆၢက့ၤတၢ်စ့ၢ်ကီးန့ၣ် အိၣ်၀ဲဒၣ်ဒီးအဒူၣ်အဆၢန့ၣ်လီၤအဂ့ၢ် သုးဂ့ၢ်၀ီပှၤဃိထံသ့ၣ်ညါတဖၣ် တယၢ်ဃၥ်၀ဲန့ၣ်လီၤ.
ref: people spring
