လါယူၤ(၂၀)သီ, ၂၀၂၅နံၣ်
MNDAA ဒီး SSPPအဘၢၣ်စၢၤ ဟီၣ်က၀ီၤတၢ်ဘၣ်ဂံၥ်ဂူၥ်ကဲထီၣ်တ့ၢ်လၢ ယိၤဒိၣ်ကီၢ်စဲၣ်, ကလံၤစိးတပၤအဃိ တၢ်ဘၣ်သဂၢၢ်ဒုးလိၥ်သးတဖၣ်ကဲထီၣ်၀ံၤအလီၢ်ခံ ထံၣ်လိၥ်တၢၣ်ပီၣ်တဲသကိးအသး ဖဲလါယူၤ(၁၇)သီဒီး(၁၈)သီအနံၤအဂ့ၢ် MNDAAပၥ်ဖျါဃၥ်၀ဲတၢ်ကစီၣ်န့ၣ်လီၤ.
“MNDAAန့ၣ် အသုးကလၢၤတနီၤလၢအိၣ်ဖဲ သံၣ်ဘီဒီးလါရှိဟီၣ်က၀ီၤပူၤ ဘၣ်ဂုၤက့ၤအခံလီၤ. MNDAAအသုးတဖၣ်န့ၣ် ဂုၤက့ၤအခံဖဲမဟါအနံၤ ဟါခီလီၤအဂ့ၢ်” လီၢ်က၀ီၤဖိတဂၤ စံး၀ဲန့ၣ်လီၤ.
MNDAA ဒီး SSPPထံၣ်လိၥ်အသးဖဲ လါရှိကီၢ်ဆၣ်, သၣ်လွ့ၣ်သ၀ီအပူၤ၀ံၤ UWSA တီခိၣ်ရိၣ်မဲမၤ၀ဲ တၢ်ထံၣ်လိၥ်တၢၣ်ပီၣ်တဲသကိးအံၤအဂ့ၢ် အ၀ဲစံးအါထီၣ်၀ဲန့ၣ်လီၤ.
UWSA နီၣ်ဂံၢ်(၁၇၀) တၢ်မဲၥ်ညါသုးဟီၣ်က၀ီၤအခိၣ် လဲၤထီၣ်၀ဲခံကပၤတၢ်ထံၣ်လိၥ်တၢၣ်ပီၣ်တဲသကိးအံၤဒီး MNDAAသုးတနီၤလၢ ကြၢးဂုၤက့ၤအခံတဖၣ် ကဘၣ်ဂုၤက့ၤအခံန့ၣ် တၢၣ်ပီၣ်တဲသကိး၀ဲဘၣ်လီၢ်ဘၣ်စးအဂ့ၢ် စံး၀ဲန့ၣ်လီၤ.
ကီၢ်ပယီၤဒီကလုၥ်တၢ်တၢ်တီတၢ်လိၤဒီးတၢ်တြီတၢ်တြၢ်ပၣ်တံၣ်/ကီၢ်ပယီၤဒီကလုၥ်ဒံၣ်မိၣ်ကရံးတံးသိၣ်မှံသုးမုၢ်ဒိၣ်(MNTJP/MNDAA)ဒီး ယိၤဒိၣ်ကီၢ်စဲၣ်တၢ်လဲၤထီၣ်လဲၤထီပၣ်တံၣ်/ယိၤဒိၣ်သုးမုၢ်ဒိၣ်(SSPP/SSA)အဘၢၣ်စၢၤ ထံၣ်လိၥ်အသးပတီၢ်ထီတၢ်တၢၣ်ပီၣ်တဲသကိး၀ံၤ ခံခီခံကပၤတၢ်ရ့လိၥ်မုၥ်လိၥ်ပၣ်ဃုၥ် တၢ်ဂ့ၢ်တဖၣ် အၢၣ်လီၤသကိး၀ဲအဂ့ၢ် MNDAAတပၤစ့ၢ်ကီး ထုးထီၣ်ပၥ်ဖျါဃၥ်၀ဲ တၢ်ကစီၣ်န့ၣ်လီၤ.
တၢ်ထံၣ်လိၥ်တၢၣ်ပီၣ်တဲသကိးအပူၤ UWSA အ(၇၁၀)တၢ်မဲၥ်ညါသုးဟီၣ်က၀ီၤ ပှၤနဲၣ်လီၤတၢ်အခိၣ်ခံ Mr. Bao Ni Guo လဲၤထီၣ်တီခိၣ်ရိၣ်မဲ၀ဲ၀ံၤ MNDAAတပၤစ့ၢ်ကီး သုးရိၣ်မဲခိၣ်ကျၢၢ်(၂) သုးခိၣ်ကျၢၢ်ဂီၢ်ဂ့ၢ် Mr. Peng De Junပၣ်ဃုၥ်ခၢၣ်စးတနီၤဟဲထီၣ်၀ဲဒီး မ့မ့ၢ် SSPPတခီ သုးခိၣ်ကျၢၢ်ဒိၣ်စိ အူနၢၤဖး(Nai Pa)တီခိၣ်ရိၣ်မဲ ခၢၣ်စးကရၢတဖၣ် ဟဲထီၣ်၀ဲအဂ့ၢ် ပၥ်ဖျါဃၥ်၀ဲန့ၣ်လီၤ.
တလါအံၤ လါယူၤဒီးလါအ့ဖြ့ၣ်အတီၢ်ပူၤန့ၣ် MNDAA ဒီး SSPPအဘၢၣ်စၢၤ ဟီၣ်က၀ီၤတၢ်ဘၣ်ဂံၥ်ဂူၥ်ကဲထီၣ်သးအဃိ တၢ်ဒုးတဖၣ်ကဲထီၣ်တ့ၢ်၀ဲ ဖဲလါရှိကီၢ်ဆၣ်ဒီးသံၣ်ပီကီၢ်ဆၣ်တဖၣ်အပူၤန့ၣ်လီၤ.
ref:vom
