လါယူၤ(၁၇)သီ,၂၀၂၅နံၣ်
ကီၫ်ကၠီၣ်တဲၣ်ပူၤ အပူၤကွံာ်တနွံအတီၫ်ပူၤန့ၣ် ပှၤဘၣ်ကူဘၣ်ဂာ် ခိၣ်ဘံး-၁၉ အိၣ်၀ဲ ၇၆,၀၀၀ဂၤဘျဲၣ်အသိး တၫ်သံတၫ်ပှၫ်အနီၫ်ဂံၫ် အိၣ်ထီၣ်၀ဲ ပှၤ(၄၀)ဂၤအဂ့ၫ် ဖဲမဟါနံၤ The Nation Thailandတၫ်ကစီၣ်ပူၤ ပာ်ဖျါ၀ဲလီၤ.
တၫ်အံၤမ့ၫ်ဖဲအပူၤကွံာ် လါယူၤ(၈)သီတုၤ(၁၄)သီအတီၫ်ပူၤ တၫ်ဆါအတၫ်ရၤလီၤသးတၫ်အိၣ်သးတဖၣ် ကီၫ်ကၠီၣ်တဲၣ် တၫ်ပၢဆှၢတၫ်ဆါ၀ဲၤကျိၤ(DDC)ထုးထီၣ်ဘိးဘၣ်ရၤလီၤ၀ဲ၀ံၤ ၀့ၫ်ဘီကိာ်န့ၣ် ဘၣ်ကူဘၣ်ဂာ်အါကတၢၫ်ဒီး ပှၤသူၣ်က့ သးပှၫ်တဖၣ် တၫ်ဘၣ်ကူဘၣ်ဂာ်၀ဲညီအဂ့ၫ် တဲ၀ဲလီၤ.
ခိၣ်ဘံး-၁၉ အတၫ်ဘၣ်ကူဘၣ်ဂာ်ကဒီးတဘျီအံၤ တၫ်မ့ၫ်စးထီၣ်ဒွးအီၤလၢ အပူၤကွံာ် လါယနူၤအါရံၤ(၁)သီနံၤန့ၣ် ကီၫ်ကၠီၣ်တဲၣ်ဒီတဘ့ၣ် ပှၤလၢတၫ်ဆါဘၣ်ကူဘၣ်ဂာ်၀ဲန့ၣ် ပှၤနီၫ်ဂံၫ်အိၣ်၀ဲ ၄၇၀,၀၀၀ဂၤဘျဲၣ်လံအဂ့ၫ် တဲ၀ဲလီၤ.
လၢကတီၫ်အံၤ အပူၤကွံာ် တနွံအတီၫ်ပူၤ ပှၤလၢတၫ်ဆါဘၣ်ကူဘၣ်ဂာ် ၇၆,၀၀၀ဂၤဘျဲၣ်အကျါ ပှၤဒိးကူစါယါဘျါ အသးလၢတၫ်ဆါဟံၣ်အနီၫ်ဂံၫ်နီၫ်ဒွးအိၣ်၀ဲ ၇၂,၀၀၀ဂၤဘျဲၣ်ဒီး ၄၀၀၀ဂၤဃၣ်ဃၣ်တခီဒု ဒိးကူစါယါဘျါအသးလၢတၫ်ချၢန့ၣ်လီၤ.
ကီၫ်ကၠီၣ်တဲၣ် တၫ်ပၢဆှၢတၫ်ဆါ၀ဲၤကျိၤ(DDC)အတၫ်ပာ်ဖျါအဖီခိၣ် ခိၣ်ဘံး-၁၉တၫ်ဆါ ဘၣ်ကူဘၣ်ဂာ်အဃိ အပူၤ ကွံာ် တနွံအတီၫ်ပူၤ ပှၤသံအိၣ်ထီၣ်(၄၀)ဂၤ၀ံၤ တၫ်မ့ၫ်စးထီၣ်ဒွးအီၤလၢလါယနူၤအါရံၤ(၁)သီနံၤန့ၣ်ဒု ကီၫ်ကၠီၣ်တဲၣ်ပူၤ ပှၤဘၣ်သံအနီၫ်ဂံၫ်နီၫ်ဒွးန့ၣ် အိၣ်ထီၣ်၀ဲ(၁၅၄)ဂၤလံအဂ့ၫ် တဲ၀ဲလီၤ.
ဖဲအပူၤကွံာ်တနွံအပူၤ ကီၫ်ကၠီၣ်တဲၣ်ပူၤ ဟီၣ်က၀ီၤလၢတၫ်ဆါဘၣ်ကူဘၣ်ဂာ်အါကတၢၫ်န့ၣ် ဘီကီာ်န့ၣ် အိၣ်၀ဲ ၁၈,၀၀၀ ဃၣ်ဃၣ်ဒီးမ့ၫ်အအါကတၢၫ်၀ံၤ အ၀ဲအလီၫ်ခံ ခၠိၣ်ဘူၣ်ရံၤ,နခိၣ်ရးစံၣ်မၣ်,ကံၫ်မဲဒီးလယီတဖၣ်န့ၣ်လီၤ.
သးနံၣ်လၢတၫ်ဘၣ်ကူဘၣ်ဂာ်အါကတၢၫ်န့ၣ် မ့ၫ်သးနံၣ်(၆၀)နံၣ်ဒီးအဖီခိၣ်တဖၣ် ပှၤဘၣ်ကူဘၣ်ဂာ်ခိၣ်ဘံးအနီၫ်ဂံၫ်နီၫ် ဒွးန့ၣ် အိၣ်၀ဲ ၁၄,၇၀၀ဘျဲၣ်ဒီးမ့ၫ်အအါကတၢၫ်၀ံၤ အလီၫ်ခံ သးနံၣ်(၃၀)နံၣ်တုၤ(၃၉)နံၣ်အဘၢၣ်စၢၤ ဘၣ်ကူဘၣ်ဂာ် ၁၄,၀၀၀ဘျဲၣ်အသိး,သးနံၣ်(၂၀)နံၣ်တုၤ(၂၉)နံၣ်အဘၢၣ်စၢၤ ဘၣ်ကူဘၣ်ဂာ်၀ဲ ၁၃,၀၀၀ဂၤဘျဲၣ်အဂ့ၫ် ကီၫ်ကၠီၣ်တဲၣ် တၫ်ပၢဆှၢတၫ်ဆါ၀ဲၤကျိၤတဲ၀ဲလီၤ.
Ref: DVB
