လါယူၤ(၁၁)သီ,၂၀၂၅နံၣ်
ရၢရှၢၣ်ဒီးယူၣ်ကရ့ထံကီၫ်(၂)ဘ့ၣ်လၢာ်အံၤ ခးလိာ်သး အသုးကဘီယူၤပျီလၢ မျိာ်သၣ်ဒီးဒြိတဖၣ်အဂ့ၫ် ဖဲလါယူၤ(၉)သီ အနံၤန့ၣ် ထုးထီၣ်ဘိးဘၣ်ရၤလီၤတၫ်ကစီၣ်န့ၣ်လီၤ.
ကီၫ်ယူၣ်ကရ့ မုၫ်နုာ်ကလံၤစိးတကပၤ ရ့ဟီၣ်က၀ီၤ ယူၣ်ကရ့သုးကဘီယူၤသန့န့ၣ် သူ၀ဲမျိာ်သၣ်ဒီးဒြိတဖၣ် ဖဲလါယူၤ (၉)သီနံၤဟါဒီးတုၤ(၁၀)သီနံၤန့ၣ် ရၢရှၢၣ်သုးဖိတဖၣ်ဒုးဃီၤ၀ဲဒိၣ်ဒိၣ်မုာ်မုာ်အဂ့ၫ် ရၢရှၢၣ်တၫ်ဒီသဒၢကိတိာ်၀ဲၤကျိၤတဲ၀ဲ လီၤ.
တၫ်ဒုးတဘျီအံၤန့ၣ် မ့ၫ်လၢယူၣ်ကရ့နုာ်လီၤဒုးတၫ်လၢရၢရှၢၣ်အတၫ်ပၢဟီၣ်က၀ီၤအဃိ မၤကၣ်က့ၤ၀ဲအဂ့ၫ် ပာ်ဖျါ၀ဲလီၤ.
တၫ်ဒုးတဘျီအံၤအပူၤ မၤဟးဂီၤ၀ဲ ယူၣ်ကရ့ကဘီယူၤဒီးတၫ်ပာ်ကီၤမျိာ်သၣ်အလီၫ် န့ၫ်၀ဲအါအါဂီၫ်ဂီၫ်အဂ့ၫ် ရၢရှၢၣ် တၫ်ကစီၣ်သန့တဖၣ်ပာ်ဖျါ၀ဲလီၤ.
တကးဘၣ် ရၢရှၢၣ်သုးဖိတဖၣ်န့ၣ် သူ၀ဲမျာ်သၣ်လၢတၫ်ခးစိ၀ဲလၢတၫ်လီၫ်ယံၤဒီးပညိၣ်ခး၀ဲယူၣ်ကရ့သုးဖိတဖၣ်ဒီး ဘၣ်ထွဲတၫ်ဒီသဒၢတၫ်ဖံးတၫ်မၤတၫ်လီၫ်တဖၣ်အဂ့ၫ် ရၢရှၢၣ်တၫ်ဒီသဒၢကိတိာ်၀ဲၤကျိၤတဲ၀ဲလီၤ.
ကီၫ်ယူၣ်ကရ့တၫ်ခၢၣ်သး နံးပရိၣ်ပ့ၣ်ထရိးဟီၣ်က၀ီၤအပူၤ ရၢရှၢၣ်သုးဖိတဖၣ် မၤလဲၫ်ထီၣ်တၫ်ပၢဟီၣ်က၀ီၤ၀ံၤ ထီၣ်ဒုး ဃီၤ၀ဲယူၣ်ကရ့သုးကလၢၤတဖၣ်အဂ့ၫ် ရၢရှၢၣ်တၫ်ဒီသဒၢကိတိာ်၀ဲၤကျိၤတဲ၀ဲလီၤ.
ဖဲလါယူၤ(၉)သီအနံၤ,ဂီၤအကတီၫ်န့ၣ် ယူၣ်ကရ့ဒုးယၤလီၤဆီသုးဖိတဖၣ် ဒုးဃီၤ၀ဲ ကီၫ်ရၢရှၢၣ်,နဲးညံၣ်နီးကိၣ်ရီး ဆၣ်ဘဲးလ့ၣ်ကၣ် ကဘီယူၤသန့အဂ့ၫ် ယူၣ်ကရ့သု သုး၀ဲၤလီၫ်ခိၣ်သ့ၣ်၀ဲၤဒၢး ထုးထီၣ်ဘိးဘၣ်ရၤလီၤတၫ်ကစီၣ်လီၤ.
MiG-31Kလၢခးထီၣ်က့ၣ်ကၠဲၣ်မျိာ်သၣ်န့ၫ် တၫ်ပာ်ကီၤ ကဘီယူၤဒုးသုး ကဘီယူၤပျီအပူၤ ရၢရှၢၣ်ကဘီယူၤဒုးသုး(၂)ခိၣ် ဘၣ်ဟးဂီၤ၀ဲအဂ့ၫ် ယူၣ်ကရ့ ဘိးဘၣ်ရၤလီၤ၀ဲလီၤ.
ရၢရှၢၣ်န့ၣ် ဖဲလါယူၤ(၉)သီနံၤန့ၣ် သူ၀ဲဒြိအခိၣ်(၅၀၀)ဃၣ်ဃၣ်ဒီးမျိာ်သၣ်တဖၣ်၀ံၤ ဒုးဃီၤ၀ဲယူၣ်ကရ့တၫ်ပၢအဂ့ၫ် ယူၣ်ကရ့ကလံၤသုးတဲ၀ဲလီၤ.
ခ့ၣ်စဲၣ်မျိာ်သၣ်(၄)ခိၣ်ပာ်ဃုာ် ကဘီယူၤလၢတလိၣ်ပှၤနီအခိၣ်(၄၆၀)ဒီးမျိာ်သၣ်(၁၉)ခိၣ် ယူၣ်ကရ့တကပၤ တြီဆၢ၀ဲန့ၫ် အဂ့ၫ် CCTVတၫ်ကစီၣ်သန့ ပာ်ဖျါ၀ဲလီၤ.
လၢဒုးယၤတၫ်ရဲၣ်တၫ်ကျဲၤလီၤဆီတခါအပူၤ ယူၣ်ကရ့ဒြိတဖၣ်န့ၣ် ပညိၣ်ဒုးဃီၤ၀ဲ ခၠူၣ်ဘၣ်ရှံၣ်ယၣ်ဟီၣ်က၀ီၤ ရၢရှၢၣ် တၫ်ဒီသဒၢတၫ်ဖံးတၫ်မၤအလီၫ်န့ၣ်လီၤ.
မ့ၫ်ဒ်သိးတၫ်ကမၤစှၤလီၤ ရၢရှၢၣ်ကလံၤကျါဒုးယၤကံၫ်စီအဂီၫ်ဒီးတၫ်မၤလီၫ်လၢယူၣ်ကရ့ပာ်ပနီၣ်၀ဲန့ၣ် ဒုးခး၀ဲဘၣ်ဒီး ကဘီယူၤလၢတလိၣ်ပှၤနီ(၂)ခိၣ်၀ံၤမ့ၣ်အူအီၣ်ဟးဂီၤကွံာ်၀ဲန့ၣ်လီၤ.
