လါယူၤ(၁၀)သီ, ၂၀၂၅နံၣ်
လါယူၤ(၉)သီအနံၤ, မုၢ်ထူၣ်(၂း၃၀)နၣ်ရံၣ်အဆၢကတီၢ် ပယီၤသုးကီၣ်ကးအသုး ဟဲတ့ၢ်လီၤမ့ၣ်ပိၢ်ဆူ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၆), ကီးတရံး၀့ၢ်မုၢ်နုၥ်တပၤအိၣ် ပဲၢ်ယဲးသ၀ီတၢ်သိၣ်လိကၠိပူၤအဃိ ဖိသၣ်ဒီးသရၣ်မုၣ်ပၣ်ဃုၥ်(၄)ဂၤဘၣ်သံ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“သ၀ီန့ၣ် အအိၣ်စီၣ်စုၣ်ယံၤဒီး ကီးတရံး၀့ၢ်ဒီးကြုၢ်တု၀့ၢ်လၢတၢ်ဒုးကဲထီၣ်အလီၢ်န့ၣ်လီၤ. တၢ်ဒုးကဲထီၣ်သးတအိၣ်ဘၣ်. ပှၤဖီၣ်စုက၀ဲၤကရၢတဖုမးတအိၣ်ဘၣ်. ဖိသၣ်တဖၣ်ဒီးသရၣ်/သရၣ်မုၣ်တဖၣ် ဘၣ်ဒိဘၣ်ထံးအါမးလီၤ”အဂ့ၢ် လီၢ်က၀ီၤဖိတဂၤစံး၀ဲန့ၣ်လီၤ.
ခီဖျိသုးကီၣ်ကးအသုး ဟဲတ့ၢ်လီၤမ့ၣ်ပိၢ်အဃိ ဖိသၣ်(၂)ဂၤဒီးသရၣ်မုၣ်(၁)ဂၤပၣ်ဃုၥ်(၄)ဂၤသံ၀ဲ၀ံၤ တၢ်သံတၢ်ပှၢ်တဖၣ်အိၣ်အါထီၣ်သ့အဂ့ၢ်ဒီး မ့မ့ၢ်လၢပှၤဘၣ်ဒိဘၣ်ထံးတဖၣ်တခီ အိၣ်ထီၣ်တုၤ(၁၅)ဂၤအသိး ပှၤလၢဘၣ်ဒိဘၣ်ထံးဆူၣ်ဆူၣ်ကိၥ်ကိၥ်စ့ၢ်ကီးအိၣ်၀ဲအဂ့ၢ် လီၢ်က၀ီၤဖိတနီၤစံး၀ဲန့ၣ်လီၤ.
ဖဲအပူၤကွံၥ်လါအ့ဖြ့ၣ်ခံနွံတနွံအတီၢ်ပူၤလံၤလံၤန့ၣ် တၢ်ဒုးတဖၣ်ကဲထီၣ်တ့ၢ်အသးတပယူၥ်ဃီလၢ သုးက့(၆), ကီးတရံးကီၢ်ဆၣ်အပူၤ ကီးတရံးဒီးကြုၢ်တု၀့ၢ်အကပၤဘၣ်ဆၣ် အခဲအံၤပဲၢ်ယဲးသ၀ီလၢတၢ်ဟဲတ့ၢ်လီၤမ့ၣ်ပိၢ်အံၤန့ၣ် အိၣ်စိၣ်စုၣ်ယံၤဒီး၀့ၢ်တဖၣ်ဒီး သ၀ီအံၤန့ၣ်အိၣ်၀ဲဒၣ်ဖဲ ကီးတရံးဒီးကၠဲးကယီကီၢ်ဆၣ်အဆၢအဂ့ၢ် လီၢ်က၀ီၤဖိတဖၣ်စံး၀ဲန့ၣ်လီၤ.
