ဒုးအိၣ်ထီၣ်ကမျၢၫ်ပဒိၣ်ကန့ၫ်အဂီၫ် တၫ်ဒုးအိၣ်ထီၣ် ကီၫ်တအါကီၣ်ကး

လါယူၤ(၁၀)သီ,၂၀၂၅နံၣ်

ကီၫ်တအါအတၫ်ပၢၫ်ဆၢ အဆၢကတီၫ် ဒ်ထံရူၫ်ကီၫ်သဲးတၫ်စိတၫ်ကမီၤအိၣ်တၫ်ကရၢကရိ အထီကတၢၫ်အသိးဒီး တၫ်ဒုးအိၣ်ထီၣ်ကမျၢၫ်ပဒိၣ်ကန့ၫ်အဂီၫ် တၫ်ကရၢကရိဒုးအိၣ်ထီၣ် ကီၫ်တအါကီၣ်ကး(Ta’ang Land Council – TLC) အဂ့ၫ် ဖဲလါယူၤ(၉)သီအနံၤန့ၣ် ထုးထီၣ်ဘိးဘၣ်ရၤလီၤ၀ဲလီၤ.

တအါထံရူၫ်ကီၫ်သဲးတၫ်ကူၣ်လိာ်တၢၣ်ပီၣ်ကမံတံာ်(TPCC)အပတီၫ်ထီ ထံရူၫ်ကီၫ်သဲးတၫ်အိၣ်ဖှိၣ်အပူၤ ကမံတံာ် လၢကွဲးကီၫ်တအါဂ့ၫ်ခီၣ်ထံးသဲစးတၫ်ဘျၢ ကွဲးလီၤဃာ်၀ဲလၢ”ကီၫ်တအါတၫ်ပၢၫ်ဆၢ အဆၢကတီၫ် ပဒိၣ်အတၫ် ရဲၣ်တၫ်ကျဲၤ”န့ၣ် တူၫ်လိာ်ပာ်ဂၢၫ်ပာ်ကျၢၤ၀ဲ၀ံၤ ကီၫ်တအါကီၣ်ကးန့ၣ် လၢကီၫ်တအါအတၫ်ပၢၫ်ဆၢ အဆၢကတီၫ် ကကဲထီၣ်ထံရူၫ်ကီၫ်သဲးတၫ်ကရၢကရိလၢအိၣ်ဒီးတၫ်စိတၫ်ကမီၤအထီကတၢၫ်အဂီၫ် ဆၢတဲာ်လီၤ၀ဲဃူဃူဖိးဖိးအဂ့ၫ် တဲ၀ဲလီၤ.

တၫ်ရဲၣ်တၫ်ကျဲၤအံၤအဖီခိၣ် ၂၀၂၁နံၣ်,လါမးရှး(၂၄)သီနံၤ ကရၢကရိဒုးအိၣ်ထီၣ်တ့ၫ်၀ဲ တအါထံရူၫ်ကီၫ်သဲးတၫ်ကူၣ် လိာ်တၢၣ်ပီၣ်ကမံတံာ်န့ၣ် ကဘၣ်တီခိၣ်ရိၣ်မဲ ကီၫ်တအါအပၢပြးဂ့ၫ်၀ီ,တၫ်ကွဲးလီၤသဲစးတၫ်ဘျၢဂ့ၫ်၀ီ, စံၣ်ညီၣ်ပီတ့ ဂ့ၫ်၀ီတဖၣ်ကန့ၫ်အဂီၫ် တၫ်ဆီတလဲကရၢကရိဒုးအိၣ်ထီၣ်၀ဲန့ၣ်လီၤ.

တအါထံရူၫ်ကီၫ်သဲးတၫ်ကူၣ်လိာ်တၢၣ်ပီၣ်ကမံတံာ်န့ၣ် တအါဒီကလုာ်ပၣ်တံၣ်(TNP),ပလီၣ်ကီၫ်စဲၣ်တၫ်ထူၣ်ဖျဲးသုးမုၫ် ဒိၣ် PSLF/TNLA)ဒီးတအါကမျၢၫ်တၫ်ကရၢကရိတဖၣ်ပာ်ဃုာ်၀ံၤ ပတီၫ်ထီထံရူၫ်ကီၫ်သဲးတၫ်အိၣ်ဖှိၣ်န့ၣ် ဘၣ်တၫ်မၤ၀ဲ ဖဲ၂၀၂၅နံၣ်,လါယူၤ(၁)သီတုၤ(၃)သီအနံၤန့ၣ်လီၤ.

ကမံတံာ် ဆီတလဲကရၢကရိဒုးအိၣ်ထီၣ်၀ဲ ကီၫ်တအါကီၣ်ကးအပူၤ ပလီၣ်ကီၫ်စဲၣ်တၫ်ထူၣ်ဖျဲးသုးမုၫ်ဒိၣ် (PSLF/TNLA) အပှၤပၢၤလီၫ်ဆ့ၣ်နီၤ သုးခိၣ်ကျၢၫ်ဒိၣ်စိတါအဲးဘိန့ၣ် ဟံးန့ၫ်မူဒါ ဒ်ပှၤပၢၤလီၫ်ဆ့ၣ်နီၤအသိး၀ံၤ တအါဒီကလုာ်ပၣ်တံၣ်, PSLF/TNLAဒီးကမျၢၫ်တၫ်ကရၢကရိတကပၤ ပာ်ဃုာ်၀ဲ (၃)ဂၤစုာ်စုာ် န့ၣ်လီၤ.

ကီၫ်တအါကီၣ်ကးန့ၣ် ဟံးန့ၫ်အခီၣ်တဃာ်လၢ ဟီၣ်က၀ီၤလၢ ဒုးဖျိးကွံာ်သုးကီၣ်ကးတဖၣ်အဖီခိၣ်၀ံၤ ကီၫ်တအါတၫ် ပၢၫ်ဆၢအကတီၫ် ကမျၢၫ်ပဒိၣ်န့ၣ် တၫ်ကရၢကရိ(၃)ဖုအခိၣ်နၫ်ခၢၣ်စးတဖၣ်တကးဘၣ် ဃုာ်ဒီးကမျၢၫ်ခၢၣ်စးတဖၣ် ဖဲ၂၀၂၅နံၣ်အပူၤ တၫ်ကရၢကရိဒုးအိၣ်ထီၣ်ကဒီး၀ဲကန့ၫ်အဂီၫ် ကဂဲၤလိာ်၀ဲလၢအဆိအချ့အဂ့ၫ်စ့ၫ်ကီး ထုးထီၣ်ဘိး ဘၣ်ရၤလီၤဃာ်၀ဲလီၤ.