လါယူၤ(၂)သီ,၂၀၂၅နံၣ်
အ့ရှၢၣ်ဟီၣ်က၀ီၤအပူၤ ကထုးသူသုးအဂံၢ်အဘါအဂီၢ် တရူးကတဲၥ်ကတီၤ၀ဲအဂ့ၢ် အမဲရကၤတၢ်ဒီသဒၢကိတိၥ် ပံးဟဲးဆဲး ဟ့ၣ်ပလီၢ်တဲလီၤ၀ဲန့ၣ်လီၤ.
အ့ရှၢၣ်ဟီၣ်က၀ီၤအပူၤ တရူးန့ၣ် ဒ်သိးအတၢ်စိတၢ်ကမီၤကဒိၣ်စိအဂီၢ်ပညိၣ်၀ဲ၀ံၤ ကထုးသူ၀ဲသုးအဂံၢ်အဘါအဂီၢ် ကတဲၥ်ကတီၤဃၥ်၀ဲအဂ့ၢ်န့ၣ် နၥ်သပှၢ်ကတၢၢ်လီၤအဂ့ၢ် ဖဲလါမ့ၤ(၃၁)သီအနံၤန့ၣ် ဟဲးဆဲးစံး၀ဲန့ၣ်လီၤ.
ဟဲးဆဲးလၢ အတီခိၣ်ရိၣ်မဲ အမဲရကၤပ့ၣ်တကိၣ်သုး၀ဲၤလီၢ်ခိၣ်သ့ၣ်အံၤ ဖဲလၢဟဲထီၣ်၀ဲတၢ်ဘံၣ်တၢ်ဘၢဖိၣ်ရၣ်တခါလၢ ကီၢ်စ့ၣ်ကပူၣ်မၤ၀ဲတၢ်ရဲၣ်တၢ်ကျဲၤအကတီၢ် တဲလီၤ၀ဲဒ်အံၤန့ၣ်လီၤ. စးထီၣ်လၢ ဒီၣ်နၢၤထရၢးကဲထီၣ်ကီၢ်ခိၣ်လၢ ကီၢ်အမဲရကၤအဆၢကတီၢ် တၢ်ကူလဲၢ်မၤကၤ, စဲအ့ပီညါ, တၢ်တိၥ်ကူၣ်ကျဲၤတၢ်လူၤဘၢဂ့ၢ်၀ီတဖၣ်အဖီခိၣ် တၢ်ပြၢလိၥ်သးတဖၣ် ဆူၣ်ထီၣ်၀ဲဒီးတရူးပဒိၣ်န့ၣ်လီၤ.
ဘၣ်ထွဲဒီးဟဲးဆဲးအတၢ်ပဲၥ်အၢပဲၥ်သီအဖီခိၣ် တရူးထံဂုၤကီၢ်ဂၤကိတိၥ်၀ဲၤကျိၤတပၤတခီ ဂ့ၢ်လိၥ်၀ဲတဘျီဃီန့ၣ်လီၤ. တၢ်အံၤန့ၣ် မ့ၢ်ဒၣ် တရူးဒီးထဲၣ်၀ၣ်တၢ်သဘံၣ်သဘုၣ်အဖီခိၣ် အမဲရကၤအတၢ်ကူၣ်တခါလီၤအဂ့ၢ်န့ၣ် တရူးတပၤတဲခီၣ်ဆၢက့ၤ၀ဲန့ၣ်လီၤ.
ရှၣ်ကရံၣ်လၣ်တၢ်ဘံၣ်တၢ်ဘၢတၢ်အိၣ်ဖှိၣ်ဖးဒိၣ်အပူၤ ဟဲးဆဲးစံး၀ဲလၢ တရူးအတၢ်မၤပျံၤမၤဖူးတဖၣ်န့ၣ် ဟဲအိၣ်ဘူးထီၣ်အနီၢ်ကီၢ်လံအဂ့ၢ်, အ့ၣ်ဒိၣ်-ပစံးဖ့းလီၢ်က၀ီၤအပူၤ တၢ်စိတၢ်ကမီၤတၢ်ဒိၣ်စိတၢ်ကဆီတလဲအဂီၢ် တရူးန့ၣ် ကထုးသူ၀ဲသုးအဂံၢ်အဘါအဂီၢ် ရဲၣ်ကျဲၤ၀ဲအဂ့ၢ်န့ၣ် အ၀ဲစံး၀ဲန့ၣ်လီၤ. ၀ံၤလီၢ်အခံ တရူးန့ၣ်ဒ်သိး ကဂုၤန့ၢ်ဆူၣ်ကီၢ်ထဲၣ်၀ၣ်အဂီၢ် ကတဲၥ်ကတီၤဃၥ်၀ဲတၢ်လၢအမၤသးသ့တၢ်အိၣ်သးသ့ၣ်တဖၣ်အဂ့ၢ် အ၀ဲးစံးအါထီၣ်၀ဲန့ၣ်လီၤ.
မ့မ့ၢ်လၢတရူးထံဂုၤကီၢ်ဂၤကိတိၥ်၀ဲၤကျိၤတခီ အမဲရကၤန့ၣ် ဒ်သိးကပၢၤ၀ဲတရူးကန့ၢ်အဂီၢ် တကြၢးသူအီၣ်၀ဲကီၢ်ထဲၣ်၀ၣ်ဘၣ်အသိး တကြၢးဂဲၤလိၥ်ကွဲဒီးမ့ၣ်အူဘၣ်အဂ့ၢ် ခီၣ်ဆၢက့ၤ၀ဲန့ၣ်လီၤ. တရူးန့ၣ် အပျဲလီၤ၀ဲခၢၣ်စးကရၢဆူ ရှၣ်ကရံၣ်လၣ်တၢ်အိၣ်ဖှိၣ်ဖးဒိၣ်အအိၣ်ဘၣ်ဆၣ် တၢ်ဒီသဒၢကိတိၥ်၀ဲၤကျိၤ ပတီၢ်ထီခိၣ်နၢ်တဖၣ် တပၣ်ဃုၥ်၀ဲဘၣ်န့ၣ်လီၤ.
တရူးထံသုးတၢ်လီၢ်ခံပှၤဘၣ်မူဘၣ်ဒါဟၣ်ကွၢ်ဖါလၢအမ့ၢ်အတီခိၣ်ရိၣ်မဲတၢ်လဲၤရှၣ်ကရံၣ်လၣ်တၢ်အိၣ်ဖှိၣ်ဖးဒိၣ်အံၤတခီတပညိၣ်လိၤလိၤဟဲးဆဲးဘၣ်ဆၣ်ထံကီၢ်တနီၤအတၢ်ဟူးတၢ်ဂဲၤတဖၣ်န့ၣ်အဒုးအိၣ်ထီၣ်တၢ်တၢ်သဘံၣ်သဘုၣ်တဖၣ်၀ံၤ အဒုးအိၣ်ထီၣ်တၢ်လီၤမုၢ်လီၤဖးတဖၣ်, အဒုးအိၣ်ထီၣ်တၢ်သဘံၣ်သဘုတဖၣ်ဒိၣ်ဒိၣ်ယိၥ်ယိၥ်တၢ်ဂ့ၢ်တဖၣ်အဃိ တၢ်ပိၥ်ထွဲထီၣ်အခံန့ၣ် လၢအ့ရှၢၣ်-ပစံးဖ့းလီၢ်က၀ီၤအပူၤ တၢ်တဂၢၢ်တကျၢၤတၢ်အိၣ်သးတဖၣ် ဟဲအိၣ်ထီၣ်သ့အဂ့ၢ် ဟ့ၣ်ပလီၢ်၀ဲန့ၣ်လီၤ.
Ref : AFP
