လါမ့ၤ(၃၀)သီ, ၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၆), ကီးတရံးကီၢ်ဆၣ်ဟီၣ်က၀ီၤအပူၤ ခီဖျိသုးကီၣ်ကးအသုး ဟဲတ့ၢ်လီၤမ့ၣ်ပိၢ်တဖၣ်အဃိ ကွံလၢၢ်စုၢ်သ၀ီတၢ်သိၣ်ကၠိ ကၠိဖိမုၣ်ခွါတဖၣ်ဘၣ်ဒိ၀ဲအဃိ ဘၣ်တၢ်လဲၤကူစါယါဘျါအီၤဆူ ကၠီၣ်တဲၢ်တပၤအဂ့ၢ် တၢ်သ့ၣ်ညါဘၣ်န့ၣ်လီၤ.
“မဟါအနံၤလါမ့ၤ(၂၉)သီအနံၤ, ဟါ(၇)နၣ်ရံၣ်ဃၣ်ဃၣ်အဆၢကတီၢ် ခီဖျိသုးကီၣ်ကးအသုး ဟဲတ့ၢ်လီၤမ့ၣ်ပိၢ်အဃိ ကွံလၢၢ်စုၢ်ကၠိဖိဟံၣ်ဒွဲအဃိ ကၠိဖိမုၣ်ခွါတဖၣ် ဘၣ်ဒိ၀ဲလီၤ. တၢ်လဲၤဆှၢ ကူစါယါဘျါသးလၢ ကၠီၣ်တဲၣ်တပၤလီၤ. ကွံလၢၢ်စုၢ်သ၀ီန့ၣ် အအိၣ်လၢသ့ၣ်ဘီဘိကရူၢ်အပူၤလီၤ. အ၀ဲသ့ၣ်သုးကလၢၤတဖၣ်လီၤကွံၥ်အဃိ ဟဲဒုးတ့ၢ်လီၤမ့ၣ်ပိၢ်တဖၣ်နါစိၤအဂ့ၢ်” ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
တုၤလၢ ဟါ(၉း၅၀)ဘျဲၣ်အဆၢကတီၢ်န့ၣ် သုးကီၣ်ကးအသုး ကဘီယူၤဒုးသုးတဖၣ် ဟဲတ့ၢ်လီၤမ့ၣ်ပိၢ်အဂ့ၢ် ဂံၢ်ခီၣ်ထံးတၢ်ကစီၣ် စံးအါထီၣ်၀ဲန့ၣ်လီၤ.
“တုၤခဲအံၤန့ၣ် ကဘီယူၤဒုးသုးတဖၣ် ဟဲ့တ့ၢ်လီၤမ့ၣ်ပိၢ်ဒံးအဖၢမုၢ်လီၤ. တုၤဟါခီ(၉း၅၀)နၣ်ရံၣ်အဆၢကတီၢ်န့ၣ် တၢ်နၢ်ဟူ၀ဲတၢ်ကလုၢ်တဖၣ်ဒံးန့ၣ်လီၤ. ကညီကီၢ်စဲၣ်, ကီးတရံးဟီၣ်က၀ီၤအပူၤလီၤ. ဟးတ့ၢ်လီၤ၀ဲမ့ၣ်ပိၢ်နါစိၤ” န့ၣ်လီၤ.
ကတီၢ်ခဲအံၤန့ၣ် ကၠီၣ်တဲၣ်-ကီၢ်သူလ့ၤဟီၣ်က၀ီၤအပူၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်ဒီးသုးပၥ်ဖှိၣ်တဖၣ် ထီၣ်ဒုးမၤန့ၢ် သုးကီၣ်ကးသုးကလၢၤတဖၣ် တပယူၥ်ဃီအဃိ သုးကီၣ်ကးတပၤ ဟဲဒုးဆၢတၢ်လၢကလံၤကျါတၢ်ဒုးတတဖၣ်အဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
