လါမ့ၤ(၂၃)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၆)ဟီၣ်က၀ီၤ, ရၤမတံ၀့ၢ်ကလံၤထံး, တီနီၢ်ကစၢၢ်မုၢ်ထီၣ်တကပၤအိၣ် သုးကီၣ်ကးကနဲလ့သုးကလၢၤပၣ်ဃုၥ်သုးကလၢၤ(၄)ဖျၢၣ်အံၤသုးက့(၆)KNLAတီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ်တဖၣ် စးထီၣ်ထီၣ်ဒုး၀ဲလံအဂ့ၢ် တၢ်သ့ၣ်ညါဘၣ်လၢ ဂံၢ်ခီၣ်ထံးတၢ်ကစီၣ်တဖၣ်အအိၣ်န့ၣ်လီၤ.
သုးကီၣ်ကးအသုးကလၢၤ(၄)ဖျၢၣ်လၢ အိၣ်ဆီလီၤဃၥ်သး ဖဲဝီၢ်လ့ၤ, ကနဲလ့, ဘလၢၢ်ဒိၣ်, မီခံဒီးသ့ၣ်ဘီဘိသ၀ီအကပၤတဖၣ် တၢ်ထီၣ်ဒုးအီၤလၢ ဒြိတဖၣ်အဃိ တၢ်ဒုးတဖၣ်ဆူၣ်ထီၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
သုးကလၢၤတဖၣ်အံၤအိၣ်၀ဲဒၣ်ဖဲ သုးက့(၆)ဟီၣ်က၀ီၤတဖၣ်အပူၤ၀ံၤ လါမ့ၤ(၂၀)သီအနံၤန့ၣ် စးထီၣ်ထီၣ်ဒုး၀ဲမီခံသုးကလၢၤ၀ံၤ ဖဲလါမ့ၤ(၂၁)သီအနံၤတခီ မၤတၢ်ဒုး ကနဲလ့,သ့ၣ်ဘီဘိဒီး ကလၢၢ်ဒိၣ်သုးကလၢၤတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ခီဖျိလၢကီၢ်ပယီၤတကပၤ တၢ်ဒုးတဖၣ်ကဲထီၣ်သးအဃိ ကၠီၣ်တဲၣ်သုးမုၢ်ဒိၣ် အိၣ်ခိးကွၢ်၀ဲ ဘူးဘူးတံၢ်တ့ၢ် ဖဲကီၢ်ဆၢဒီတကျိၤပူၤအဂ့ၢ် ပၥ်ဖျါဃၥ်၀ဲန့ၣ်လီၤ.
ကတီၢ်ခဲအံၤ ဝီၢ်လ့ၤ၀့ၢ်အိၣ် သ့ၣ်ဘီဘိသုးကလၢၤဒီးမီခံသုးကလၢၤတဖၣ်အံၤ ဖဲအပူၤကွံၥ်၂၀၂၂နံၣ်အတီၢ်ပူၤန့ၣ် KNUဒုးမၤန့ၢ်ဃၥ်၀ဲဘၣ်ဆၣ် ခီဖျိသုးကီၣ်ကးအသုးမၤက့ၤတၢ်ထီၣ်ဒုးအဃိ ဘၣ်ပျၢ်ကဒါက့ၤ၀ဲသုးကလၢၤခံဖျၢၣ်န့ၣ်လီၤ.
KNUအစုတီဖီလၥ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA),ကညီဒီကလုၥ်ဂၢၤသးကရၢ (KNDO)သုးတဖၣ် ထီၣ်ဒုးမၤန့ၢ်၀ဲ သုးကီၣ်ကးအသုးကလၢၤတဖၣ်လၢအိၣ်ဖဲ ကၠီၣ်တဲၣ်-ကီၢ်သူလ့ၤကီၢ်ဆၢ, သုးက့(၇)ဟီၣ်က၀ီၤအပူၤ၀ံၤအလီၢ်ခံ ကတီၢ်ခဲအံၤန့ၣ် ထီၣ်ဒုး၀ဲသုးကီၣ်ကးသုးကလၢၤတဖၣ်လၢအိၣ်ဖဲ သုးက့(၆)ဟီၣ်က၀ီၤပူၤတဖၣ်န့ၣ်လီၤ.
