လါမ့ၤ(၂၂)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၇), ကၠီၣ်တဲၣ်-ကီၢ်သူလ့ၤကီၢ်ဆၢ သူမွဲကျိကၢၢ်နံၤအိၣ် သုးကီၣ်ကးသုးကလၢၤ(၈)ဖျၢၣ် တၢ်ထီၣ်ဒုးမၤန့ၢ်၀ဲအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲ၀ံၤ သုးခိၣ်သုးနၢ်ဒီးသိၣ်ဒူလၢအနုၥ်လီၤတၢ်ဒုးတဖၣ် တၢ်ပၥ်လၤပၥ်ကပီၤမၤလၤကပီၤ၀ဲဖဲ လါမ့ၤ(၂၁)သီအနံၤန့ၣ်လီၤ.
သုးက့(၇)ဟီၣ်က၀ီၤ, သူမွဲကျိကၢၢ်နံၤအိၣ် သုးကီၣ်ကးသုးကလၢၤ(၈)ဖျၢၣ်အံၤ တၢ်စးထီၣ်မၤဒုးယၤရဲၣ်ကျဲၤဖဲ၂၀၂၄, လါဒံၣ်စ့ဘၢၣ်(၁၆)သီအနံၤတုၤ၂၀၂၅,လါမ့ၤ(၁၉)သီအနံၤ ၅လါအတီၢ်ပူၤ ဒုးမၤန့ၢ်ဃၥ်၀ဲန့ၣ်လီၤ.
ကၠီၣ်တဲၣ်-ကီၢ်သူလ့ၤကီၢ်ဆၢအိၣ် သုးကလၢၤ(၈)ဖျၢၣ်ဒ်အမ့ၢ် မီဖါသူ, တညၣ်ကၠိ, တခီၣ်ဘံၣ်ကွံ, ပူလူတူၢ်, ချၢၣ်ဒ့, မီကွံလူၢ်, လ့ဂီၤသုးကလၢၤတဖၣ် တၢ်ထီၣ်ဒုးမၤန့ၢ်ဃၥ်၀ဲန့ၣ်လီၤ.
တၢ်ထီၣ်ဒုး ဒုးယၤရဲၣ်ကျဲၤတဖၣ်အံၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA), သုးက့(၇)သုးတၢ်နဲၣ်လီၤအစုတီဖီလိၥ် သုးရ့ၣ်(၂၂) တီခိၣ်ရိၣ်မဲၥ်၀ဲဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်- KNLA, ကညီဒီကလုၥ်ဂၢၤသးကရၢ- KNDOသုးခိၣ်သုးနၢ်ဒီးသိၣ်ဒူတဖၣ် နုၥ်လီၤဒုးမၤန့ၢ်၀ဲသုးကီၣ်ကးသုးကလၢၤတဖၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
သုးခိၣ်သုးနၢ်ဒီးသိၣ်ဒူတဖၣ်လၢ တၢ်သူၣ်ဒူသးဒူအပူၤနုၥ်လီၤတၢ်ဒုးဒီးမၤန့ၢ်သုးကလၢၤတဖၣ်အဃိ သူမွဲကျိကၢၢ်နံၤအိၣ် ဒူသ၀ီထံဖိကီၢ်ဖိကမျၢၢ်တဖၣ်အံၤ လၢတၢ်သဘျ့အပူၤ ဃုဖံးဃုမၤလူၤအီၣ်သးသမူသ့လံအဂ့ၢ် ပၥ်ဖျါဃၥ်၀ဲန့ၣ်လီၤ.
လၢတၢ်န့ၣ်အဃိ ဖၣ်အၣ်ကီၢ်ရ့ၣ်, သုးက့(၇)ပှၤဘၣ်မူဘၣ်ဒါခိၣ်နၢ်တဖၣ်, လီၢ်ခၢၣ်သးဒီးဖၣ်အၣ်ကီၢ်ရ့ၣ်ကညီပိၥ်မုၣ်ကရၢ(KWO), လီၢ်က၀ီၤဒူသ၀ီကမျၢၢ်ဖိတဖၣ် မၤလၤမၤကပီၤ၀ဲ သုးခိၣ်သုးနၢ်ဒီးသိၣ်ဒူတဖၣ်လၢ အနုၥ်လီၤတၢ်ဒုးလၢတၢ်သူၣ်ဒူသးဒူပူၤတဖၣ်အဂ့ၢ် ပၥ်ဖျါဃၥ်၀ဲလၢတၢ်ဂီၤမူန့ၣ်လီၤ.
