လါမ့ၤ(၂၂)သီ,၂၀၂၅နံၣ်
ကညီကီၫ်စဲၣ်,ရၤမတံကီၫ်ဆၣ်,ကၠီၣ်တဲၣ်-ပယီၤကီၫ်ဆၢ မီာ်ခံသုးကီၣ်ကအသုးကလၢၤန့ၣ် တၫ်ပၢၫ်ဆၢသုးပာ်ဖှိၣ်တဖၣ် စးထီၣ်ထီၣ်ဒုးဃီၤ၀ဲအဂ့ၫ် ကၠီၣ်တဲၣ်-ပယီၤကီၫ်ဆၢ သုးဂ့ၫ်၀ီဂ့ၫ်ခီၣ်ထံးတၫ်ကစီၣ်တဲ၀ဲလီၤ.
ဖဲလါမ့ၤ(၂၁)သီနံၤ ဂီၤ(၇)နၣ်ရံၣ်အဆၢကတီၫ် ကၠီၣ်တဲၣ်-ပယီၤကီၫ်ဆၢ ၀့ၫ်ရၤမတံကလံၤထံး,၀ီၫ်လ့ၤဟီၣ်က၀ီၤအပူၤ သုးကီၣ်ကးအမီာ်ခံသုးကလၢၤန့ၣ် ကီၫ်သူလ့ၤသုးမုၫ်ဒိၣ်(KTLA),သုးခိၣ်နၢၤဒါမၠးအစုတီၤဖီလာ်သိၣ်မှံၤသုးပာ်ဖှိၣ်တဖၣ် ထီၣ်ဒုး၀ဲဒီးတၫ်ဒုးဆူၣ်ထီၣ်အဂ့ၫ် သုးဂ့ၫ်၀ီဂ့ၫ်ခီၣ်ထံးတၫ်ကစီၣ်လၢဘူးဒီးကၠီၣ်တဲၣ်-ပယီၤကီၫ်ဆၢကမံတံာ်တဲ၀ဲလီၤ.
“လၢဂီၤခီ(၇)နၣ်ရံၣ်ဃၣ်ဃၣ်တၫ်ဒုးကဲထီၣ်၀ဲလီၤ.ခးလိာ်သးဒီးKTLAသုးခိၣ်နၢၤဒါအပှၤတဖၣ်လီၤ.တ့ၫ်လီၤမ့ၣ်မိၫ်လၢဒြိတဖၣ်လီၤ.လၢကၠီၣ်တဲၣ်တကပၤတၫ်ကွၫ်စိ၀ဲဖျါလီၤ.၀ီၫ်လ့ၤတၫ်တိာ်ကူၣ်ကျဲၤသုးကလၢၤပူၤ ခးထီၣ်ကျိဖးဒိၣ်တဖၣ်စ့ၫ် ကီးတၫ်ထံၣ်ဘၣ်၀ဲလီၤ.ကၠီၣ်တဲၣ်တကပၤ ကျိချံသုတလီၤဒီးကဘီယူၤသုတဟဲခီတလၢတၫ်တဂ့ၤအဂီၫ် ကၠီၣ်တဲၣ်သုး တကပၤအိၣ်ခိးလီၤတၫ်အဂ့ၫ်” သုးဂ့ၫ်၀ီဂ့ၫ်ခီၣ်ထံးတၫ်ကစီၣ်လၢဘူးဒီးကၠီၣ်တဲၣ်-ပယီၤကီၫ်ဆၢကမံတံာ်တဲ၀ဲလီၤ.
တၫ်ဒုးကဲထီၣ်အဃိ ရၤမတံ,၀ီၫ်လ့ၤကျဲန့ၣ် KNU,သုးက့နီၫ်ဂံၫ်(၆)အပူၤ သိၣ်မှံၤသုးပာ်ဖှိၣ်တဖၣ် ပတုာ်ဃာ်တၫ်ဟး ထီၣ်က့ၤလီၤတစိၫ်တလီၤ၀ံၤ လၢသိထးကွ့း တုၤဖလူသ၀ီ KNLAသုးကျိၤတဖၣ် အိၣ်ရၤလီၤဃာ်အသုးအဂ့ၫ် တၫ်သ့ၣ်ညါဘၣ်လီၤ.
၀ီၫ်လ့ၤ အဆၢခိၣ်ဟီၣ်က၀ီၤတဖၣ်အပူၤ သုးကီၣ်ကးအ၀ီၫ်လ့ၤတၫ်တိာ်ကူၣ်ကျဲၤသုးကလၢၤ, ကနဲလ့သုးကလၢၤတဖၣ် အိၣ်၀ဲ၀ံၤ လၢ၀ီၫ်လ့ၤအဆၢလာ်တကပၤတခီ အူကရ့းထၣ်,၀ၣ်မံၤထၣ်သုးကလၢၤဒီးသ့ၣ်ဘီဘိသုးကလၢၤတဖၣ် အိၣ် တ့ၫ်၀ဲဒံးအဂ့ၫ် တၫ်သ့ၣ်ညါဘၣ်လီၤ.
လၢကတီၫ်အံၤ ကၠီၣ်တဲၣ်-ပယီၤကီၫ်ဆၢ ၀့ၫ်ဖိးဖရးဒီး၀့ၫ်အိၣ်ဖၣ်အကပၤ လၢကီၫ်ပယီၤတကပၤတၫ်ဒုးဆူၣ်ထီၣ်အဃိ ကၠီၣ်တဲၣ်သုးခိးကီၫ်ဆၢ သုးကလၢၤတဖၣ် အိၣ်ခိးလီၤဃာ်တၫ်ဘံၣ်တၫ်ဘၢအဂ့ၫ် တၫ်သ့ၣ်ညါဘၣ်လီၤ.
