လါမ့ၤ(၂၁)သီ, ၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ဖၣ်အၣ်ကီၢ်ရ့ၣ်,သုးက့(၇),တၢ်ကြဲၢ်ကီၢ်ဆၣ်ပူၤ သုးမီၤစိရိၤသုးကီၣ်ကးမီဖိက့ၣ်သုးကလၢၤလၢအအိၣ်ဆီလီၤအသးဖဲ သုးက့(၇)ဟီၣ်က၀ီၤပူၤအံၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကညီဒီကလုၥ်ဂၢၤသးကရၢ (KNDO)သုးပၥ်ဖှိၣ်တဖၣ်ထီၣ်ဒုးမၤန့ၢ်၀ဲအဂ့ၢ်တၢ်သ့ၣ်ညါဘၣ်န့ၣ်လီၤ.
လါမ့ၤ(၁၉)သီအနံၤ, မုၢ်ဃ့ၢ်လီၤအဆၢကတီၢ်န့ၣ် KNLA KNDOသုပၥ်ဖှိၣ်တဖၣ် စးထီၣ်ဒုးအီၤလၢဒြိတဖၣ်ဒီးတုၤလၢမုၢ်နၤခီအဆၢကတီၢ်မၤန့ၢ်၀ဲန့ၣ်လီၤ.
သုးကီၣ်ကးမီဖိက့ၣ်သုးကလၢၤအံၤ အိၣ်ဆီၤလီၤဃၥ်အသုးအဂံၢ်(၃၀)ဃၣ်ဃၣ်ဒီး တၢ်ထီၣ်ဒုးမၤန့ၢ်သုးကလၢၤအံၤအပူၤ တၢ်သံတၢ်ပှၢ်ဒီးတၢ်ဘၣ်ဒိဘၣ်ထံးတခီ, တၢ်မၤန့ၢ်စုက၀ဲၤတဖၣ်တခီ ခ့ၣ်အဲၣ်ယူၣ်-လီၢ်ခၢၣ်သးတပၤပၥ်ဖျါဃၥ်၀ဲတအိၣ်နီၤတမံၤဒံးဘၣ်.
ဒ်န့ၣ်အသိး ခီဖျိလၢတၢ်ထီၣ်ဒုး သုးကီၣ်ကးမီဖိက့ၣ်သုးကလၢၤအဃိ ဒူသ၀ီလၢအိၣ်ဘူးဒီးဖဲန့ၣ်အပူၤ လီၢ်က၀ီၤကမျၢၢ်(၁၀၀)ဘျဲၣ်အံၤ ဘၣ်လဲၤဃ့ၢ်ပူၤဖျဲးသးဆူ မဲၢ်တၣ်သ၀ီ, ထးဆီၣ်ယါကီၢ်ဆၣ်, ကီၢ်ကၠီၣ်တဲၣ်တပၤန့ၣ်လီၤ.
တၢ်ဒုးတဖၣ်အဃိ လီၢ်က၀ီၤကမျၢၢ်ဖိလၢလဲၤဃ့ၢ်ပူၤဖျဲးသးဆူ ကၠီၣ်တဲၣ်တဖၣ် တၢ်တူၢ်လိၥ်ကွၢ်ထွဲအီၤအသိး ပၥ်လီၤဃၥ်ကီၢ်ဆၢဘံၣ်ဘါတဖၣ်၀ံၤ ခိးကွၢ်၀ဲတပယူၥ်ဃီအဂ့ၢ် ကၠီၣ်တဲၣ်သုးမုၢ်ဒိၣ်တပၤစ့ၢ်ကီး ထုးထီၣ်ပၥ်ဖျါဃၥ်၀ဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဖၣ်အၣ်, သုးက့(၇)ဟီၣ်ကဝီၤဒီးကီၢ်ကၠီၣ်တဲၣ်ကီၢ်ဆၢဒီတကျိၤ အိၣ်သုးကီၣ်ကးသုးကလၢၤတဖၣ်လၢအမ့ၢ်မီဖါသူ,တညၣ်ကၠိ,တခီးဘံၣ်ကွံ,ပူလူတူၢ်,ချၢၣ်ဒ့,မကွံၢ်လူၢ်,လ့ဂီၤသ့ၣ်သုးကလၢၤအံၤ လါမ့ၤတလါအတီၢ်ပူၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် ထီၣ်ဒုးမၤန့ၢ်ကွံၥ်၀ဲန့ၣ်လီၤ.
လၢန့ၣ်အမဲၥ်ညါ တၢ်ထီၣ်ဒုးသုးကီၣ်ကးသုးကလၢၤတဖၣ်အပူၤ သုးကီၣ်ကးအပှၤသုးဖိတဖၣ် ဃ့ၢ်ပူၤဖျဲးကွံၥ်အသးအိၣ်အဃိ KNLA KNDOသုးပၥ်ဖှိၣ်တဖၣ် ဘၣ်လူၤရှဲပျီကွံၥ်အိၣ်၀ဲအဂ့ၢ်တၢ်သ့ၣ်ညါဘၣ်လၢ KNUလီၢ်ခၢၣ်သးတၢ်ကစီၣ်အတၢ်ပၥ်ဖျါအပူၤန့ၣ်လီၤ.
