လါမ့ၤ (၁၉) သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်ကဝီၤ, ဒူသထူၣ်ကီၢ်ရ့ၣ်, ကၠဲးထိၣ်ကီၢ်ဆၣ်အပူၤ သုးကီၣ်ကးအသုးသ့ၣ်တဖၣ် ပညိၣ်ဒုးထံဖိကီၢ်ဖိကမျၢၢ်အဖီခိၣ်ဝံၤ ခးလီၤကျိဖးဒိၣ် ဒီး ဟဲတ့ၢ်လီၤ မ့ၣ်ပိၢ်ခီၣ်ဖျိ ကဘီယူၤအဃိ ဝီၢ်က့ကရူၢ်အပူၤ ပှၤလီၢ်က၀ီၤဖိဘူးထီၣ်(၃)ကထိဃၣ်ဃၣ် ဘၣ်သုးလီၢ်သုးကျဲဃ့ၢ်ပူၤဖျဲးသးအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
ခ့ၣ်အဲၣ်ယူၣ်-ကၠဲးထိၣ်ကီၢ်ဆၣ်, ဝီၢ်က့ကရူၢ်ပူၤ သဝီလၢဘၣ်ဃ့ၢ်ပူၤဖျဲးသးတဖၣ်မ့ၢ်၀ဲ ဝီၢ်က့သဝီ, ဘီကထၣ်သဝီ, ကၠီၣ်ယ့ၣ်တွ့သဝီ, ကလီမၠီၤသဝီ, ရှါစူၣ် ဒီး အညၤစူၣ်သဝီတဖၣ် ဟံၣ်ခိၣ် (၆၅၄) ဖျၢၣ် ပိၥ်ခွါ (၁၂၈၃) ဂၤ, ပိၥ်မုၣ် (၁၄၃၈) ဂၤ, ခဲလၢၥ်ပၥ်ဖှိၣ်(၂၇၂၁)ဂၤအိၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ခ့ၣ်အဲၣ်ယူၣ်-ကၠဲးထိၣ်ကီၢ်ဆၣ် သဝီသ့ၣ်တဖၣ်အပူၤ ဖဲလါမ့ၤ (၁၄) သီ ဂီၤ (၈း၂၀) မံးနံးတုၤ မုၢ်ထူၣ် (၁၁း၃၅) မံးနံး အဆၢကတီၢ် သုးမီၤစရိၤအသုးလၢ အိၣ်ဆီလီၤသးဖဲ ပကိကီၢ်ခီဒိၣ်, ဝီကီၢ်ဆၣ်, စ့ၤယွၤသဝီတဖၣ် ခးလီၤ ကျိဖးဒိၣ် ၁၂၂-မမ (၄) ဖျၢၣ်, မၤကဒီး ဖဲမုၢ်ထူၣ် (၁၁း၅၂) မံးနံး ဆၢကတီၢ် ကယီၤယူၤဒုးသုး ဟဲတ့ၢ်လီၤ မ့ၣ်ပိၢ် (၂) ဖျၢၣ်ဆူ ဆီထံးကီၢ်ဆၣ်, သုးက့ (၃) ဟီၣ်ကဝီၤ, တကးဒံးဘၣ် ဖဲမုၢ်ထူၣ် (၁၂း၀၃) မံးနံး အဆၢကတီၢ် ကဘီယူၤဒုးသုး ဟဲတ့ၢ်လီၤ မ့ၣ်ပိၢ်ဖဲ ကၠဲးထိၣ်ကီၢ်ဆၣ်, ကၠီၣ်ဖၠၤကရူၢ်ပူၤ (၁) ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ ဖဲလါမ့ၤ (၁၃) သီ ဟါ (၉း၁၂) မံးနံးအဆၢကတီၢ် တၢ်ဒုးတအိၣ်ဘၣ်ဆၣ် သုးကီၣ်ကးဟံးဆူၣ်တၢ်စိတၢ်ကမီၤ အမျိၥ်သုး, သုးရ့ၣ် (အမတ-၃၁၀) ခးလီၤ ကျိဖးဒိၣ် ၁၂၂-မမ (၃) ဖျၢၣ်န့ၣ်လီၤ.
သုးမီၤစိရိၤသုးကီၣ်ကးအသုးသ့ၣ်တဖၣ် ပညိၣ်ဒုးထံဖိကီၢ်ဖိကမျၢၢ်ဖိလၢ ကလံၤကျါအဃိ ထံဖိကီၢ်ဖိကမျၢၢ်သ့ၣ်တဖၣ် ဘၣ်အိၣ်ဒီးတၢ်ဘၣ်ယိၣ်ဘၣ်ဘှီ ဒီးဘၣ်သုးလီၢ်သုးကျဲဘၣ်ဃ့ၢ်ဝဲအဃိ လိၣ်ဘၣ် တၢ်အီၣ်တၢ်အီ, တၢ်လီၢ်တၢ်ကျဲဒီးတၢ်အိၣ်ဆူၣ်အိၣ်ချ့တၢ်အံးထွဲကွၢ်ထွဲတဖၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သး စံး၀ဲန့ၣ်လီၤ.
