လါမ့ၤ(၁၆)သီ,၂၀၂၅နံၣ်
ကၠီၣ်တဲၣ်-ကညီကီၫ်ဆၢ,လူၫ်ပျဲၫ်ကီၫ်ဆၣ်,၀့ၫ်တၫ်ကြဲၫ်အကပၤ သုးကီၣ်ကးအတၣ်လဲၣ်သုးကလၢၤ လၢအိၣ်သူၣ်ဆီ လီၤဃာ်အသးယံာ်(၃၉)နံၣ်အံၤ ကညီဒီကလုာ်စၢဖှိၣ်ကရၢအစုတီၤဖီလာ် သုးပာ်ဖှိၣ်တဖၣ် ထီၣ်ဒုးမၤန့ၫ်၀ဲအကတီၫ် မၤန့ၫ်တၫ်စုက၀ဲၤအါအါဂီၫ်ဂီၫ်အဂ့ၫ် ဖဲလါမးရှး(၁၅)သီအနံၤန့ၣ် KNU ထုးထီၣ်ပာ်ဖျါ၀ဲလီၤ.
လၢ(၁၉၈၆)နံၣ်လံၤလံၤ သုးကီၣ်ကးအတၣ်လဲၣ်သုးကလၢၤလၢအိၣ်သူၣ်ဆီလီၤအသးအံၤ ကညီဒီကလုာ်တၫ်ထူၣ်ဖျဲး သုးမုၫ်ဒိၣ် (KNLA)ကညီဒီကလုၫ်တၫ်ဒီသဒၢသုး(KNDO)ဒီးသုးပာ်ဖှိၣ်တဖၣ် ဖဲလါမ့ၤ(၉)သီအနံၤန့ၣ် စးထီၣ်ဒုး၀ဲ၀ံၤ ယံာ်(၅)သီ,ဖဲလါမ့ၤ(၁၃)သီအနံၤန့ၣ် ထီၣ်ဒုးမၤန့ၫ်၀ဲလီၤ.
တၫ်ထီၣ်ဒုးမၤန့ၫ်တၣ်လဲၣ်သုးကလၢၤအပူၤ တၫ်စုက၀ဲၤအကလုာ်လၢမၤန့ၫ်၀ဲတဖၣ် တထုးထီၣ်ပာ်ဖျါ၀ဲဘၣ်ဆၣ် မၤ န့ၫ်၀ဲ(၁၂၀မမ)ကျိဖးဒိၣ်,၈၁မမကျိဖးဒိၣ်အချံတဖၣ်ပာ်ဃုာ် တၫ်စုက၀ဲၤ(၃၀)ဘျဲၣ်,၁၂၀ကျိဖးဒိၣ်အချံ(၇၀)ဘျဲၣ်ဒီး ကျိ ချံပှၫ်သၣ်အါအါဂီၫ်ဂီၫ်အဂ့ၫ်KNLAပှၤဘၣ်မူဘၣ်ဒါတဂၤတဲ၀ဲလီၤ.
KNU-ကညီဒီကလုာ်စၢဖှိၣ်ကရၢ,ကီၫ်သူလ့ၤတၫ်ပၢဟီၣ်က၀ီၤ,သုးက့နီၫ်ဂံၫ်(၇)တၫ်ပၢဆှၢအဖီလာ် ၀့ၫ်တၫ်ကြဲၫ်,သုးကီၣ် ကးတၣ်လဲၣ်တၫ်တိာ်ကူၣ်ကျဲၤသုးကလၢၤအပူၤ နီၫ်ဂံၫ်(၂၄)ခီၣ်ချ့သုးရ့ၣ်ဒီးနီၫ်ဂံၫ်(၃၁၁)ကျိဖးဒိၣ်သုးတဖၣ် ယီၫ်တံၫ်ဆီ လီၤဃာ်အဂံၫ်ဘါ(၄၀)ဂၤဃၣ်ဃၣ်၀ံၤ တၫ်ဒုးအပူၤ သုးကီၣ်ကးကျိဖးဒိၣ်သုး သုးခိၣ်ဒိၣ်ဖိ(၁)ဂၤပာ်ဃုာ် သုးကီၣ်ကး အသုးသံ(၉)ဂၤအဂ့ၫ် တၫ်သ့ၣ်ညါဘၣ်လီၤ.
သုးကီၣ်ကးအနီၫ်ဂံၫ်(၂၄)ခီၣ်ချ့သုးရ့ၣ် သုးရ့ၣ်ခိၣ်ခံပာ်ဃုာ် သုးကီၣ်ကးအသုးဖိလၢပျံၤတၫ်ဒီးဃ့ၫ်ဖျိးကွံာ်တဖၣ် KNLA/KNDO သုးဖိတဖၣ် လူၤဖီၣ်၀ဲအဖၢမုၫ်လီၤ.
ဖဲမဟါတနံၤ,လါမးရှး(၁၅)သီနံၤစ့ၫ်ကီး ကၠီၣ်တဲၣ်-ကညီကီၫ်ဆၢ,လူၫ်ပျဲၫ်ကီၫ်ဆၣ်,မဲၫ်လးသ၀ီအကပၤ သုးကီၣ်ကး အသုးကလၢၤစ့ၫ်ကီး KNLA/KNDOသုးပာ်ဖှိၣ်တဖၣ် ထီၣ်ဒုးဃီၤ၀ဲလီၤ.
