လါမ့ၤ(၁၂)သီ,၂၀၂၅နံၣ်
ကရ့ၣ်နံၣ်ကီၫ်စဲၣ်,ဖါဆီကီၫ်ဆၣ်,မိၤခံဟီၣ်က၀ီၤ ဖဲလါအ့ဖြ့ၣ်(၁၀)သီအနံၤ,မုၫ်ထူၣ်အဆၢကတီၫ်န့ၣ် သုးကီၣ်ကးဒုးခးလီၤ၀ဲလၢကလံၤကျါအဂ့ၫ် တၫ်သ့ၣ်ညါဘၣ်လၢ ကရ့ၣ်နံၣ်တၫ်ဘၢၣ်စၢၤပၢပြးဂ့ၫ်၀ီကီၣ်ကး(IEC)အအိၣ်န့ၣ်လီၤ.
သုးကီၣ်ကးအကလံၤကျါတၫ်ဒုးခးလီၤတၫ်အဃိ မိၤခံဟီၣ်က၀ီၤ,ကမျၢၫ်ဘၣ်သံ(၂)ဒီးဘၣ်ဒိဘၣ်ထံး၀ဲ(၃)ဂၤန့ၣ်လီၤ.
“တၫ်အံၤဒ်ပသ့ၣ်ညါအသိး သုးကီၣ်ကးန့ၣ် လၢတၫ်တိာ်ကူၣ်ကျဲၤအိၣ်အပူၤ ဒုးတ့ၫ်လီၤမ့ၣ်ပိၫ်လၢကဘီယူၤ လၢထံကီၫ်ဒီတဘ့ၣ်အပူၤ ဒ်တဲ၀ဲအသိးဒီးမၤ၀ဲလီၤ.တၫ်လၢလီၤတံၫ်တမံၤဒု ကဒုးဃီၤတၫ်လၢကလံၤကျါန့ၣ်ကအိၣ်၀ဲလီၤ. လၢပ၀ဲ တကပၤစ့ၫ်ကီး တၫ်သမံသမိးတဖၣ်ဒု ဒ်ပမၤန့ၫ်အသိးပမၤထွဲလီၤ.လၢလၢပှဲၤပှဲၤဒုပၢဆှၢတန့ၫ်ဘၣ်အဂ့ၫ် ”IECနဲၣ်ရွဲၣ် သဃဲၤ(၂)ပညါခိၣ်အီၣ်တဲ၀ဲလီၤ.
သုးကီၣ်ကးန့ၣ် တၫ်ဟဲဒုးဃီၤ မိၤခံဟီၣ်က၀ီၤလၢကလံၤကျါအံၤ မ့ၫ်ပာ်ဃုာ်လၢတၫ်တဘျီအံၤန့ၣ် မ့ၫ်(၄)ဘျီတဘျီ၀ံၤ အပူၤကွံာ် လါအ့ဖြ့ၣ်(၂၄)သီ,၂၆,သီအနံၤန့ၣ်တဘျီ,လါမးရှး(၇)သီန့ၣ်တဘျီဒုးဃီၤ၀ဲလၢကလံၤကျါန့ၣ်လီၤ.
သုးကီၣ်ကးကလံၤကျါတၫ်ခးလီၤတၫ်ပာ်ဃုာ်,ပှၤဟ့ၣ်သုးကီၣ်ကးတၫ်ကစီၣ်ဒီးတၫ်ဘၣ်ယိၣ်တၫ်ဘံၣ်တၫ်ဘၢတၫ်အိၣ်သးတဖၣ်အဃိ မိၤခံဟီၣ်က၀ီၤတၫ်တြီဃာ်တၫ်သူ Star Link(၁)လါအဂ့ၫ် အပူၤကွံာ် လါအ့ဖြ့ၣ်(၂၈)သီအနံၤန့ၣ် ကီၫ်ရ့ၣ်တၫ်ပာ်ဖှိၣ်ပၢဆှၢဂ့ၫ်၀ီကမံးတံာ် ထုးထီၣ်ဘိးဘၣ်ရၤလီၤ၀ဲလီၤ.
“အ့ထၢၣ်နဲးတဖၣ် လၢကီၫ်ဆၣ်တနီၤအပူၤန့ၣ် တၫ်တြီဃာ်၀ဲန့ၣ် ကဲထီၣ်တၫ်ဘၣ်တဲ၀ဲအဂ့ၫ် ပနၫ်ပၢၫ်လီၤ.လၢအဂၤတ ကပၤစ့ၫ်ကီး ပှၤအါဂၤအတၫ်ဘံၣ်တၫ်ဘၢန့ၣ် မ့ၫ်ထိၣ်သတြီၤကွၫ်လၢကဟးဂုၤဟးဂီၤအဘျီတဖၣ်အဘျီန့ၣ် တၫ်မၤစှၤ လီၤတၫ်ဟးဂုၤဟးဂီၤတဖၣ် မ့ၫ်န့ၫ်၀ဲန့ၣ် ပနာ်လၢကကိညၣ်၀ဲလီၤ.ဒုၣ်ဒါန့ၣ်မၤအတၫ်မၤအသိး,အိၣ်ဒၣ်လၢ ပဒီသဒၢတြီ ဆၢအီၤအီၤကန့ၫ်ဒ်လဲၣ်န့ၣ်လီၤအဂ့ၫ်”IECနဲၣ်ရွဲၣ်သဃဲၤ(၂)တဲဖျါ၀ဲဘၣ်ထွဲဒီး အတၫ်ပာ်သးလၢတၫ်တြီဃာ်အ့ထၢၣ်နဲး တၫ်ဂ့ၫ်အဖီခိၣ်န့ၣ်လီၤ.
ကရ့ၣ်နံၣ်ကီၫ်စဲၣ်အပူၤ အပူၤကွံာ် လါအ့ဖြ့ၣ်အပူၤ သုးကီၣ်ကးကလံၤကျါတၫ်ဒုးခးလီၤတၫ်တဖၣ်,ခးလီၤကျိဖးဒိၣ်တဖၣ်,ဒြိဒုးခးလီၤတၫ်တဖၣ်အဃိ ကမျၢၫ်ဘၣ်သံ(၁၈)ဂၤဆူအဖီခၣ်၀ံၤ ဘၣ်ဒိဘၣ်ထံး(၃၉)ဂၤဆူအဖီခိၣ်အဂ့ၫ် Karenni Human Rights Groupပာ်ဖျါ၀ဲအဖီခိၣ်တၫ်သ့ၣ်ညါဘၣ်လီၤ.
Ref: Ayeyarwaddy Times
