လါမ့ၤ(၁)သီ,၂၀၂၅နံၣ်
ယိၤဒိၣ်ကီၢ်စဲၣ်တၢ်လဲၤထီၣ်လဲၤထီပၣ်တံၣ်(SSPP)အစုတီဖီလၥ် ယိၤဒိၣ်သုးမုၢ်ဒိၣ်(SSA)ဒီး ကိကးသုးမုၢ်ဒိၣ်(MNDAA)အဘၢၣ်စၢၤ သုးဂ့ၢ်၀ီတၢ်ဖ့ၣ်ဆၢအိၣ်ထီၣ်အဖီခိၣ် ကထံၣ်လိၥ်တဲသကိး၀ဲအဂ့ၢ်န့ၣ် SSPP ထုးထီၣ်ပၥ်ဖျါဃၥ်တၢ်ကစီၣ် ဖဲလါအ့ဖြ့ၣ်(၃၀)သီအနံၤန့ၣ်လီၤ.
လါအ့ဖြ့ၣ်(၂၈)ဒီး(၂၉)သီအနံၤတဖၣ်အပူၤ ယိၤဒိၣ်ကီၢ်စဲၣ်ကလံၤစိး, သံၣ်ပီကီၢ်ဆၣ်, တီၣ်ဟဲသ၀ီ, ဟူမၠံၣ်သ၀ီ, နါနၢၤ, စ့ၣ်ကၠီးပၣ်ဃုၥ် တၢ်လီၢ်(၈)တီၤအပူၤ တၢ်ဒုးကဲထီၣ်သးအိၣ်ထီၣ်၀ဲအဂ့ၢ် စံး၀ဲန့ၣ်လီၤ. ဒ်န့ၣ်အသိး တၢ်မၤဆူၣ်မၤဆါ တၢ်ဖီၣ်လိၥ်သး တၢ်မူၤတၢ်ရၤအိၣ်ထီၣ်၀ဲ(၂၄)ဘျီအဂ့ၢ် အလံၥ်ဘိးဘၣ်ရၤလီၤအပူၤ ပၥ်ဖျါဃၥ်၀ဲန့ၣ်လီၤ.
SSPPဟီၣ်က၀ီၤအပူၤ ကိကးသုးတဖၣ် တၢ်လ့ၤလိၤဟးထီၣ်အဂီၢ် MNDAAလီၢ်ခၢၣ်သး တၢ်ဒုးသ့ၣ်ညါလၢအဖိသဲစးတအိၣ်ဘၣ်အဃိ တၢ်သဘံၣ်သဘုၣ်တဖၣ်အိၣ်ထီၣ်၀ဲအဂ့ၢ်န့ၣ် SSPPထုးထီၣ်ပၥ်ဖျါဃၥ်၀ဲန့ၣ်လီၤ. တၢ်ဒုးတဖၣ်အပူၤ ခံခီခံကပၤ သံဒီးဘၣ်ဒိတဖၣ်အိၣ်ထီၣ်၀ဲအဂ့ၢ် စံး၀ဲန့ၣ်လီၤ.
ကတီၢ်ခဲအံၤန့ၣ် SSPPသုးကလၢၤတဖၣ်လၢအိၣ်ဖဲ သံၣ်ပီကီၢ်ဆၣ်, နါနၢၤ, နါတီၣ်, ခိၣ်နါဖး, တ့ဟဲ, စ့ၣ်ကၠီး, နါတီၣ်, နါမခီၣ်, ဖၣ်စ့ၣ်တၢ်လီၢ်တဖၣ်အပူၤ ခံခီခံကပၤ တၢ်ဒုးတၢ်ဖ့ၣ်ဆၢလိၥ်သးအိၣ်ထီၣ်၀ဲန့ၣ်လီၤ.
မ့မ့ၢ်လၢ MNDAAတခီ ဘၣ်ထွဲဒီးတၢ်ကဲထီၣ်သးတၢ်အိၣ်သးတဖၣ်အဖီခိၣ် တထုးထီၣ်ဘိးဘၣ်ရၤလီၤ၀ဲနီတမံၤဒံးဘၣ်န့ၣ်လီၤ.
SSPP ဒီး MNDAAတဖၣ်အံၤ မ့ၢ်ကလုၥ်ဒူၣ်ပှၤဖီၣ်စုက၀ဲၤကရၢတဖၣ်လၢ အဆဲးလီၤထံကီၢ်ဒီတဘ့ၣ်တၢ်ပတုၥ်တၢ်ခးလံၥ်ဃံးဃၥ်(NCA) အသိး မ့ၢ်စ့ၢ်ကီး ပှၤဖီၣ်စုက၀ဲၤ(၇)ဖုပၥ်ဖှိၣ် ကီၢ်စၢဖှိၣ်ထံရူၢ်ကီၢ်သဲးတၢ်ထံၣ်လိၥ်ထိၣ်ဃူကမံးတံၥ်(FPNCC) အပှၤကရၢဖိတဖၣ်န့ၣ်လီၤ.
